MWAHA 113
Paulo Ori O Roma
NKOONANI ekurenti eyo mmiono ya Paulo, nave nkamvareryeni musurutatu o Roma yoowo onamulipelela. Paulo orimphariwa o Roma. Onawehererya wii Kaisara a o Roma athanle yeeyo owo oniriiye ereliwe. Aphariweene hiihaa, aanawerya owakhela oomuxekurya.
Vachuli va mahiku mararu Paulo aphinye o Roma, aahiwiichaniha ahooleli akina ni akina a aYuuta. Yoocharelavo aya yaari yawi aYuuta ancipale o Roma yaahirwa omuxekurya. Paulo aahalaleyerya yaawo vooloca sa Yesu ni sa omwene wa Muluku. Akina a yaawo yaahiroromela ekhala aKristu, nyenya akina hiyaaroromenle.
Paulo ahilaleyeryatho wa asurutatu ohiyana-hiyana yaawo yaamulipelela. Aahikhala wiiwo mu iyaakha piili mukariposo, aalaleyeryaka oothene wa yaawo aweryiye. Hiihaa, nari a mpa mwa Kaisara yaahiiwa michaka yaphaama ya Omwene, nave akina a yaawo yaahikhala aKristu.
Nyenya, mano muleco owo onarepa va mesani va taani? Munnamwanyiherya wii taani? Aayi, ti Timoteo. Timoteo aahiphariwatho nthowa na olaleyerya Omwene, avinyaka ataphuliwa. Nave ohoorwa omukhaviherya Paulo. Mano moosuwela yeeyo Timoteo onarepiiye? Hinkoni noone.
Mano munnupuwela sa ipooma sa Filipi ni Efeso m’Mwaha wa 110? Paulo aahikhaviherya opaceryiha miloko ya aKristu mu ipooma seiha. Vanonto aryeene mukariposo hiihaa, Paulo ahaarepela ikarata. Ikarata sene hiiho iri m’Piipiliyani, nave inichaniwa aEfeso ni aFilipi. Paulo aahimulela Timoteo yeeyo aphwaneliiye warepela asinthamwene awe eeKristu o Filipi.
AFilipi yahitepa omuthokororya Paulo. Yaahimurumihela yamahala ari mukariposo, nave, va nthowa nenla, Paulo aahathamala. Epafrodito ti yoowo aarunhe yamahala eyo. Nyenya owo aahiicheliwa vancipale ahala vakhaani okhwa. Vano, aahipenuwa airehererya okookela owaani. Ahaala okuxa ekarata ela ya Paulo ni ya Timoteo oyano o Filipi.
Aryeene mukariposo hiihaa, Paulo aahirepatho ikarata piili, hiiho nryaahuno mPiipiliyani. Emoha wa aKristu a epooma ya Kolose. Mano moosuwela wii eniichaniwa hayi? AKolose. Ekina yaari ekarata ya muchu mwaneene wa nthamwene awe awiichaniwa Filemoni, yoowo aakhala o Kolose. Ekarata eyo yalocha sa murummwa a Filemoni, Onesimo.
Onesimo aari amunchanweene Filemoni aya o Roma. Ari wiiwo Onesimo aahisuwela wii Paulo ori mukariposo wiiwo. Aahiya omuxekurya nave Paulo ahimulaleyerya Onesimo. Ola aahikhala mKristu. Vanonto, Onesimo aahuukhuwa mmurimani okhala achanweene. Mano moosuwela yeeyo Paulo aarempiiye mu ekarata awe wa Filemoni?
Paulo aavenke wii Filemoni amukhurumuwele Onesimo. ‘Kinnamurumiha wa weyo,’ aahirepa Paulo. ‘Nyenya vano hari pahiru murummwa. Ti munnatho aphaama mKristu.’ Vavaa Onesimo aakokenliiye o Kolose, aahikuxa ikarata iho piili, emoha ya aKolose nave ekina ya Filemoni. Ninnawerya wuupuwelela mummo Filemoni aahakalalenliiye vosuwela wii murummwa awe aari mKristu.
Vavaa Paulo aarepenliiye aFilipi ni Filemoni aahithoriha masu aphaama. ‘Kinnamuruma Timoteo,’ aahi Paulo wa aFilipi. ‘Nyenya miyo mekhakatho kinnaakuva orwa.’ Nave wa Filemoni aahirepa: ‘Okiryeheryeletho vokona’vo.’
Vavaa Paulo aataphuliwiiye, aahaxekurya anneeni ni arokorawe eKristu mmapuro mancipale. Nyenya vachuli vaya owo aahiphariwatho o Roma. Ekwaha ela aanasuwela wii onahaala wiiphiwa. Va nthowa nenla, aahimurepela Timoteo nave aahimveka wii arwe mwawakuveya. ‘Kookhapelela nroromelo wa Muluku,’ aahirepa Paulo, ‘nave Muluku ookivithela koroa.’ Iyaakha sawaalakhanyeya vachuli va wiiphiwa wa Paulo, Yerusalemu aahipahuliwatho, mu ekwaha ela yaari aRoma yaawo yampahunle.
Nyenya, sookhalamo sawacereryeya mPiipiliyani. Yehova Muluku aaheriha wii murummwa Yohane aarepe aliivuru okuchulelawe, ophitanyavo Yawupulula. Liivuru ola a mPiipiliyani onnaloca sa muhoolo. Hinkoni noone vano yeeyo muhoolo onahaalaya oruuha.
Saweriwa Tarummwa 28:16-31; aFilipi 1:13; 2:19-30; 4:18-23; aHebri 13:23; Filemoni 1-25; aKolose 4:7-9; 2 Timoteo 4:7-9.