MWAHA 47
Mulipa Aawiiya Mu Isarayeli
NKOONANI yeeyo mulopwanoowo onathipeliiye m’mukochani mwawe! Yoowara yooreera, mwiithi wa mivira ni ikhorowa sa eparata. Oruunhe mweepooma ya Yeriko. Nyenya mano, ti heni yaaphwanela weeriwa ni ichu sa o Yeriko? Mano munnupuwela?
Saaphwanelela opahuliwa, nave mivira ni eparata saaphwanela oveleeliwa omuhakhu wa tabernaakulu a Yehova. Vawi-hiihaa achwaala hiyaamwiiwelenle Muluku. Yaahiya yeeyo yaari ya Muluku. Nsina na mulopwanoowo ti Akani, nave awo oriiyeno ti avachokoni vawe. Hinkoni noone yeeyo yeerenyee.
Akani aiiyaleene ichu sene hiiha, Yosua aahaalamulela alopwana amoori owana ni epooma ya Ai. Nyenya, awo yaahipwahiwa. Akina yaahiiphiwa nave ancipale a yaawo yaahichawa. Yosua aahithanana vancipale. Aahuuramihela ethoi awe vathi nave aahivekela wa Yehova: ‘Mano ntakhara heni munihinyaanyu wii ela eneereele?’
Yehova aahaakhula: ‘Nkavinya! Isarayeli oocheka. Aakuxe ichu hiiho saaphwanela opahuliwa naari okerihiwa o tabernaakulu ya Yehova. Ahiya yoowara yooreera, ni ovitha. Nkirwa kooreelihani nyuwo ophiyerya mpahunleene eyo, navetho ni yooweene okunxe ichu sene hiiha.’ Yehova aahi wii onahaala wooniherya wii mulopwana oonanaroowo taani.
Yosua aahaathukumanya achu oothene nave Yehova aahimuthoonya mulopwana oonanaroowo, Akani. Akani aahi: ‘Koocheka. Kaahoona yookhunela yooreera, mwiithi wa mivira ni ikhorowa sa eparata. Miyo kaahitchuna vancipale iho, nave kahikuxa. Kithipenle mmukochani mwaka.’
Vavaa ichu iho saaphwanyiwaaya ni oveleeliwa wa Yosua, owo aahi wa Akani: ‘Mano ntakhara heni oniruuhenlaawe sookachamiha? Vanonto, Yehova onahaala wooruuhela sookachamiha!’ Vaavanto achu othenaawo yaahimvonya maluku Akani ni echokwaawe, ophiyerya okhwa. Mano yeeyo henanithoonyerya wii hinnaphwanelaru okuxa echu yeeyo ehiri yawiiu?
Vachuli vaya, Isarayeli aahiyatho owana ni Ai. Va ekwaha ela, Yehova aahaakhaviherya achwaawe nave yaahipwaha.
Yosuwa 7:1-26; 8:1-29.