MWAHA 37
Mukocha Wa Malapelelo
MANO moosuwela yootekiwa ela? Ti mukocha wa vameekhaaya ntakhara a olapela wa Yehova. Onniichaniwatho wii ti tabernaakulu. Achu yaahimmaliha omuteka eyaakha emoha vachuli va ookhuma waya o aYiikuputu. Mano moomusuwela yoowo aarumme omuteka?
Aari Yehova. Vavaa Moose aariiye Omwaako wa Sinai, Yehova aahimuleela wii amuteke. Anaphwanela omuteka nimukhalelo wawii akhweyeke omukhula. Hiihaanto ixiri sawe saahaala iweryeke oteexiwa oya nipuro nikina ni omulupanyatho. Hiihaa, vavaa aIsarayeli yaathaamaaya nipuro nla ni nla mutakhwani, yaaniikuxerya tabernaakuluuwo.
Mpuwa mmo mwa miruku ekhaaniiyo, omakuchuwelo wa mukocha, nyuwo munnawerya woona ekaxa. Eniichaniwa wii ekaxa ya nlakano. Yookhalano angelo eeli, nari akerubi a miivira, mmoha va muthoko ori woothene. Muluku aahirepatho Malamulo Khumi awo mmaluku meeli oophataateya, nthowa nawii Moose aahipwexa oopaceryaawo. Nave malukwaawo yaakhapeleliwa mukaxa ya nlakano. Navetho eparatho ya maana. Mano munnupuwela wii maana tiheeni?
Aaroni munneeni a Moose, aahithanliwa ti Yehova wii akhale mutokweene a alipa-ephepa. Owo aanaahoolela achu mu olapela wa Yehova, navetho anamwanaawe yaari alipa-ephepa.
Vanonto, nkawehani mu esala etokotoko eyo ya mukocha. Ti etokotokoxa wuuluulela wiili moohiyana ni eruku ekhaaniiyo. Mano munnoona ekaxa ekhaaniiyo onchuwavo mwiixi? Ti eyuupo yeephepa vavaa alipa-ephepa anapahaayavo echu ya muhiriri waphaama, waweeriwa soochuwiha. Vanonto, wookhalavotho wawiiyaathivo onyaari ni onyaari muthanu na mwiili. Nave echu yaneeraru vasalavaa ti emeesa. Vameesavaa orivo iphaawu 12.
Vaate va tabernaakulu wahikhalavo epasiya etokotoko yoosareya maahi. Alipa-ephepa yaanyawa vavaa. Waahikhalavotho eyuupo etokotoko yeephepa. Vavaa waanapahiwavo inama sawiiphiwa ntoko yooveleela wa Yehova. Mukocha ola waari veeri, nave aIsarayeli yaakhala mmikochani mwaya moorukurerya mukochoowo.
Mukwaha 25:8-40; 26:1-37; 27:1-8; 28:1; 30:1-10, 17-21; 34:1, 2; aHebri 9:1-5.