MWAHA 50
Athiyana Eeli Oolipa Murima
VAVAA aIsarayeli yaakhalaaya mu sokachamiha, yaanakhuwela wa Yehova. Owo aanawaakhula mwa waavaha ahooleli oolipa murima, wii yaakhaviherye. Piipiliya onawiira alipa oothoriha. Yosua aari mulipa oothoriha oopacerya, nave akina a vachuli vawe, yiichaniwa Otiniyeli, Ehudi ni Samagara. Nyenya, achu eeli yaamukhavihenrye Isarayeli yaari athiyana awiichaniwa Teepora ni Yaeli.
Teepora aari mulipa a miririmu mwaamuthiyana. Yehova aanamuleela sa muhoolo, nave owo aanaasuweliha achu. Teepora aaritho mulipa oothoriha mwaamuthiyana. Akiraathi vathi va murumo, mwiiruwani, nave achu yaanarwa wa yoowo wii ekhaviheryiwe mu sookachamiha saya.
Mu elukuluku yeele Yapini aari mwene o’Kaanani. Owo aarino ikaaro 900 sakhocho. Alipa akhochwaawe yaari oolipaxa, ophiyerya wii aIsarayeli ancipale yaahaakeelelihiwa okhala arummwa a Yapini. Muhooleli a alipa akhoco a Mwene Yapini aari Sisera.
Va nihiku nikina, Teepora aahimwiichaniha Mulipa Oothoriha Baraki, nave aahi wa yoowo: ‘Yehova oriye: “Waakuxe alopwana 10,000 nave oyeno Omwaakoni wa Tapora. Kinahaala wooruuhela weyo Sisera. Nave kinahaala woovaha opwaha wa owo ni alipa akhochwaawe.”’
Baraki aahi wa Teepora: ‘Miyo kinahaala oyawo wakhala wii nyuwo moochaanana ni miyo.’ Teepora aahichaananano, nyenya aahi wa Baraki: ‘Hiwaakhelaa othamaliwa ntakhara a opwaha, nthowa nawii Yehova onahaala omveleela Sisera mmatatani mwa muthiyana.’ Nave ti yeeyo yeerenyee.
Baraki aahikhuruwa Omwaako wa Tapora, oya okumana ni asurutaato a Sisera. Mootutuxa, Yehova aahiruha maahi, nave asurutaatu ancipale amwiicani awo yaahimiryiwa ti maahi. Nyenya, Sisera aahikhuruwa mu ekaaro awe achawa.
Ovinrevo elukuluku, Sisera aahiphiya o mukochani wa Yaeli. Owo aahimwiichana wii avolowe nave ahimvaha mukaka. Ela yaahimweeriha wii akone. Vanonto Yaeli aahikuxa ekhomo ya mukocha nave aahikhomela va muru wa mulopwana oonanara owo. Vachuli vaya, voophiya Baraki, owo aahimooniherya Sisera ookhweene! Hiihaa, masu a Teepora yaahaakhwaniheriwa.
Vookuchula vaya, Mwene Yapini aahiiphiwatho, nave aIsarayeli yaahikhala mmureceleni mu elukuluku yamoori.
Amuthoriha 2:14-22; 4:1-24; 5:1-31.