Masooso Oothene Anahaala Omala Mohilekela!

Akhweya nyuwo moontoko wiikoha wii, ‘mano ntakhara heeni aryaayavo masooso manchipale awiihiiha?’ Mu iyaakha sinchipale muloko wa atchu wookhala ohoosheyaka vanchipale ni ikhocho, ohaawa, ipahu, werelana yoonanara, wereliwa mohikhala ekhaikhai, irecha ni okhwa. Mu iyaakha nsana nimoha sookutchulela iha, ninnoona masooso manchipalesha ohiyana ni elukuluku eri yoothene evinre. Mano soothene hiho sinarwa simala va nihiku nikina?

Waakhula woohakararya ti wawi aayi, nave moohilekelasha! Masu a Muluku, Biblia, anii: ‘Oonanara harwa akhalavotho . . . Nyenya awiitchachala tiniriaya yakhele elapo yavathi nave enatheyano murechele wawacha.’ Mano anahaala okhala hiihaa mu elukuluku yoorekama mwawiihai? “Ekhaikhai tiniriaya yakhele elapo yavathi, yikhaleleru mummo okhala wokhala.”—Masalmo 37:10, 11, 29.

Muluku aviihaleenevo soonanara ni masooso, elapo yavathi enahaala otatushiwa okhala paradaiso. Vanonto atchu anahaala okhala mwawiikhalelaru moohakalala ni okumi woophaameya. Masu a Muluku aalochela wii: “Nave [Muluku] anarwa-avuta mithori yothene oviha’mo m’mithoni mwaya; nave hevarwa-vakhalatho okhwa; nave hevarwa-vakhalatho iyinlo, nari wunla, nari sawichela.”—Yawupulula 21:4.

Mu elapo ene yeeyo yahiihaano, alipa ookhwa anahaala oviihiwa wii ehakalaletho ni mareeliho ene yaawo: “Onarwa-okhala ovinya’tho wa ékhaikhai ni óhikhala ékhaikhai.” (Saweriwa Tarummwa 24:15) Ti nthowa nene Yesu aawenryiye olocha wa aweera soonanara ootcharuwa yoowo oonihenrye nroromelo wa yoowo: ‘Onahaala okhala ni miyo m’paradaiso.’—Luka 23:43.

Mano Ntakhara Heeni Masooso Yaapachenryaaya?

Okhala wii yookhwela ya Muluku yaari yawii atchu ekhale ni omwaahiyu wootikiniha, mano ntakhara heeni eemerenryiiye wii masooso epacherye? Mano ntakhara heeni owo eemerenryiiye wii masooso awo ekhalevo mu elukuluku yoorekama?

Vaavaa Muluku aapachunshiiye Aatamu ni Haava, Owo aapanke ni mwiili ni miruku soophaameya. Owo aakunhe mparadaiso nave aahaavaha muteko woohakalaliha wii ephareke. Biblia onii: “Sopachushiwa sothene sa Muluku ti saphama.” (1 Timoteo 4:4) Awo yaari emwiiwelela Muluku, yaahaala waayara anamwane oophaameya, nave elapo yoothene yavathi yaahaala okhala paradaiso, mummo atchu yaahaalaya wiikhalelakarumo mmurecheleni ni moohakalala.

Muluku aahikuha mwa Aatamu ni Haava yamahala yootikiniha ya wiithanlela ntoko makupa a omutchu aya. Awo hiyaapakiwe ntoko maakina yaawo ahinuupuwela, nii ahinawerya wiithanlela naari opaka soothanla. Hiihaanto, wii ohakalala waya opwahiheryeru awo yaaphwanela opharihela muteko wiithanlela waya mu ephiro yaphaama, yeeyo eri wiiwelela malamulo a Muluku. Ntoko Muluku olochenliiye wii: “Miyo kinarwa-kothoriherya ni wohusiha weyo sa mphiro oniriá wecheke’mo; kinolélano n’nitho naka nawoweha weyo.” (Masalmo 32:8) Nyenya awo yiiryaaya epharihele muteko wiithanlela waya mu ephiro yoonanara yaahaala okhala mmasooso ntakhara wii atchu hiyaapachushiwe wii ekhaleke phaama ehiroromelaka wa Muluku. Biblia onii: ‘Mutchu hanawerya othanla mphiro awe. Owo hanawerya wookolola meechelo awe.’—Yeremiya 10:23, Tradução do Novo Mundo.

Yoothananiha ti yawii, asitiithihu oopacherya yuupuwenle wii yaanwerya okhala oohiroromela wa Muluku nyenya naari hiihaa epwahiheryeru okhalaka phaama. Nyenya vaavaa awo yaakhonchaaya olamuleliwa ti Muluku, owo haawemerenrye wii yikhaleleru oophaameya. Hiihaa awo yaahipacherya ocheetcheya ophiyerya wuukutchula waya yuuluvala ni okhwa. Okhala wii hiyo na anamwane aya awo aanivaliha ohiphaameya ni okhwa.—aRoma 5:12.

Mwaha Mutokwene—Mano Taani Orinono Ophwanelela Wa Olamulela?

