MWAHA 87
Mwanoowo Yesu Mu Empa Ya Muluku
NKAMOONENI mwanoowo onaloca ni asiitokwene awo. Awo ti alipa ohusiha mu empa ya Muluku o Yerusalemu. Nave mwanoowo ti Yesu. Ohinnuwa vancipale. Orino vano iyaakha 12.
Alipa ohusiha awo yaahitikhina omoona Yesu asuwelaka vancipale vooloca sa Muluku ni ichu soorempwa m’Piipiliyani. Nyenya, mano ntakhara heni Yoosefe ni Mariya ahiryaaya vaava? Mano ari woowi? Hinkoni noone.
Muyakha ni muyakha, Yoosefe anakuxerya echoko awe o Yerusalemu, ntakhara a efesta yavamekhaya yawiichaniwa Paskha. Waari mukwaha woorekama ovinyerya o Nazarete oya o Yerusalemu. Haavovo aarinono ekaaro, nari khampoi haarivovo. Hisaarivovo mu elukulukweene yeele. Ancipale yeeca ni manaani, nave yaamaliha mahiku mararu wii ephiye o Yerusalemu.
Vano Yoosefe eera arinonweene echoko etokotoko. Hiihaa, yaanaphwanela wathokororyaka asinneeni aasilopwana ni aasithiyana ooyeveelavo ompwaha Yesu. Aahee, mu eyaakha yeele, Yoosefe ni Mariya yaahichimula ni anamwanaaya orowaka o Nazarete. Yuupuwela wii Yesu ori ni a vamukwahani akina. Nyenya, waaxekuwalaaya, vavaa yichuuwalaaya, hiyaamphwannye Yesu. Yaahimwaavyavya variyari va amusi ni asinthamwene, nyenya hiyaamphwannye! Va nthowa nenla, yaahikookela o Yerusalemu wii yamwaavyavye weiwo.
Yaahimphwanya Yesu ni alipa ohusiha awo. Owo aanaawiriyana nave aanaakoha makoho. Oothene yaahitikhina woona mummo Yesu aakhalenliiye a miruku. Nyenya Mariya aahi: ‘Mwaana we, onerenleheni yawihiihaa? Atiithaa ni miyo nari a wipiwa murima.’
‘Nthowa xeeni wachuneleyaya okavyavya?’ aahaakhula Yesu. ‘Hamunasuwela wii onnakiphwanela Miyo wi kikhale mu empa ya Atiithaaka?’
Aayi, Yesu aasiveliwa okhala weiwo aweryiiye ohuseryawo vooloca sa Muluku. Mano hinnaphwanela okhalatho hiihaa? Voorowa o Nazarete, Yesu aanaya omithukumanoni ya mathamalelo murunku ni murunku. Vookhala wii aanawiriyana elukuluku yoothene, aahihuserya vancipale sa Piipiliya. Hinkoni nikhale ntoko Yesu ni weerano ntoko yoowo.
Luka 2:41-52; Mateyu 13:53-56.