5. Makacamiho Enarwa Emala?

Ntakhara Heeni ti Woochuneya Osuwela Naakhulo?

Okhalano ewehereryo yawi makacamiho enahaala omala ennanikhaviherya okhalano okumi woohakalala ni ochuna okhala nthamwene a Muluku.

Wi Muupuwelele

Achu ancipale annachuna omaliha makacamiho a mulaponi. Nyenya achu hanawerya omaliha. Muthokororye sootakiherya inacharela:

Naamwi nikhuuru na ekumi niyaaka vahoolo  . . .

• Ireca sa murima, sinatepa owiipha achu ancipale.

• Ereca ya kanser ennawiipha amilyawu aachu iyaakha soothene.

• Totore David Bloom oorepa mu erevista eniichaniwa Frontiers in Immunology: “Elapo eri va yawoopiha nthowa na ireca sooraviwa, ikina ti sakhalai, ikina ivyaani nave ikina irimuchikela okhala.”

Naamwi ilapo ikina siri sooreela . . .

• Eyaakha ti eyaakha amilyawu a anamwane annakhwa, xaxaxa mu ilapo seiyo achu aryaaya oohaawaxa.

• Apilyawu a achu hanakhalano oloola wawaakhwanela ni mikhalelo oophwanelela sa esipanti.

• Amilyawu a achu haanono maahi aphaama oowurya.

Naamwi ancipale yuukhuwaka ni ophwanelela wa achu . . .

• Mu ilapo sincipale okulihiwa wa achu nivano wookhala. Mwawiiwanana ni yoolokoha ya Maloko Awiiwanana, yaale ahinuukhuwa ntakhara omaliha “hanapwacha owaniha nikacamiho nenla, naari wi hari ooreheryeya wi evoothe.”

  WI MUSUWELE SINCIPALE

  Moone exilema Omwene wa Muluku Tiheeni? mu jw.org.

Yeeyo Piipiliya onahusiheiye

Muluku onnanikhapelela.

Owo onnuukhuwa vaavaa onawooneiye achu ehooxeyaka.

“[Apwiya] hananyemula nari waacuwala oohaawa. Hanavitha ethoyi aya. Apwiya annawiiwa yaawo anawiichana.”—SALUMU 22:24.

“Wiipiwa wanyu woothene wa murima, murule wa yoowo ntakhara ti yoowo onoothokororyaani.”—1 PEDRO 5:7.

Makacamiho anahaala omala.

Piipiliya onahusiha wi moohilekela soororomeliha sa Muluku sinahaala waakhwanela.

“Muluku . . . onamvuta miithori oothene wiithoni waya. Horwa tho okhalawo okhwa, nari wunla, nari ikucho, nari wiicela, ntakhara ichu sakhalai soovira.”—WUPULULA 21:3, 4.

Muluku onahaala orehererya makacamiho a achu.

Owo onahaala weerano yeeyo moorweela wa Omwene awe, yoowo onatharihiwa Mpiipiliyani ntoko olamulelo weeparipari.

“Muluku a wirimu onarwa atikitherya omwene mukina yoowo onii ohiwerye omwariwa naari okushiwa ti maloko makina. . . . nave omwene owo otikitheriwe ti wa mahiku oothene.”—DANIYELI 2:44.