Waataana Waphaama Veechokoni ni Asinthamwene

MUHIKHALENO NRIMA

NLAKIHERYO NA MPIIPILIYANI: “Mmoha ni mmoha ahithokororyeke sawaweru, nto saakhweiye tho.”—Filipi 2:4.

ELA ENATAPHULELA EHEENI: Okhalano waataana waphaama onarweela mu ovaha opwaha mu waakhela. Wakhala wi mookhalano nrima, munahaala onanariha waataana wanyu ni akina. Ntoko yootakiherya, oothelana yoowo ori a nrima, onnawerya okhala oohiroromeleya wa mukina. Mwawaaceererya, haavo onachuna opaka onthamwene ni muchu awiirumiha ni ichu oreiyeno naari osuwenleiye. Nave tho, liivuru The Road to Character onnaloca, “wiithokororya muchu mukhateiye onnamweeriha muchu waapuherya akina wi iphwanyerye.”

TIHEENI MUNAPHWANELAANYU WEERA:

• Mwaakhaviherye akina. Asinthamwene aphaama annaroromelana nave anakhala ooreheryeya okhaviheryana mukina ni mukhwaawe. Alipa oohuserya annaloca wi achu yaawo anaakhaviherya akina annavukula ohooxeya waya nave annasepa wiisoona mukhataaya.

• Mooniherye niphwanya. Niphwanya ori mukhalelo wa woona wiicela wa muchu mukina mmurimani mwahu. Muchu yoowo orino niphwanya, hanapharihela masu oophuca, ela tiwi, waaroha akina ni yoolakelela ya ophoreiha muupuwelo aya.

  Wakhala wi munnooniherya niphwanya, onamukhala wookhweya waakhurumuwela akina. Nave tho, niphwanya nnanwerya wookhaviheryaani osepa nthalu ni waapaka asinthamwene a ilapo ni sookhovelela soohiyanahiyana.

• Mmaliheke elukuluku anyu ni akina. Vaavaa munamalihaanyu elukuluku yincipale ni akina, munahaala waasuwela phaama. Ochekula ni akina onnakhaviherya waapaka asinthamwene eeparipari. Mukhale namawiriyana aphaama. Mpwacheke wuukhuwa wa nthamwene anyu. Otholathola wahiihaanoru wohooniherya wi “ochekula phaama onnaweeriha achu okhala oohakalala.”

MWAATHANLE ASINTHAMWENE ANYU MWA MIRUKU

NLAKIHERYO NA MPIIPILIYANI: “Onthamwene woonanara onnapahula meecelo aphaama.”—1 Korinto 15:33.

ELA ENATAPHULELA EHEENI: Achu yaawo munaataanaanyuno anahaala woovolowelaani mmukhalelo waphaama naari woonanara. Achu anahuserya mukhalelo wa muchu, alonce wi asinthamwene a muchu ananwerya omvolowela mmikhalelo soohiyanahiyana. Ntoko yootakiherya, awo alonce wi wakhala wi mwaataanne ni muchu onamulya soona naari onapaka mararuwo, nyuwaano tho munahaala opacerya omulya soona naari opaka mararuwo.

TIHEENI MUNAPHWANELAANYU WEERA: Mpake onthamwene ni achu yaawo arino mikhalelo saphaama munachunaanyu otakiherya. Mwawiihiiha, mwaavye waataana ni achu ooreera murima, a ncicimiho, a mahala, ni oowaakhela aleco.

MALAKIHERYO MAKINA A MPIIPILIYANI

MUSEPE OLOCA MASU OOPHUCA.

“Muchu eemwaanomwaano, masu awe weetha ntoko nlema.”—MASIPOSIPO 12:18.

MUKHALE A MAHALA.

“A murima wooleva, onarwa aacano.”—MASIPOSIPO 11:25.

MWAAKHALIHEKE AKINA NTOKO MUNACHUNAANYU OKHALIHIWA.

“Muweereleke achu soothesene . . . ntoko munakhwelaanyu wi awo eweerelekeeni.”—MATEU 7:12.