Mukhale Oororomeleya wa Mukina ni Mukhwaawe

Yehova onachuna wi nikhale oororomeleya. (Mikeya 6:8) Ela ti yoochuneya mu othela wanyu, nthowa nawi waahikhalavo ororomeleya hokhalavo ororomelana. Nave ororomelana ti woochuneya wi osivela wunnuwe.

Olelo, ororomeleya mu othela ori mmakacamiho. Wi mukhapelele othela wanyu nyuwaano munaphwanela olakelela opaka ichu piili.

1 MUHELE OHOOLO OTHELA WANYU

TIHEENI PIIPILIYA ONALOCEIYE: “Wi musuwele othalela eri yaphama.” (Filipi 1:10, BNM.) Othela wanyu echu yoochuneyaxa mu okumi anyu. Owo onnaphwanela okuhiwa ohoolo.

Yehova onachuna wi nyuwaano mmuthokororyeke oothelana anyu nave ‘mpuheke ekumi’ vamoha. (Eklesiyaste 9:9, BNM.) Owo oohiya vanlakani wi hamunaphwanela ohimpwacha oothelana anyu, nyenya, moohiyana oopiili anyu munaphwanela waavya makhalelo a ohakalalihana mukina ni mukhwaawe. (1 Akorinto 10:24) Mweerihe wi oothelana anyu isoone okhala oochuneya ni asisapo.

TIHEENI MUNAPHWANELAANYU WEERA:

• Moohihiyererya munamaliha elukuluku vamoha, munwiriyanaka phaama oothelana anyu.

• Munuupuwela vooloca sa “hiyaano” ohiya “miyaano.”

2 MUKHAPELELE MURIMA ANYU

TIHEENI PIIPILIYA ONALOCEIYE: “Yowo óweha muthiana ni omukhalela nrima vavo arimraruwano hihano m’murimani mwawe.” (Mateyu 5:28) Wakhala wi muchu onnatitelela wuupuwela ichu soonanara, mwawiihiiha owo onakhala oohiroromeleya wa oothelana awe.

Yehova ooloca wi nyuwaano munaphwanela ‘okhapelela murima anyu.’ (Masiposipo 4:23, Tradução do Novo Mundo, NM; Yeremiya 17:9) Wi mweereno yeeyo, munaphwanela okhapelela miitho anyu. (Mateyu 5:29, 30) Mucharihe yootakiherya ya nikholo Yupu, yoowo aapanke nlakano ni miitho awe wi ahirwe anwehe muthiyana mukina ni nchuno. (Yupu 31:1) Mukhale oolakelela wi muhoone epwitikiri. Nave mukhale oolipa wi musepe ompwana ni muchu mukina ohiri oothelana anyu.

TIHEENI MUNAPHWANELAANYU WEERA:

• Moonihe wa akina wi nyuwaano moopaka nlakano ni oothelana anyu.

• Muthokororye moonelo wa oothelana anyu, nave mwawaakuveya mmalihe onthamwene yoowo waahaala omuukhula oothelana anyu.