Alipa Ookhwa Anamukookela Okhala Akumi Chiryene?

PIIPILIYA ONI

“Onamukhalawo ovinya muukhwani wa awookololowa ni oohookololowa.”​—Saweeriwa ti Arummwa 24:15.

EYO ENATAPHULELA EHEENI WA NYUWO

Ohakararya vaavaa anakhwaaya oosiveliwa.​—2 Akorintu 1:3, 4.

Otaphuwa wa woova okhwa.​—Ahepri 2:15.

Ewehereryo yeeparipari ya okumana ni oosiveliwa anyu okhwile.​—Yohani 5:28, 29.

HIYAANO NNAPHWANELA WEEMERERYA CHIRYENE YEEYO PIIPILIYA ONALOCEIYE?

Aai, moone mathowa mararu:

• Muluku ti Mpatuxa a okumi. Piipiliya onaloca wi Yehova Muluku “ehime ya okumi.” (Salmu 36:9, PMM; Saweeriwa ti Arummwa 17:24, 25) Muluku yoowo ovanhe okumi soopatuxiwa soothene chiryene onnawerya okookiherya okumi wa muchu okhwile.

• Khalai Muluku aahaaviiha achu muukhwani. Piipiliya onnaloca saweereya thanu nararu sa achu​—amiravo, awunnuwelavo, alopwana ni athiyana​—yaawo yaakookenle okhala akumi veelaponi ya vathi. Akina hiyaalekenle muukhwani, nyenya mmoha aahikhala mmahiyeni mahiku masese!​—Yohani 11:39-44.

• Muluku onnachuna weerano eyo wanaawiili. Yehova onniica okhwa; owo onoona okhwa ntoko mwiicani. (1 Akorintu 15:26) Muluku onnachuna omvootha mwiicani owo, onnachuna omaliha okhwa moorweela wa ovinya muukhwani. Muluku onnachuna waaruuha yaale ari mmuupuweloni mwawe nave onnachuna owoona awo ekhalaka wanawiili veelaponi ya vathi.​—Yupu 14:14, 15.