MWAHA 109
Petro Onnamuxekurya Korneliyo
OLA ti murummwa Petro eemenle va, ni asiinthamwenaawe akina oculi wawe. Nyenya mano, ntakhara heni mulopwanoowo onuramiiye vamiithoni va Petro? Anaphwanela weerano hiihaa? Mano moosuwela wii yoowo taani?
Mulopwanoowo ti Korneliyo. Ti kenturiyo a muloko wakhoco wa o Roma. Korneliyo hamusuwela Petro, nyenya aahilamuliwa omwiichanela owannyawe. Hinkoni noone mummo yerelenyaaya.
Alipa oomuchara opacerya a Yesu yaari aYuuta, nyenya Korneliyo haari. Nari hiihaa, aanamusivela Muluku, aanamvekela yoowo nave aanerano ichu sincipale saphaama wa achu. Vanonto, mu oxekuwa okina, mungelo aahimoonela ii: ‘Muluku onnahakalala ni weyo nave onahaala wakhula mavekeloaa. Rumiha alopwana emwichane muchu oochuwiwa’tho Petro. Owo ori o Yopa, ompa wa Simoni muxerexere mwa niya.’
Mwawakuveya, Korneliyo aaharumiha alopwana wii yamwavye Petro. Omeelo aya, vavaa alopwanaawo yaachamelaaya o Yopa, Petro aari va pathoni va empa ya Simoni. Vanonto Muluku aahimweriha Petro wuupuwela wii oona ekuwo etokotoko ekhuruwaka orwela wirimu. Mummo mwaari inama sa miloko yoothene. Mu nlamulo na Muluku, saari inama soohiphwanelela olya, nyenya, nsu norwela wirimu naahi: ‘Nkavinya, Petro. Ipha olye.’
‘Hooye!’ aahaakhula Petro. ‘Okhala wookhala nkitokoru olya yotakhala.’ Nyenya, nsu nlo naahi wa Petro: ‘Yeeyo Muluku eelihaliye oheere yothanyiwa.’ Ela yahereya oraru. Petro uupuwelelakaru sa ela, yaahiphiya va empa eyo alopwanaawo orummwa ti Korneliyo nave yaamukoherya Petro.
Petro aakhuruwa va mawelelo nave aahi: ‘Nkoonani miva ka yoowo munamwavyanyu. Ntakhara awe murweleni?’ Vavaa alopwanaawo yaathorinhaaya wii mungelo mmoha aahimulela Korneliyo wii amwiichanele Petro owannyawe, Petro ni asinthamwene awe yaarowa omuxekurya Korneliyo o Kaisareya.
Korneliyo aahathukumanya amusi awe ni asinthamwene awe. Petro aphiyaka, Korneliyo aahirowa wopanano. Aahikokhora urama va manani a Petro, ntoko munoonanyu va. Nyenya Petro aahi: ‘Vinya; miyo’tho ka muchu.’ Aayi, Piipiliya onathonyerya wii hori waphaama omulapela muchu. Nnaphwanela omulapela Yehova pahiru.
Vanonto Petro aahilaleyerya wa oothukumana awo. ‘Kinnoona wii Muluku onnawemererya oothene anachuna omurumela,’ aahi Petro. Nave alocakaru hiihaa, Muluku aarumiha munepa awe wawela, nave achwaawo yaahiloca mu ilocelo sohiyana. Ela, yaahaatikiniha oohuserya yaawo yaari aYuuta, yaawo yaari vamoha ni Petro, nthowa nawii yuupuwela wii Muluku aawemererya aYuutaru. Ela yaahahusiha awo wii Muluku hanawalakhanyerya achu a nloko nla okhala oochuneyaxa wapwaha achu a nloko nikina. Mano hori waphaama wii oothene nuupuweleke sa ela?
Saweriwa Tarummwa 10:1-48; 11:1-18; Yawupulula 19:10.