Makwiya Anatoroka Hai Othela

Oyariwa wa nikwiya onanwerya okhala woovila ni woovelaveliha wa mutheli. Ntoko asitiithi avyaani, nyuwaano munahaala otikhina osuwela wi elukuluku anyu yincipale ni ikuru inahaala omalela mu okhapelela nikwiya nanyu. Oyeleela ikhove vamoha ni otorokeya wa muupuwelo onanwerya okacamiha onthamwene anyu. Oopiili anyu munaphwanela opaka matorokelo wi mukhapelele nikwiya nanyu ni okhapelela othela wanyu. Ikano sa Piipiliya inahaala wookhaviheryaani hai ovootha makacamiho yaala?

1 MWIIWEXEXE TI MWAWIIHAI NIKWIYA NNATOROKAAYA OKUMI ANYU

TIHEENI PIIPILIYA ONALOCEIYE: Osivela ti “wovilela, ti wa orèra murima.” Navetho, osivela “honasya ophura waya. Honanyenyeya.” (1 Akorinto 13:4, 5, BNM.) Ntoko mai muvyaani, mwa muyareriwo munnateteiwa ni nikwiya nanyu. Nyenya, iya anyu onanwerya woona wi onnahiiwa okhwipi, mwawiihiiha muhicuwale wi owo tho onnachuna opwacha wanyu. Ni opixa murima ni epewe, munanwerya omukhaviherya iyanyu woona okhala oochuneya ni oopaka makupa mu omukhapelela mwaninyu.

“Alopwana nyu, mukhalekeno ntoko mwawisuwelela.” (1 Petro 3:7) Musuwele wi mwaarinyu onahaala omaliha ikuru sawe sincipale wa nikwiya nanyu. Mwaarinyu ookhalano murici muvyaani nave onanwerya okhala awuukhuwa, oovelavela, naari oohaleeliheya. Mu ilukuluku ikina, owo onanwerya okhala oonyeenyeya ni nyuwaano, nave mweererye omaala, ntakhara “ti yaphama okhala mutxhu òpisa murima ohiya okhala mukhotxo awupa.” (Masiposipo 16:32, BNM.) Mooniherye miruku, nave mvahe nikhaviheryo owo onachuneiye.​—Masiposipo 14:29.

TIHEENI MUNAPHWANELAANYU WEERA:

• Asipapa: Mmukhaviherye mwaarinyu okhapelela nikwiya, naamwi ori ohiyu. Mukwatelele elukuluku munamalihaanyu ni miteko mikina wi muwerye omaliha elukuluku yincipale ni mwaarinyu ni nikwiya nanyu.

• Asimai: Vaavaa iyanyu oniivaheiye wi ookhaviheryeni ni nikwiya, mweemererye nikhaviheryo nawe. Wakhala wi owo haneerano phaama, muhimvevule, nyenya mweepewe mmoonihe mukhalelo wa weerano phaama.

2 MULIPIHE ONTHAMWENE ANYU

TIHEENI PIIPILIYA ONALOCEIYE: “Òwèli anamukhalaka ntoko mutxhu mmoharu.” (Maphatxuwelo 2:24, BNM.) Naamwi murino muchu muvyaani mu echoko, muupuwele wi nyuwaano ni oothelana anyu nlelo mwa “mutxhu mmoharu.” Nwethe vancipale wi mulipihe onthamwene anyu.

Athiyana, khalani oothamalela nikhaviheryo na iyanyu. Masu anyu a othamalela ananwerya okhala ‘openusa.’ (Masiposipo 12:18, BNM.) Alopwana, mmuleele mwaarinyu wi munnatepa omusivela ni munnamucicimiha vancipale. Muthamalele mukhalelo owo onakhapeleleiye echoko.​—Masiposipo 31:10, 28.

“Mutchu ahitchune sa yowo mekhiye, nyenya sa mukhwawe.” (1 Akorinto 10:24) Ikwaha soothene mweere yeeyo eri yaphaama wa oothelana anyu. Ntoko mutheli, mwiivahe elukuluku ya oloca, othamalela, ni owiriyanana mukina ni mukhwaawe. Muhikhale a nrima yaphiya elukuluku ya okonihana wanyu. Muthokororye soochuna sa oothelana anyu. Piipiliya onii: “Muhikhotxaneke. Mwakhotxanà, mpatxerye ovanela phama.” (1 Korinto 7:3-5, BNM.) Oopiili anyu munaphwanela ovaanela mweeparipari mwaha yoola. Opixa wanyu murima ni wiiwexexa onahaala olipiha onthamwene anyu.

TIHEENI MUNAPHWANELAANYU WEERA:

• Muhicuwale wiivaha elukuluku wa oopiili anyu pahiru.

• Mweere ichu ikhaani seiyo inamweeriha oothelana anyu woona okhala oosiveliwa, ntoko orumiha michaka naari ovaha yamahala.

3 MUHUSIHE NIKWIYA NANYU

TIHEENI PIIPILIYA ONALOCEIYE: “Opacherya ori nikwiya wosuwela sorempwa sawéla, sowerya wóvaha miruku ophiyerya ovulushiwa.” (2 Timoteo 3:15) Murehererye yeeyo munahaalaanyu ohusiha nikwiya nanyu. Owo ookhalano owerya wootikiniha wi ahuserye, naamwi ahaakumve oyariwa. Nri mmirimani, nikwiya nanyu nnanwerya osuwela nsu nanyu ni waakhulela moonelo anyu. Mwaalakhanye wa yoowo ari nikwiya. Naamwi muupuwelaka wi owo hanawerya wiiwexexa yeeyo munaalakhanyaanyu, eyo enanwerya omukhaviherya osiveliwa waalakhanya unnuwa.

Mwaninyu tahi ooyevaxa wi ahoowiriyaneni mulocaka sa Muluku. Mmuhiye wi oowiriyaneni mvekelaka wa Yehova. (Malamulo 11:19) Naamwi muthataka vamoha, muloceke sa ichu Muluku opatunxeiye. (Salmo 78:3, 4) Vaavaa mwaninyu onannuweiye, onahaala woona osivela wanyu wa Yehova nave onahaala ohuserya omusivela tho yoowo.

TIHEENI MUNAPHWANELAANYU WEERA:

• Mvekele mvekaka miruku wi muhusihe nikwiya nanyu.

• Muuluuleke masu ni miruku sookhweya wa nikwiya nanyu hiiha owo onahaala opacerya ohuserya woosiilo.