Mikhalelo Miraru sa Omuroromela Yehova

Tavite aamvootha Koliyati woona wi aanamuroromela Yehova. (1Sam 17:45) Yehova onnachuna wooniherya ikuru sawe wa akapuro awe. (2Math 16:9) Ti mwawiihai nneeraahu nooniherye wi ninnaroromela nikhaviheryo nenlo Yehova onavahereryeiye ohiya ororomela ikuru ni mavyakelo ahu? Sookhalavo mikhalelo iha miraru:

• Mvekele moohihiyererya. Mvekele ohiya pahiru oveka okhurumuweliwa mmanle opaka yoocheka nyenya tho vaavaa muneehiwaanyu wi mpake echu yoonanara. (Mat 6:12, 13) Mvekele ohiya pahiru oveka mareeliho a Yehova ntakhara soolakelela seiho mpankaanyu nyenya tho ohoolela wawe ni miruku muhaakumve opaka soolakelela.—Tiy 1:5

• Mukhaleno yookhovelela ya omwaalakhanya Piipiliya ni ohuserya. Mmwaalakhanyeke Piipiliya mahiku oothene. (Sal 1:2) Mmaliheke elukuluku muupuwelelaka sootakiherya sa Mpiipiliyani, nave mpharihele muteko mahusiheryo yaawo muhusenryaanyu. (Tiy 1:23-25) Mwiirehereryeke ntakhara muteko woolaleerya ohiya ororomela mavyakelo anyu. Mphure mwawaakhwanela mithukumano sa muloko moorweela wa wiirehererya ntakhara seiho.

• Muchariheke vakhiviru khiviru marehereryo a Yehova. Musuweleke ohoolela ovyaani onarweela mmarehereryo, nave muchariheke mwawaakuveya. (Nam 9:17) Mwaawiriyaneke asitokweene a mmulokoni vaavaa awo anavahaaya ekano ni ohoolela.—Ahe 13:17

MOONE EXILEMA MUHOOVE WIIKARIWA, NAVE VOOCHARELA MWAAKHULE MAKOHO ANACHARELA:

• Woova taani anna ni arokora yaahoolenlaaya?

• Tiheeni yaakhavihenrye ovootha woova waya?