Wakhala wi omuchu anyu ti woothipeleya, munahaala ovilela ipahu
WA AMIRAVO
9 Omuchu
OMUCHU TIHEENI?
Omuchu onnaphitaanyerya ichu sincipale ohiya pahiru nsina naari ophwaneliwa wanyu. Ennaphitaanyerya tho meecelo ni soororomela sanyu. Ela ti wi, omuchu onnaphitaanyerya ichu soothene sa vaate naari mpuwa seiyo sinooniherya wi “mwa muchu.”
NTAKHARA HEENI TI YOOCHUNEYA?
Wakhala wi mootikitherya omuchu anyu, munnuumelela ochara soororomela sanyu ohiyana waachariha achu akina.
“Achu ancipale ari ntoko puneka yoowo ohinathanla echu yoowara; achu akina tanamuthanlela yoowara awe.”—Adrian.
“Koohuserya wuumelela ochara yaphaama naamwi ohiri wookhweya. Kinnaathanla asinthamwene aka eeparipari orweela wa olikanyiha meecelo aya ni meecelo aka.”—Courtney.
PIIPILIYA ONI: “Muhitxharihe makhalelo a elapo yela. Mutatuse murima anyu, wi murukunuse mupuwelo anyu.”—Aroma 12:2.
ECHU YAWEERA
Mwaalikhele omuchu anyu wa hiihaano ni omuchu munachunaanyu okhalano muhoolo moorweela wa osuwela mikhalelo sanyu saphaama, sooceecheya ni soororomela sanyu. Mpacerye waakhula makoho ala:
Mikhalelo sanyu saphaama: Mavyakelo taani kiryaakano? Makupa taani kilipalimpaaka? (Ntoko yootakiherya: Ka muchu a waakuvela ophiya? oopixa murima? oowetha? oovaha?) Ichu taani saphaama kineeraaka?
MWEERERYE ELA: Munnaviliwa osuwela mikhalelo sanyu saphaama? Mmukohe mmusi naari nthamwene oororomeleya wi ooleeleeni mikhalelo sanyu saphaama.
PIIPILIYA ONI: “Mutxhu ti mutxhu avareryeke merelo awe. Nave, akhalano nthowa na witxitximiha, itxitximiheke mekheiye pahi, ahìphwanaphwanihaka ni atxhu akina.”—Galasya 6:4.
Sooceecheya sanyu: Makupa taani a omuchu aka kinaphwanelaaka oreherya? Ti liini onakhalaaya wookhweya omorela mu yaweeha? Mmakupa taani onachuneyaaya wi kikhale oopixa murima?
PIIPILIYA ONI: “Nalotxà wi hinano sotxheka, nnamwiwoka mukhatihu.”—1 Yohani 1:8.
Soororomela sanyu: Malakiheryo taani kineecelaaka nave ntakhara heeni? Kinnaroromela wi Muluku ookhala? Tiheeni enakilekecha wi ookhala? Meerelo taani kinoonaaka okhala oonanara nave ntakhara heeni? Soororomela taani kiryaakano sa omwaahiyu?
PIIPILIYA ONI: “Osuwela onamòholaka, miruku inan’wopolaka motakhaliwani.”—Masiposipo 2:11.