MWAHA 26
Yobu Onaroromeleya Wa Muluku
MANO munnammorela ikharari mulopwana ola awiiceliwa? Nsina nawe ti Yobi nave muthiyana owo ti mwaariye. Mano munnasuwela yeeyo onamuleeliiye Yobi? ‘O muulumele Muluku wii okhwe.’ Hinkoni noone nthowa nene onaloceliiye eyo, ni nthowa nene Yobu aahooxenyiiye vancipale.
Yobi aari muchu oororomeleya yoowo aamwiiwelela Yehova. Aakhala mu elapo ya o Uusi, vakhiviru ni Kaanani. Yehova aanamusivela vancipale Yobi, nyenya okhalavo aamwiica. Mano moomusuwela wii taani?
Aari Satana, Musaserya. Muupuweleke wii Satana ti mungelo oonanara yoowo onamwiicha Yehova. Aahiwerya omweeriha Aatamu ni Haava ohimwiiwelela Yehova, nave uupuwela oowerya weeriha wii akina oothenetho ehimwiiwelele. Nyenya mano, aahiwerya weera eyo? Hooye. Nkuupuwelani sa alopwana ni athiyana ancipale oororomeleya nihusenryaahu sa yaawo. Mano ti masina a ahayi munasuwelaanyu oromola?
Vachuli va okhwa wa Yaakopo ni Yoosefe mu Yiikuputu, Yobi aari oororomeleyaxa wa Yehova, veelapo yoothene. Yehova aahitchuna wii Satana asuwele wii hii awerye waapakiha oothene okhala oonanara, nave mwa eyo aahi: ‘Nkamoone Yobi. Nkoona mummo okhalenliiye oororomeleya wa miyo.’
‘Owo toororomeleya,’ aahaakhula Satana, ‘nthowa nawii moomureeliha nave owo okhalano ichu sincipale saphaama. Nyenya, nkamviixeryeenvoni soothene, nave owo onahaala owuulumelaani.’
Vanonto Yehova aahi: ‘Aahee. Mviixeryevo soothene. O mweerele Yobi yoonanara eri yoothene onacunaawe. Noone aariki akuulumele. Nnya ohimwiipheru.’
Voopacerya, Satana aaheriha wii alipa aawiiya yiiye imope soothene ni akamila a Yobi, ni wiipha ipucepuche sawe soothene. Vachuli vaya ahiwiipha anamwanaawe 10 aasilopwana ni aasithiyana mu echeku etokotoko. Voocarelavo, Satana aahimuruuhela Yobi erecha ela yawoopiha. Yobi aahihooxeya vancipale. Ti nthowa nene amwaariye yaamuleenlaaya wii: ‘O muulumele Muluku wii okhwe.’ Nyenya, Yobi aahikhocha weerano eyo. Yaahirwatho asinthamwene oowoka araru, emuleelaka wii owo aari akunxeene okumi woonanara. Nyenya, Yobi aahipwahiherya ororomeleya.
Ela yaahimuhakalaliha vancipale Yehova, vachuli vaya aahimureeliha Yobi, ntoko munaweryaanyu woona veerukuni va. Aahimpenuxa erechaawe. Yobu aahikhalanotho anamwane 10 ooreera, ni imope sincipale wuuluulela wiili, ipucepuche ni akamila opwaha khalayi.
Mano nyuwo munahaala wiikhalelaru ororomeleya wa Yehova, hiiha ntoko Yobi? Mwakhala hiihaa, Muluku onahaala wooreelihaanitho. Munanwerya okhala ni okumi wawiikhalelaru, vaavaa elapo enahaalaya okhala yooreeraxa ntoko emaca ya Eeteni.
Yobi 1:1-22; 2:1-13; 42:10-17.