MWAHA 78
Yoorempwa Vaxiriniiyo
MANO enneereya va tiheeni? Orivo efesta etokotoko. Mwene o Paapulu aahaawompa achu oochuneya masanaru khumi. Yaapharihela muteko ikahi sa miivira ni parata, ni ipasiya saakuxiwe mu empa ya Yehova o Yerusalemu. Nyenya, mootutuxa, saahikhumelela ikatha sa ntata namulopwana nave saapacerya orepa vaxirini. Oothene yaahoova.
Belisazara, musulwawe a Nabukodonosor taari mwene. Owo aahilamula wiichaniwa alipa amiruku awe. ‘Yoowo onii asuwele waalakhanya yoorempwa ela ni okithoriherya yootaphulelaaya,’ aahi mwenoowo, ‘onahaala waakhela samahala sincipale nave onahaala okhala olamulela aneeraru oochuneyaxa mu omwene.’ Nyenya, haavovo mwa alipa amiruku awo aasuwenleno waalakhanya yoorempwa vaxirini eyo, naariru oloca yootaphulelaaya.
Amannya a mwene yaahiiwa onyakula nave yaahirwa va sala yoolyelavo. ‘Ohoove,’ awo yaahi wa mwene owo. ‘Okhalavo mulopwana mmoha, mu omwene anyu, yoowo onasuwela miluku yaweela. Vavaa atatanyu a Nabukodonosor yaaryaaya mwene, awo yaahimpaka okhala muhooleli a alipa a miruku oothene. Oniichaniwa Daniyeli. Mmwiichanihe, nave owo onahaala wooleelaani yeeyo soothene iha inataphulelaaya.’
Mwawaakuveya yaahimuruuhela Daniyeli. Akhochaka yamahala eri yoothene, Daniyeli aahipacerya oloca nthowa nene Yehova emaara ekina aamviihaliiye Nabukodonosor, atatawe a Belisazara, voomweneni. ‘Owo aari awiirumiha,’ aahi Danieli. ‘Nave Yehova aahimulaka.’
‘Nyenya nyuwo,’ aahi Daniyeli wa Belisazara, ‘mwanasuwela yeeyo yeerenyee wa yoowo, nyenya mwaahikhala awiirumihaxa ntoko Nabukodonosor. Nyuwo mwaahilamula oruuheliwa ikahi ni ipasiya sa mu empa ya Yehova nave mwaapharihela muteko owuryeryamo. Nyuwo mwaachichimiha miluku soopakiwa sa miri ni maluku, nave himwaamuchichiminhe Mpatuxaahu Mutokotoko owo. Va nthowa nla, Muluku oolamula ntata nlo orepa masu ala.’
‘Waarempwe mwawihiihaa,’ aahi Daniyeli: ‘MENE, MENE, TEQUEL ni PARSIM.’
‘MENE ontaphulela wii Muluku ohaalakhanyerya mahiku a omwene yoowo nyuwo muryaanyuno nave onahaala omaliha. TEQUEL ontaphulela wii nyuwo moheryiwa ni ophwanyiwa muhikhanleno esisapo. PARSIM ontaphulela wii omwenaanyu onahaala oveleeliwa wa aMedi ni aPeresi.’
Daniyeli arikimulocaru hiihaa, aMedi ni aPeresi yaahipacerya omvinyerya Paapulu. Yaahikuxa epooma eyo nave yaahimwiipha Belisazara. Yoorempwa vaxiriniiyo yaahaakhwaniheryiwa ohiyu yoole! Nyenya, mano tiheninto yaahaala weereya wa Isarayeli? Nnahaala woona vachuli vaya, nyenya voopacerya hinkoni noone yeeyo yeerenyee wa Daniyeli.
Daniyeli 5:1-31.