Mano ntakhara heeni Muluku ahaawiiphaliiye Aatamu ni Haava ni wapachusha atchu akinatho eeli? Ori nthowa nawii olamulelo mutokwene wa Muluku, ti wii, ophwanelela wawe wa olamulela, waahiruuheliwa nthowa. Nthowa nene tinawii, mano taani yoowo orinono ophwanelela wa olamulela, navetho ti olamulela wawani yoowo ori waphaama? Mwaha tiwawii, mano atchu yaamukhalaka phaama ehilamuleliwaka ti Muluku? Muluku wawavaha atchu elukuluku yawaakhwanela yawii yeererye ni oneethi woothene, owo onahaala waakhula okhala wookhala wakhala wii atchu yaahaala okhalaka phaama mwa wiilamulela meekhaya akhweya ni olamuleliwa ti Muluku. Elukuluku eyo yaahaala okhala yawaakhwanela wii atchu yeererye ni makhalelo oohiyanahiyana a olamulela, amuhakhu, amathamalelo ni meerelo a atchu ehihooleliwaka ti Muluku.

Mano sookhumelelavo iri sawiihai? Mu iyaakha masana masaneene sa okhalavo wa atchu sinnathonyerya wii ophiyerya olelo nookhalano masooso manchipalesha. Mu iyaakha nsana nimoha sivirale, muloko wa atchu wookumana ni masooso manchipalesha ohiyana ni elukuluku eri yoothene. Atchu masana masaneene waakulela masana masaneene yaahiiphiwa mu Ekhocho Yanawiili ya Elapo Yoothene Yavathi. Nave oopwaha vaavaa yaahiiphiwa pure mukhochoni. Weerelana soonanara ni nlala siri voothevene. Mu elapo yoothene yavathi atchu annalya itchu seiyo inananariha mwiili. Irecha sooravihana mu okonihana sinnapwahiheryaru waachereryeya variari va atchu. Eyaakha ni eyaakha atchu masana masaneene waakulela masana masaneene annakhwa nthowa na etala ni irecha. Etchoko ni makhalelo a atchu a yeeyo eri yaphaama sinnapwahiheryaru onanara mmapuro oothene. Haavovo mutchu oolamulela ori oothene yoowo owenrye omaliha sookachamiha sene seiyo. Haavovo mmoharu mano yoowo owenrye omaliha wuuluvala, irecha, ni okhwa.

Mukhalelo wa atchu ori hiihaa tchiri ntoko mummo Biblia aalochenliiye sa mahiku ahu ala. Masu a Muluku annasuwanyeiha elukuluku ahu ela okhala ‘mahiku ókutchula’ a mikhalelo irivovo olelo veelaponi vaavaa siniryaaya siphiye “ilukuluku sohósha.” Nave ntoko mummo Biblia olochenliiye, ‘nyenya atchu ónanara ni ówoka, ánanararu okhala wokhala’.—2 Timoteo 3:1-5, 13.

Masooso Anahaala Omala Mohilekela

Saweereya soothene sinathoonyerya wii nri vakhiviru ni makutchuwelo a weererya woothananiha wa wiilamulela wa atchu meekhaya woohikhala wa Muluku. Soothonyerya vanlakani wii wiilamulela wa atchu meekhaya woohikhala wa Muluku horwaru okhala ni sookhumelelavo saphaama. Ti olamulelo wa Muluku pahi onawerya oruuha murechele, ohakalala, okumi woophaameya ni okumi woohimala. Hiihaanto Yehova weemererya wawe onanara ni masooso onahaala omala moohilekela. Moohilekela Muluku onahaala orwa nave onahaala orukunusha saweera sa atchu mwa opahula mikhalelo yoohihakalaliha ya elapo ela.

Yoolochela ya Biblia enii: ‘Mmahiku a mamwene yaawo [alipa oolamulela yaawo arivovo olelo] Muluku a wiirimu onahaala otikitherya omwene [wiirimu] yoowo oni ohirwe opahuliwe. . . . Onahaala waanyaanya ni waaphiiha omakutchuwelo mamwene oothene yaawo [alipa oolamulela yaawo arivovo olelo], nave owo onahaala otikitheryiwa okhala wookhala.’ (Daniyeli 2:44, NM) Ochichimiherya olamulelo wa Yehova, ophwanelela wawe wa olamulela orweela mu Omwene awe wa wiirimu ti mathipelo a ohusiha wa Biblia. Yesu alochelaka sa makupa otchuneyasha a eneneryo ya ‘mahiku ókutchula,’ aariye: “Nave mitchaka eyo ya Omwene enarwa-elaleyeryiwa velaponi yothene ya vathi vano, ekhale namona wa atchu a maloko othene; nave vavo enarwa-ephiya makutchuwelo.”—Mateyu 24:14.

Vaavaa makutchuwelo awo aniiryaaya ephiye, mano taani yoowo onii avuluwe? Biblia onnaakhula: “Ntakhara alipa-onanara enarwa-eriméla. . .  Ekhaikhai tiniriaya yakhele elapo ya vathi yikhalelaru mummo okhala wokhala.” (Masalmo 37:20, 29) Ekhaikhai ti atchu yaawo anahuserya yookhwela ya Yehova ni weerano. Yesu Kristu aariye: “Nyenya okumi wohimala ti ola, wi yasuwele Nyuwo Mulukuru éparipari, ni Yesu Kristu yowo mwámurummanyu.” (Yohane 17:3) Aayi, “elapo ya vathi ennavira . . . , nyenya yowo onerano okhwela wa Muluku onnikhalelaru okhala wokhala.”—1 Yohane 2:17.

Wahimukhalavo yothonyerya ekina, masu othene a mBibliani ophariwa vasulu va ti a mu sorepa sa egriki sa m’Bibliani Nlakano Nahihano na Yesu Kristu Apwiyahu ni Masalmo (Nootaphuleliwa mu Elomwe).