MWAHA 77
Awo Hiyuuramme
MUNNUUPUWELA okhala mwiwaleene olochiwa wa anaamiravo araru ala? Aayi, ti asinthamwene araru a Daniyeli, yaawo yahaachunne olya yahaari yaphaama wa yaawo. AsinaPaapulu yawiichana okhala Sadraki, Mesaki ni Abedinego. Nyenya nkawooneeni yaawo vano. Mano ntakhara heni awo ahinuuramaaya, ntoko akinaawo, vamiithoni va yophwaniherya etokotoko ela? Hinkoni noone.
Mano munnupuwela sa malamulo yaawo mwaneene Yehova aarempiiye, awiichaniwa Malamulo Khumi? Noopacerya na yaawo naari: ‘Himunaphwanela omulapela muluku mukina naariru, nyenya miyo mekhaka.’ Anaamiravo ala va, aniiwelela nlamulo nene nenlo, naari ohiri wookhweya.
Nabukodonosor, mwene o Paapulu, aahiwiichana achu ancipale oochuneya wii echichimihe yophwaniherya yeela eemenxiiye. Aahi wa achu oothenaawo: ‘Vavaa muniiwaanyu oruma wa mapeka, wa mikaripo ni sawoopa sikina, munnaphwanela wuurama ni olapela yoophwaniherya ela ya miivira. Yoowo onii ahuurame ni olapela, mwawaakuveya onahaala ovonyeryiwa mu chukuchani amooro.’
Vavaa Nabukodonosor aasuwenliiye wii Sadraki, Mesaki ni Abedinego hiyuuramme, aahinanariwa. Aahilamula oruuheliwa. Aavaha ekari ekina yawii yuurame. Nyenya, anaamiravo awo yaaroromela mwa Yehova. ‘Muluku ahu, yoowo nnamurumeelaahu, onnawerya onivuluxa,’ yaahi wa Nabukodonosor. ‘Nyenya, naari ahinivuluxe, hinuurama vamiithoni va yoophwaniheryaanyu.’
Vawiiwa eyo, Nabukodonosor aahipwahererya onanariwa. Vavaa wahikhalavo chukucha nave owo aahilamula: ‘Mmutetheeryele chukuchoowo wuuluulela othanu napiili!’ Vachuli vaya, aahilamula wii alopwana akuru mwa alipa akhoco awe emmake Sadraki, Mesaki ni Abedinego, ni waavonyerya mu chukuchani mmo. Ola aari oviha vancipale, ophiyerya owiipha alopwana akuru awo ni makalume. Nyenya mano tiheeni yeeyo yeerenyee wa anamiravo araru awo yaavonyeryiwemo?
Mwene aahivarerya mpuwa mwa chukuchoowo nave aahoova. Akoha. ‘Mano hinaamanke alopwana araru ni waavonyerya mu chukucha amooroowo?’
Arummwaawe yaahaakhula: ‘Aayi tihiiha.’
‘Nyenya, miyo kinawoona alopwana axexe yeecaka mmooroni mmo,’ aahi yoowo. ‘Hamakiwe nave mooro honaaviviha. Nave aneexexe owo ntoko muluku.’ Nave mwene aahiphiya vakhiviruxa ni chukuchoowo nave aahikhuwela: ‘Sadraki! Mesaki! Abedinego! Khumani, nyuwo, arummwa a Muluku Awiirimurimu!’
Vavaa yaakhumalaaya, oothene yaahiwerya woona wii hiyaaphorenye. Vanonto mwene aahi: ‘Achichimihiwe Muluku a Sadraki, Mesaki ni Abedinego! Owo oomuruma mungelo awe nave ohaavuluxa, ntakhara wii hiyuuramme naariru omulapela muluku mukina, nyenya awayaru.’
Mano kaahi yootakiherya ya ororomeleya wa Yehova, nnaphwanelaahu ochara?
Mukwaha 20:3; Daniyeli 3:1-30.