MWAHA 107
Ovonyiwa Maluku Wa Stefano
MULOPWANA okokhonre owo ti Stefano. Owo ti oohuserya oororomeleya a Yesu. Nyenya nkoonani anamwerelaya! Alopwanaawo anamvonya maluku. Mano ntakhara heni anamwiicaya vancipale Stefano, ophiyerya omwerela echu yawoopiha ela? Hinkoni noone.
Muluku aahimukhaviherya Stefano weerano sotikiniha. Alopwanaawo hiyasiveliwe ni ela, nave yahakhulanano nthowa na ohusiha eeparipari wa achu. Nyenya, Muluku aahimvaha Stefano miruku mincipale, nave ola aahooniherya wa achu yaale yahusiha ichu sowoka. Ni ela, yahaapakiha onanariwa vancipale nave yahiwichana akina wii emotherye yoowo.
Mutokweene a alipa a ephepa ahimokoha Stefano ii: ‘Ichu iha iri eeparipari?’ Owo ahaakhula mwa oloca mwaha waphaama wa Piipiliya. Aahithoriha sa mummo achu oonanara yawiichenlaya alipa a miririmu a Yehova. Vanonto aahi: ‘Nyuwo muri ophwana-phwana ni achu yaale. Yamwiipha murummwa a Muluku, Yesu, nave hiyaiwelenle malamulo a Muluku.’
Iha sahaachererya onanariwa wa ahooleli a mathamalelo! Yaamukhurela miino mu esaraya. Nyenya, Stefano ahiviiha muru ii: ‘Kinnamona Yesu eemenle o ntatani noolopwana na Muluku.’ Va ela, achwaawo yaachiyela maaru aya epwahiherya omvinyerya Stefano. Yaamphara empurulela vaate va epooma.
Vanonto yahirula soowara saya emvahererya mmiravo owo Saulo wii aiyathi. Mano munnamoona Saulo? Ovinyerya vavaa akina a yaawo yahipacerya omvonya Stefano maluku. Owo aahikokhora, ntoko munamoonanyu, nave aahivekela wa Muluku: ‘Yehova, muhiwiyatherye yaawo yoocheka ela.’ Owo anasuwela wii akina yaawokiwe ti ahooleli a mathamalelo. Vaavanto, Stefano aahikhwa.
Vavaa muchu mukina onawereliiyeni yoonanara, mano nyuwo munavyavya omukokiherya yoonanara, akhweya munaveka wii Muluku amwerele yoonanara? Stefano ni Yesu hiyenreno mwawihiihaa. Yaari ophameya wa achu yaawo yahawerenle saphaama. Hinkoni natakiherye.
Saweriwa Tarummwa 6:8-15; 7:1-60.