12 Soolakelela

SOOLAKELELA TIHEENI?

Yoolakelela ti yoohiyana ni oloha—ti echu munachunaanyu yeeren’ye. Soolakelela seeparipari sinnaphitaanyerya wuupuwelela, wiisaakuviha ni olapa mwakuru.

Soolakelela inanwerya okhala sa elukuluku ya vakhaani (inamaliha mahiku naari isumana wi saakhwanele), eriyari ya elukuluku (miyeeri), ni elukuluku yincipale (eyaakha naari iyaakha sincipale). Soolakelela sa elukuluku yincipale inanwerya waakhwanela mu elukuluku yavakhaani naari yawaaca.

NTAKHARA HEENI TI YOOCHUNEYA?

Waasya soolakelela enanwerya oteka nroromelo nanyu, olipiha onthamwene anyu, ni waacererya ohakalala wanyu.

Wiiroromela: Vaavaa munaasyanyu soolakelela ikhaani nave mphwanya, nyuwo munnakhalano nroromelo wa soolakelela itokotoko. Navetho munnavilela vaavaa munakumanaanyu ni makacamiho a nihiku nnihiku—ntoko ohiweemererya akina oweerihaani opaka echu munasuwelaanyu wi ti yoonanara.

Onthamwene: Achu annasiveliwa okhala ni yaale anahooleliwa ni soolakelela saphaama—eyo tiwi, yaale anasuwela echu anachunaaya nave aniilipiherya wi ephwanye. Opwaha yeeyo, mukhalelo mmoha waphaama wi mulipihe onthamwene ori olapa ni muchu yoowo orino yoolakelela emohamoha.

Ohakalala: Vaavaa munaavyaanyu ni ophwanya soolakelela, nyuwo munnahakalala.

“Kinnasiveliwa okhalano soolakelela. Iho sinnakeeriha okhala oweiwa ni okivaha echu wi kititelele waasya. Nave vaavaa munaphwanyaanyu yoolakelela, ti yaphaama wuupuwela ni oloca: ‘Eyaa kooherano! Kohaakwaniherya echu kaachunaka wi kipake.’”—Christopher.

PIIPILIYA ONI: “Wawehererya etxheku yophwanelela, hiwalaru mpeu; wanona ovareryaru elukuluku epwila enrupaya, hìwupuwela ohepha.”—Eklesiyaste 11:4.

ECHU YAWEERA

Mucharihe meerelo ala wi mwaavye ni ophwanya soolakelela sanyu.

Musuwele. Murepele soolakelela iri soochuneya nave ikhale mu nipuro noopacerya—muthanle emoha sa seiho munachunaanyu okhala yoopacerya, yanaawiili, yaneeraru, ni yaneexexe.

Olakelela: Wa yoolakelela ti yoolakelela, mweere ela:

• Muhelevo mphimo.

• Mvareryele ichu inavolowela.

• Muupuwelele makacamiho, ni waasya mukhalelo wa ovootha.

Yaweera. Muhiweherye okhalano ichu soothene wi mpacerye weerano. Mwiikohe: Tiivi eri echu yoopacerya kinaphwanelaaka opaka wi kiphwanye yoolakelela aka? Voocharela mpake. Moone oya wanyu vahoolo mu waakhwaniherya soolakelela sanyu emoha ti emoha.

PIIPILIYA ONI: “Onupuwela phama miteko sawe, nikhupi nawe ninnasareya; onakhumela murima miteko sawe, hanaphur’etxhu.”—Masiposipo 21:5.