MWAHA 72
Muluku Onnamukhaviherya Hezekiya
MANO munnasuwela nthowa nene mulopwanoola onavekeleliiye wa Yehova? Mano nthowa xeeni orihenliiye ikarata iho vahoolo va eyuupo yeephepa ya Yehova? Mulopwanoola ti Hezekiya. Owo ti mwene a mahimo meeli a weiwo onarwawo echeku ya mirupi a Isarayeli. Nave ori ya sookachamiha sitokotoko. Mano ntakhara heni?
Nthowa nawii muloko wakhoco wa oAsiiriya weera opahunleene mahimo 10 a weiwo onayawo echeku ya mirupi. Yehova aahihiya wii ela yeereye, nthowa nawii yaari achu oonanaraxa. Nave, vanonto, miloko yakhoco ya oAsiiriya yaahirwa owana ni omwene wa mahimo meeli.
Mwene a o Asiiriya aahirumiha ikaarata wa Mwene Hezekiya. Ti ikaarata seiyo Hezekiya aavelenliiye wa Muluku. Iho saamunyemula Yehova nave saamulamula Hezekiya ohiya. Va nthowa nla, Hezekiya aahivekela: ‘Nyuwo Yehova, nivuluxeeni wa mwene o Asiiriya. Hiihaa, maloko oothene anahaala osuwela wii Yehova pahiru ti Muluku.’ Mano Yehova aahimwiiwa Hezekiya?
Hezekiya aari mwene aphaama. Haari ntoko mamwene oonanara a omwene wa mahimo 10 a Isarayeli, nari ntoko atiithinya oonanara awo Ahaze. Aanaiwelela phaameene malamulo oothene a Yehova. Va nthowa nla, vavaa Hezekiya aamalinhiiye ovekela, mulipa a miririmu Yesaya aahimurumihela michaka ela ya Yehova: ‘Mwene a o Asiiriya havolowaa o Yerusalemu. Haavo mmoharu a asurutatu awe onii aphiye vakhiviru vawe. Herwa evonya muchupa mmoharu moovaanyihana ni epooma eyo.’
Nkoonani eruku eyo va epaaxina ela. Mano munnasuwela wii asurutatu oothene okhwa ala taani? AsinAsiiriya. Yehova aahimurumiha mungelo awe, nave ola aahiwiipha asinAsiiriya 185,000 mu ohiyu omoharu pahi. Va nthowa nla, mwene o Asiiriya aahikookela owannyawe.
Omwene wa mahimo meeli waahivuluxiwa nave achu yaahikhala ni murechele muneelukuluku. Nyenya, vookhwa Hezekiya, mwanawe Manaase aahikhala mwene. Ola, ni mwanawe Amooni, oothene yaari mamwene oonanara vancipale. Elapo yaahikookela oosareya ni ipahu ni nlala. Mwene Amooni ahiiphiwa ti arummwaawe, nave mwanawe Yosiya aahikhala mwene a omwene wa mahimo meeli.
2 Mamwene 18:1-36; 19:1-37; 21:1-25.