MWAHA 71
Muluku Onnalakana Sa Paradaiso
ERUKU ela enamuthoonyerya paradaiso, akhweya ntoko mummo Muluku amuthoonyenryiiye mulipa a miririmu Yesaya. Ola aakhanlevo elukuluku vakhaani vachuli va Yona.
Paradaiso tiwii “emaca” nari “parque.” Mano sinnawuupuxeryaani nyuwo echu yeeyo nonnaahu mu liivuru ola? Mano henaphwanaphwana ni emaca yooreera yeeyo Yehova Muluku aapankiiye ntakhara a Aatamu ni Haava? Mano elapo yavathi nihiku nikina enamukhala paradaiso?
Yehova aahimuruma mulipa a miririmu awe Yesaya orepa vooloca sa paradaiso ahiihano yoowo onahaala okhalavo ntakhara achu a Muluku. Aahi: ‘Miichi ni ipucepuche inahaala okhalelaka vamoha mmureceleni. Asaana amope ni asimwaco anahaala weecelaka vamoha, nave anamwane tanii yaahooleleke. Nari mwaana halummwaa, akhala wii onnathela vakhiviru ni enowa yamuhokhoroko.’
‘Ela herwa yeereya,’ ancipale anahaala wii hiihaa. ‘Waahikhalaruvo nave onahaala okhalaruvo sookachamiha veelaponi.’ Nyenya, nkuupuwelani: Mano Muluku aavanhe Aatamu ni Haava vaate va muloko taani?
Muluku aakunhe Aatamu ni Haava mparadaiso. Awo yaahoocheela vate vaya vaphaama, yaahuuluvala ni okhwa nthowa noohimwiiwelela Muluku. Muluku onnalakana waavaha yaawo anasivela ichu imoha-moha seiyo Aatamu ni Haava yoochenlaaya.
Mu paradaiso ahiihano onahaala okhalavo, haavo onii ampahule naari omunanariha. Onahaala okhalavo murechele wawaakhwanela. Oothene anahaala okhala akumi ni oohakalala. Onahaala okhala ntoko mummo Muluku aachunenliiye wuupaceryani. Vachuli vaya, nnahaala osuwela mummo Muluku onahaaliiye werelano.
Yesaya 11:6-9; Yawupulula 21:3, 4.