MWAHA 104
Owela Wa Yesu Oya Wirimu
MU OVIRA wa mahiku, Yesu ahiisoniherya ikwaha sincipale wa alipa oomucharaawe. Ekwaha emoha oohuserya awakhwana 500 yahimoona. Vavaa owo oonenyiye wa yaawo, mano moosuwela wii Yesu aalonhe eheni wa yaawo? Sa omwene wa Muluku. Yehova aahimuruma Yesu veelaponi yavathi wii ahusihe sa Omwene owo. Aahititelela mu yeeyo nari vachuli va ovinya wawe wa alipa okhwa.
Mano munnupuwela wii omwene wa Muluku tiheeni? Aayi, Omwene ti epoma chiri ya Muluku wirimu, nave Yesu ti Oothanliwa ti Muluku wii akhale mwene. Ntoko nihuseryenlaahu, Yesu oothonyerya wii onahaala okhala mwene otikiniha mwawiihai, vavaa aavakulenliiye ovoliwa etala, aahapenuxa awiicheliwa nave aahiphiyerya waviha alipa okhwa!
Hiihaa, vavaa Yesu oniriiye alamulele miyaakha masanaru khumi wirimu, mano elapo yavathi enahaala okhala mwawiihai? Aayi, elapo yoothene yavathi enahaala opakiwa okhala paradaiso ooreera. Hevarwa vakhalatho ekhoco, nari opahula, irecha nari okhwa. Ninnasuwela wii enahaala okhala hiihaa ntakhara wii Muluku aahipaka elapo yavathi ntoko paradaiso wa achu. Va nthowa nenla, wopacherya wene, aahipaka emaca ya Eeteni. Nave Yesu onahaala othokororya wii yereye yeeyo Muluku onachuniiye.
Yaahiphiya vano elukuluku yawii Yesu awele wirimu. Mmahiku 40, Yesu ahiisoniherya wa oohuseryaawe. Hiihaa yaahichichimiherya wii owo aari mukumi. Nyenya, ahinachimule, aahi wa yaawo: ‘Muhivinyemo mu Yerusalemu ophiyerya mwakhenle munepa wawela.’ Munepa wawela ti ikuru sophara muteko sa Muluku, mophwana-phwana ni echeku enoopa, nave owo waahaala wakhaviherya omucharaawe weerano yochuna ya Muluku. Yesu aahi: ‘Munnaphwanela olaleyerya sa miyo ophiyerya wiiwo elapo ekomenlaya’wo.’
Arikimulocaru iha, yahereya echu yotikiniha. Owo aahipacerya owela wirimu, ntoko munoonelanyu va. Ovinyerya vavaa, neeku nahimvitha, nave oohuseryaawo hiyaamonnetho. Yesu aahirowa wirimu, nave ari wiiwo ahikhala alamulelaka wa omucharaawe veelaponi yavathi.
1 aKorinto 15:3-8; Yawupulula 21:3, 4; Saweriwa Tarummwa 1:1-11.