MWAHA 59
Ntakhara Heeni Tavite Aanaphwanela Ochawa
VACHULI vaya Tavite amwiiphaleene Goliyati, Abineri, muhooleli a muloko wakhoco wa Isarayeli, aahimukuxerya wa Saawulu. Owo aahihakalala ni Tavite. Aahimpaka okhala muhooleli m’mulokoni wakhoco nave aahimukuxerya ompa ya mwene.
Vachuli vaya, muloko wakhocoowo okookaka wuuwanani ni asinaFilisti, athiyana yaahiipa: ‘Saawulu aahiwiipha masana masaneene, nyenya Tavite ahiwiipha masana masaneene waakulela masana masaneene.’ Saawulu aahikhala ni ehache. Nyenya mwaana a Saawulu Yonatani, hakhanle ni ehache. Aanamusivela vancipale Tavite, nave owotho aanamusivela ola. Oopiili awo yaahilakana okhalaru asinthamwene.
Tavite aanamoopa phaama mukaripo nave Saawulu aanasiveliwa ni machipo awe. Nihiku nikina, ehache ya Saawulu yaahimutuunyerya weerano echu yawoopiha. Vavaa Tavite aamoopiiye mukaripo, Saawulu aahimvonyerya nivaka, ariki: ‘Kinahaala omuhoma Tavite vaxirini!’ Nyenya, Tavite aahirapela. Vachuli vaya, Saawulu aaheereryatho omuhoma Tavite nnivaka. Hiihaa Tavite aahoona wii aanaphwanela wiithokororya.
Mano munnupuwela nlakano naweeriwa ni Saawulu? Aariye wii aahala omutheliha mwanawe wa mulopwana yoowo ii amwiiphe Goliyati. Vookuchula vaya, Saawulu aahi wa Tavite wii anwerya omukuxa mwanawe mwaamuthiyana Mikala, otorokana ni owiipha asinaFilisti 100. Nkuupuwelani pahiru! Saawulu awehererya chiryene wii asinaFilisti yaahaala omwiipha Tavite. Nyenya hiyeenreno, nave Saawulu anaphwanela omveleela mwanawe okhala mwaariye a Tavite.
Nihiku nikina, Saawulu aahimuleela Yonatani ni arummwa oothene wii aachuna omwiipha Tavite. Yonatani aahi wa atiithinya: ‘Muhimweerele yoonanara Tavite. Owo hantonkoru oweerelaani yoonanara. Eri yoothene enriiye yaari yookhaviherya wa nyuwo. Aahiveleela okumiyaawe wii amwiiphe Goliyati, nave nyuwo mwaahihakalalano.’
Saawulu aahilakana ohimvulalihatho Tavite. Tavite aahikooka nave aahimurumeela Saawulu, hiihaa ntoko wuupaceryani. Nihiku nikina, vavaa Tavite amoopiiye mukaripo, Saawulu aahivonyatho nivaka wa Tavite. Tavite aahirapela nave nivaka naahihoma exiri. Yaari ekwaha yaneeraru! Vanonto Tavite aahisuwela wii aanaphwanela ochawa.
Ohiyu, Tavite aahirowa owannyawe. Nyenya Saawulu aahaarumiha achu wii yamwiiphe. Mikala aahisuwela sa eyo. Hiihaa, owo aahi wa Tavite: ‘Waahichawa hiihaano vaava, omeelo onahaala okhwa.’ Ohiyeene yoole, Mikala aahimukhaviherya Tavite ochawa mu ovira vaxanelani. Mu iyaakha thanu napiili, Tavite aakhala iipithaka mmapuroni ohiyana-hiyana, wii Saawulu ahimphwanye.
1 Samuwele 18:1-30; 19:1-18.