Nyuwaano Mwaanasuwela?

Ntakhara heeni Aisarayeli akhalai yaanampaka lopolu?

MU ELUKULUKU yakhalai, vaavaa mulopwana aayeiye othela, owo aaphwanela ompaka lopolu. Lopolu ola akhweya aaphitaanyerya ichu sasisapo, axinama naari ikhorowa. Mu ikwaha ikina, lopolu owo aaneeriwano moorweela wa olapa. Ntoko yootakiherya, Yakopo aaheemererya olapa mu iyaakha 7 wa atiithi awe Rakeli wi awerye omuthela. (Map. 29:17, 18, 20) Teevi yaari yoolakelela ya yookhovelela yeela?

Mulipa oomuhuserya Piipiliya Carol Meyers ooloca: “Lopolu akhweya naari nlivelo wa emusi ya muthiyana ntakhara oyeleela miteko sa mwaana yoowo aatheliwa, yeeyo yaari yoochuneya wa imusi seiho muteko aya waari olima.” Akhweya tho lopolu aanaphariheliwa wi alipihe onthamwene variyari va imusi seiho suuraana ntakhara othela. Wiiwanana yoola wa imusi waari woochuneya variyari va ilukuluku soovila, woona wi yaanwerya okhaviheryanaka mukina ni mukhwaawe. Ohiya yeeyo, lopolu aanooniherya wi muthiyana ohaakameliwa nave wi tahi atiithi awe yaahaala omukhapelelaka nyenya aiyawe.

Lopolu haataphulela wi muthiyana aamakulihiwa naari okuliwa ntoko echu vyakala. Liivuru Israel Antigo—Sua Vida e Suas Instituições ooloca; “Murici yoola wa ompaka lopolu, waaneeriha okhala ntoko wi othela mu Isarayeli waamuthummwa. Nyenya mwawooneya, lopolu waari mukhalelo wa othamalela emusi ya muthiyana ohiya omuthuma.”

Olelo, mu ilapo ikina achu aakhalano yookhovelela ya ompaka lopolu. Vaavaa asitiithi Eekristu anamvekaaya lopolu, awo anneeriha wi ‘achu esuwele wi awo tooleva’ moorweela wa ohiveka ichu sincipale opwaha seiho saahaala okhala soophwanelela. (Fil. 4:5; 1 Kor. 10:32, 33) Mmukhalelo yoola, awo annooniherya wi tahi a nrima nave wi ‘toohichunasha ikhorowa.’ (2 Tim. 3:2) Mwawaaceererya, vaavaa asitiithi ahinavekaaya ichu sincipale, mulipa waakamela hakhinyereryeya otoroka nihiku na othela wi awerye ophwanya ichu seiho inachuneya. Owo tho hakhinyereryeya ohiya muteko woopiyoneero wi alapeke ilukuluku sincipale wi awerye ophwanya ikhorowa sawaakhwanela sa ompakano lopolu oowalamela.

Mmakupa makina a elapo, lopolu onapakiwa moorweela wa malamulo a epooma. Mu ilapo seiha, asitiithi Eekristu anniiwelela malamulo yaala. Ntakhara heeni? Nthowa nawi Masu a Muluku analoca wi Akristu anaphwanela ‘waacicimihaka asitokweene anlamula’ ni wiiwelela malamulo yaawo ahinaakaaha malamulo a Muluku.—Aro. 13:1; Saw. 5:29.