MWAHA 88
Yohane Onnampatisa Yesu
MUNNOONA epompa eyo enakhuruwela vamuruni va mulopwanoowo. Owo ti Yesu. Orino vano iyaakha 30 sa oyariwa wawe. Nave mulopwanoowo oriiyeno vamoha ti Yohane. Noohuserya echu vooloca sa yoowo. Mano munnupuwela sa vavaa Mariya aakeliiye omuxekurya munneeni Elisabeti nave mwaana mmirimani mwa Elisabeti achupha moohakalala? Mwaneene yoole eera ahiyariwe aari Yohane. Nyenya mano tiheeni yeeyo Yohane ni Yesu aneeraaya?
Yohane orimmaliharu wene omuneeliha Yesu mmaahini a mmuhiceni wa Yoortano. Muchunto onapatisiwa mwawihiihaa. Voopacerya, owo onaneelihiwa mmaahini, nave vachuli vaya aviihiwamo. Vookhala wii Yohane eerano yeeyo, iichaniwa Yohane Mpatisi. Nyenya mano, ntakhara heni ampatinsiiye Yesu?
Ahe, Yohane aaheerano ela nthowa nawii Yesu aahirwa oveka wii Yohane ampatise. Yohane aapatisa yaawo yaachuna othoonyerya wii anniikhupanyerya nthowa na ichu soonanara seiyo yeenraaya. Nyenya mano Yesu anaphwanela wikhupanyerya ntakhara a yoonanara eri yoothene enriiye? Hooye, owo haantonko weera eri yoothene yoonanara, nthowa na okhala Mwaana a Muluku a wirimu. Hiihaa, aahiveka wii Yohane ampatise ntakhara a nthowa nikina. Hinkoni noone nthowa nene.
Yesu ahaakumve oya wa Yohane, owo aari kalapinteero. Kalapinteero ti muchu yoowo onnapaka ichu sa ithaapwa, ntoko imesa, ikatera ni mipacho. Yoosefe iyawe a Mariya aari kalapinteero, nave aahimuhusiha mutekoowo Yesu. Nyenya Yehova haamuruminhe Mwanawe veelaponi yavathi wii akhale kalapinteero. Aachunne wii owo aphare muteko wa vameekhaya, nave yaahiphiya elukuluku yawii Yesu apacerye mutekoowo. Hiihaa, wii athoonyerye wii aarweenle weerano yochuna ya Atiithinya, Yesu aahiveka wii Yohane ampatise. Mano Muluku aahihakalala ni yeeyo?
Aayi, nthowa nawii mwawaakuveya vachuli va ookhuma wa Yesu mmaahini, nsu noorwela wirimu naahi: ‘Ola ti Mwanaka, mwa yoowo kinnahakalala.’ Navetho erimu yaakhanle ntoko enamuhuleya nave epompa enakhumamo ekhuruwelaka wa Yesu. Nyenya hiyaari epompeenexa. Nnya yaakhala ntoko yeeyo. Chiryene, waari munepa waweela wa Muluku.
Vanonto Yesu aahikhala ni sincipale sawii uupuwelele, nave va nthowa nla aahirowa vanipuroni vamekheiye, mmahiku 40. Weiwo Satana aahimphiyerya yoowo. Satana aahimweha ikwaha raru omutumererya Yesu weerano echu moovanyihana ni malamulo a Muluku. Nyenya Yesu heenreno.
Vanonto Yesu aahikookawo nave aahaasuwela alopwana akina yaawo yaakhanle omucharaawe opacerya nari oohuseryaawe. Yiichaniwa Andreya, Petro (awiichaniwatho Simoni), Filipo ni Natanayeli (aweriwatho Bartolomeyo). Yesu ni oohuserya yaala yaahirowa o Galileya. Weiwo, yaaheemela o epoomani ya wa Natanayeli, Kana. Vanonto Yesu aahirowa o efesta ya othela nave aahipaka yootikiniha yoopacerya. Mano moosuwela wii yaari evini? Aahitatuxa maahi okhala evinyo.
Mateyu 3:13-17; 4:1-11; 13:55; Marko 6:3; Yohane 1:29-51; 2:1-12.