MWAHA 45
Olapuwa Muhice Wa Yoortano
NKAWOONEENI! AIsarayeli elapuwaka Muhice wa Yoortano! Nyenya mano maahi ari woowi? Okhala wii mu elukuluku yeela vayaakhani epula ennatepa orupa, muhicoowo voohilekela waari woosareyeene. Nyenya vano, maahi aachawa! Nave aIsarayeli analapuwa vachaya yawuuma, ntoko va Eniya Yooxeerya! Mano maahi oothene aakele woowi? Hinkoni noone.
Vavaa yaaphiyalaaya elukuluku yawii aIsarayeli elapuwe Muhice wa Yoortano, Yehova aahilamula wii Yosua aaleele achu: ‘Alipa ephepa annaphwanela okuxa ekaxa ya nlakano nave ehoole. Vavaa eniiryaaya enyikale maahi Mmuhiceni wa Yoortano, maahi awo anahaala weemela ochimaka.’
Hiihaa, alipa-ephepa yaahikuxa ekaxa ya nlakano eteexa vahoolo va achwaawo. Voophiya o Yoortano yaahivolowa mmaahini. Ala yaari akuru ni awiixa. Nyenya, inaani saya itannyakaru maahi awo, yaaheemela ochimaka! Yotikiniha! Muhice vasulu, Yehova aari eemenxeene maahi. Hiihaanto, mu elukuluku yavakhaani, himwaarimomo maahi mmuhiceni mmo!
Alipa ephepa, ni ekaxa ya nlakano, yaahiya veeri va muhice wawuuma owo. Mano munna werya owoona veerukuni va? Yeemenleene vaavale, aIsarayeli oothene yaahilapuwa Muhice wa Yoortano vachaya yawuuma!
Emanleene olapuwa oothene, Yehova aahimulamula Yosua waaleela alopwana 12 akuru: ‘Volowani mmuhiceni, vavaa orivo alipa ephepa ni ekaxa ya nlakano. Murole maluku 12 nave muukele vavaa munahaalaanyu okonavo ohiyu. Vanonto, omwaahiyu, anamwanaanyu yookohaani volocha sa yootaphulela ya malukwaawo, munnaphwanela waathoriherya wii maahi yaaheemela vavaa ekaxa ya nlakano ya Yehova yaamulapunwaaya Yoortano. Malukwaawo anahaala okhala yawuupuxerya ya yotikiniheeyo!’ Yosua aahikuhatho maluku 12 vavaa alipa ephepa yaaryaayavo mmuhiceni mmo.
Vanonto Yosuwa aahi wa alipa ephepa ari ni ekaxa ya nlakano: ‘Vinyammoni mu Yoortano.’ Erikinvinyarumo, muhicoowo waakookela ochimaka.
Yosuwa 3:1-17; 4:1-18.