Miphurelo Sa Okhala Awiivareryela

WIIVARERYELA TIHEENI?

Wiivareryela onaphitaanyerya mavyakelo a:

• oweherya

• okhalano mphimo

• okhwaaniherya miteko naamwi muchu ahichunaka opaka

• waathokororya akina

NTAKHARA HEENI WIIVARERYELA TI WOOCHUNEYA?

Anamwane anasuwela wiivareryela ananwerya okhooca echu yoonanara, naamwi yoonaka wi yaahaala okhalano mphurelo. Moohiyana, anamwane ahiniivareryela ti wookhweya okhala:

• oowali

• awuukhuwa

• oomulya soona naari oohapaliwa naari opharihela mirece

• ohithanlela phaama soolya

Yootholathola emoha yohooniherya wi anamwane aniivareryela yunnuwa hanakhalanoxa makacamiho a ekumi, wuukhuwa, ni makacamiho makina. Yootholathola yeeyo yoomweeriha Muhusiha Angela Duckworth a Universidade da Pensilvânia okhalano makuchuwelo ala: “Hiyaavo echu ekina opwahana wiivareryela.”

MUKHALELO WA OMUHUSIHA MWANINYU OKHALA AWIIVARERYELA

Muhuserye wi hooye nave mwaakhwaniherye masu anyu

NLAKIHERYO NA MPIIPILIYA: “Oloca wanyu ekhaleke: Aayi, aayi; hooye, hooye.”—Mateu 5:37.

Anamwane ahiniivareryela ananwerya oweeha alipa ooyara moorweela wa weera ichu soohiphwanelela—akhweya vanlakani. Wakhala wi alipa ooyara annamunnya mwaana echu eri yoothene onachuneiye, mwaana onahaala okhovelela aneerano wa echu vyakala onachuneiye.

Mmukhalelo mukina, wakhala wi alipa ooyara aaloca wi hooye, nave yaakhwaniherya, mwaana onamuhuseryavo echu—wi hannawerya waakhwaniherya echu eri yoothene nnachunaahu. David Walsh oorepa: “Achu aniivareryela tanakhala oohakalala. Haniwerya waaceenyerya anamwane ahu wi echu yoothene anachunaaya elapo enahaala waavahaka.”a

Wakhala wi hamunamvaha mwaninyu ichu soothene onachuneiye hiihaano, eyo enahaala okhala yookhweya wa yoowo wiivareryela ohoolo waya—ntoko yootakiherya, opaka echu vyakala yahaala okhala yawoopiha wa yoowo naari wa akina.

Mmukhaviherye mwaninyu wiiwexexa sookhumelela sa opaka echu yaphaama ni yoonanara.

NLAKIHERYO NA MPIIPILIYA: “Yeeyo muchu onamiseiye, yeeyo tho toneereiye ahephe.”—Galasya 6:7.

Mwaninyu onaphwanela wiiwexexa wi saweera sookhalano sookhumelela saya, nave wi ohiivareryela onnakhalano sookhumelela soonanara. Ntoko yootakiherya, wakhala wi mwaninyu onnaakuvela osarasareya achu anahaala omusepaka. Mmukhalelo mukina, wakhala wi onnannuwiha mavyakelo a wiivareryela vaavaa onaroxiweiye—naari oweherya moopixa murima—achu anahaala osiveliwaka okhala ni yoowo. Mmukhaviherye mwaninyu wiiwexexa wi okumi awe onahaala okhala phaama vaavaa oniilipixeryeiye wiivareryela.

Mmuhusihe mwaninyu osuwela echu eri yoochuneya.

NLAKIHERYO NA MPIIPILIYA: “Musuwele othalela eri yaphama.”—Filipi 1:10, BNM.

Wiivareryela onnanikhaviherya osepa opaka echu yoonanara, nave tho ennanikhaviherya opaka ichu ihinanisivela, nto nnachunaahu opaka. Ela ti yoochuneya wa mwaninyu wi ahuserye olakelela ichu taani iri soochuneya ni opacerya weera seiyo. Ntoko yootakiherya, owo onaphwanela opaka muteko awe wa vaate woopaceryani nave voocharela anathata.

Mukhale yootakiherya yaphaama.

NLAKIHERYO NA MPIIPILIYA: “Vawi miyo koowooniheryaani yeela, mukitakiheryeke hiiha.”—Yohani 13:15.

Mwaninyu onahaala owoonaani mukhalelo munakhalaanyu vaavaa eneereyaaya echu ehinoosivelaani. Mmooniherye mwaninyu wi ichu inahaala weeca phaama wakhala wi ninniivareryela. Ntoko yootakiherya, vaavaa mwaninyu oneereiye echu yooheseya, apwanne munaakhulela munyeenyen’ye naari munakhala oomaaleleya?