MWAHA 99
Mu Empa Ya Vasulu
WAARI vano nihiku Naneexexe ohiyu, mahiku meeli vachuli vaya. Yesu ni arummwaawe 12 yaahirowa mu empa yeela ya vasulu ntakhara a yoolya ya Paskha. Mulopwanoowo munamoonaanyu akhumaka ti Yuutase Isikariote. Owo onaya waleela alipa a ephepa mampharelo a Yesu.
Nihiku nimoha muchuli, Yuutase aahirowa oloca ni yaawo ni waakoha: ‘Munakhwela okivaha xeeni, miyo kookhaviheryaani omveleela Yesu wa nyuwo?’ Yaahi: ‘Ikhorowa saweela makhumi mararu.’ Hiihaa, Yuutase okele okumana ni achweene yaawo wii aakuxerye awo wa Yesu. Mano eyo hiyari yawoopiha?
Vachuli va yoolya ela, Yesu aahipaceriha yoolya ekina yavamekhaya. Aahaavaha ephaawu arummwaawo nave aahi: ‘Lyani; ela ti mwiili aka, woveleeliwa wa nyuwo.’ Aahavahanto ekahi ya vinyo nave aahi: ‘Muwurye; ela ti nikhami naka, nnahaala oyeeheriwa wa nyuwo.’ Piipiliya oniichana okhala ‘yoolya ya oxekuwa ya Apwiya’ nari ‘yoolya ya Apwiya.’
AIsarayeli yaanamulya Paskha wii yuupuweleke wii mungelo a Muluku ‘aahivirela’ ipa saya o Yiikuputu, nyenya aahirowa omwiipha mwaana oopacerya oyariwa mu ipa sa aYiikuputu. Nyenya, Yesu aachunne wii oomucharaawe emuupuweleke, ni wii aahiveleela okumi awe ntakhara a yaawo. Ti nthowa nene aalamulenliiye wuupuxerya yoolya ela yavamekhaya eyaakha ni eyaakha.
Vachuli va Yoolya ya Oxekuwa ya Apwiya eyo, Yesu aahaalamulela arummwaawo okhala akuru ni oolipa mu nroromelo. Vookuchula vaya, yaahimwiipela Muluku macipo nave yaakhuma. Vano waari wii laleweene. Hinkoni noone wii yaakele woowi.
Mateyu 26:14-30; Luka 22:1-39; Yohane ikapitulu 13 ophiyerya 17; 1 aKorinto 11:20.