MWAHA 51
Rute Ni Naomi
MPIIPILIYANI wookhalamo liivuru awiichaniwa Rute. Ti mwaha wa echoko emoha yeeyo yaakhanlevo mu elukuluku yeeyo Isarayeli aariiye ni alipa oothoriha. Rute aari mwali a elapo ya Mowaape, owo haari a nloko na Muluku, Isarayeli. Nyenya, vavaa aahusenryiiye sa Muluku eeparipari Yehova, aahimusivela vancipale. Naomi aari muthiyana awuuluvala, yoowo aamukhavihenrye Rute osuwela sa Yehova.
Naomi aari musinaIsarayeli. Owo, aiyawe ni anamwanaaya eeli aasilopwana yaahithaamela we elapo ya Mowaape, vavaa yoolya yaaryaaya yavakhaani mu Isarayeli. Vaavanto, aiyawe a Naomi yaahikhwa. Anamwane a Naomi vachuli vaya yaahaathela asimwali asinaMowape, awiichaniwa Rute ni Orpa. Nyenya, iyaakha 10 vachuli vaya, anamwane eeli awo a Naomi yaahikhwa. Hainto mummo Naomi ni asimwali awo yaathananenlaaya! Mano vanonto Naomi aahala weera eheni?
Nihiku nikina, Naomi aahithanla okookela owannyawe wenexa o Isarayeli. Rute ni Orpa yaahichuna okhala ni yoowo, nave va nthowa nla yaahimuhoola. Nyenya, yeencheene ekuluchu muramphani mmo, Naomi aahi wa asimwali awo: ‘Mukookele owannyu nave mwakhale ni ameyanyu.’
Naomi aahaanuula asimwali awo mwa waalaanya. Awo yaahipacerya wunla, nthowa nawii yanatepa omusivela Naomi. Yaahi: ‘Hooye! Nnarowa ni nyuwo owannyu.’ Naomi aahaakhula ii: ‘Munnaphwanela mukooke anaaka. Onahaala okhala waphaama okhala owaani.’ Mwawihiihaa Orpa aahikooka. Nyenya, Rute haakoonke.
Naomi aahirukunuwela wa owo nave aahi: ‘Orpa opwaha. Okookele owaani vamoha ni owo.’ Nyenya, Rute aahaakhula: ‘Muhikeerihe wii koohiyeeni nyuwo! Kihiyeeni nrowe vamoha. Weiwo nyuwo muniryaanyu muyewo, miyo’tho kinahaala oya weiwo, nave kinahaala okhalaka weiwo nyuwo muniiryaanyu mukhalekewo. Achu anyu anahaala okhala achwaaka, nave Muluku anyu onahaala okhala Muluku aka. Weiwo nyuwo muniiryaanyu mukhwelewo, miyo’tho kinahaala okhwela weiwo, nave kinahaala ovithiwa weiwo.’ Vavaa Rute aalonchiiye hiihaa, Naomi haavyamvyetho omukookiherya owannyawe.
Vookuchula vaya, yaahiphiya o Isarayeli. Yaahikhala weiwo. Rute mwawakuveya aahiya oya ophara muteko mmacani, nthowa nawii yaari elukuluku ya ohachiwa wa cevada. Mulopwana mmoha awiichaniwa Boazi aahimweemererya omuhacha cevada mmacani mwawe. Mano munasuwela wii amannya a Boazi yaari taani? Aari Rahabi wa epooma ya Yeriko.
Nihiku nikina Boazi aahi wa Rute: ‘Miyo koosuwela soothene sa weyo, ni sa mummo wakhalenlaawe aphaama wa Naomi. Koosuwela wii wohaahiya atiithi ni amayi ni elapwaaenexa, nave woorwa okhala veeri va achu yaawo wahaasuwenlaawe voopacerya vene. Yehova akhale aphaama wa weyo!’
Rute aahaakhula: ‘Apwiya mwa aphaama wa miyo. Moheeriha wii miyo koone phaama, vooloca mwawihiihaa ni miyo.’ Boazi aahimuchuna vancipale Rute, nave haalekenle vancipale ophiyerya amuthenleene. Ela yaahimuhakalaliha vancipale Naomi! Hiihaanto, Naomi aahihakalala opwahererya, vaavaa Rute ni Boazi yaamuyanraaya mwanaya opacerya, awiichaniwa Obede. Woovira wa elukuluku, Obede aahikhala ataataawe a Tavite sa yoowo nnahaalaahu ohuserya sincipale.
Liivuru a m’Piipiliyani a Rute.