Mmulapele Yehova Ntoko Echoko

Ntoko muhusenryaanyu mu eproxura yeela, Piipiliya ookhalano malakiheryo mancipale anahaala wookhaviheryaani ni echoko anyu. Yehova onachuna wi mukhale oohakalala. Owo oororomeliha wi wakhala wi moohela malapelo awe voopaceryani, “sothe sene iho sinarwa-sachereryiwa wa nyuwo.” (Mateyu 6:33) Owo chiryene onachuna wi mukhale nthamwene awe. Mpharihele ekari yoothene wi munnuwihe onthamwene anyu ni Muluku. Ela ekari etokweenexa muchu aahaaleiye okhalano.​—Mateyu 22:37, 38.

1 MULIPIHE ONTHAMWENE ANYU NI YEHOVA

TIHEENI PIIPILIYA ONALOCEIYE: “Kinarwa-kikhala wa nyuwo Atithi, nave nyuwo munarwa-mukhala wa Miyo anamwane asilopwana ni asithiana, analoca Apwiya A’kuru sothene.” (2 Akorinto 6:18) Muluku onachuna wi mukhale nthamwene awe avamurimani. Ovekela mukhalelo mmoha wa weerano yeeyo. Yehova onnoowopani “vekelani mohihiyeryerya.” (1 Atesalonika 5:17) Owo ori ooreheryeya owiriyana muupuwelo anyu wawiiseela ni sawuukhula sanyu. (Afilipi 4:6) Vaavaa munavekelaanyu ni echoko anyu, awo anahaala woona ophiyerya mweero taani Muluku oreiye eeparipari wa nyuwaano.

Ophitaanyerya oloca ni Muluku, nyuwaano munaphwanela onwiriyana yoowo. Munanwerya weerano yeeyo moorweela wa ohuserya Masu awe ni soolaleeryiwa soorweela mu Piipiliya. (Salmo 1:1, 2) Muupuwelele yeeyo muhusenryaanyu. (Salmo 77:11, 12) Onwiriyana Muluku onaphitaanyerya tho ophwanyeya mmithukumano Seekiristu moohihiyererya.​—Salmo 122:1-4.

Oloca ni akina sa Yehova mukhalelo mukina woochuneya wa olipiha onthamwene anyu ni yoowo. Vaavaa muniilipixeryaanyu weerano yeela, munahaala woona okhala oomwaacamela yoowo.​—Mateyu 28:19, 20.

TIHEENI MUNAPHWANELAANYU WEERA:

• Mwiivahe elukuluku mahiku oothene wi mmwaalakhanye Piipiliya ni ovekela.

• Ntoko echoko, mvahe nipuro noopacerya miteko soomunepani opwaha mathatelo ni wiichuuwa.

2 MPUHE MALAPELO EECHOKO ANYU

TIHEENI PIIPILIYA ONALOCEIYE: “Mwachameleni Muluku, nave anarwa-awachamelani nyuwo.” (Yakobo 4:8) Nyuwaano munaphwanela opaka marehereryo ni ochariha vakhivirukhiviru marehereryo a malapelo a echoko. (Mapacereryo 18:19) Nave ti yoochuneya opwaha yeela. Muluku onaphwanela opaka makupa a okumi anyu wa nihiku nnihiku. Mulipihe onthamwene wa echoko anyu ni Yehova moorweela wa oloca sa yoowo “mukiranthe owaani mweecaka mu mphironi, mukonaka ni mvinyaka.” (Malamulo 6:6, 7, NM) Mpake yoolakelela anyu okhala ntoko Yosuwa, yoowo aalonce: “Miyano ni ahima aka nni nalapeke Apwiya.”​—Yosuwa 24:15, BNM.

TIHEENI MUNAPHWANELAANYU WEERA:

• Mukhaleno marehereryo oohusiha oohihiyererya yaawo anathokororya soothowa sa muchu ti muchu a echoko anyu.