Onnannuwa o Nasareti

Yesu unnunwe o Nasareti, epooma ekhaani ni yoohikhweleya. Epooma eyo yaakhala omokoni wo Yuteya, makupa yiichaniwa Kalileya, waacamela muhice mutokweene osuweliwe ntoko Eniya yo Kalileya.

Akhweya vaavaa oreiyeno iyaakha piili sa oyariwa, Yesu onnaruuhiwa o Nasareti orweela o Yikuputu ni Yosefe ni Mariya. Enakhala wi mu elukuluku yeela, erino mwaana mmoha pahiru. Ohoolo waya, annayariwa annawe oomaayi—Yakopo, Yosefe, Simoni, ni Yutasi. Yosefe ni Mariya annaayaratho anamwane aasithiyana apiili, arokora oomaayi a Yesu. Chiryene, Yesu ookhalano anna ni arokora athanu nammoha.

Navetho, Yesu ookhalano amusi akina. Noomala osuwela vooloca sa Isapeli ni mwanawe, Yohani. Awo amanke makupa oorakamela ohico wo Yuteya. Onakhala vakhiviru o Kalileya ti Salome, mwawooneya murokora a Mariya ni titiya a Yesu. Salome mwaara a Sepetewu. Anaaya apiili, Yakopo ni Yohani, enakhala wi asinnawe oohima oopacerya a Yesu. Hinsuwenle waakhanle wi Yesu oomaliha elukuluku yincipale ni amiravo yaala vaavaa yinnuwaaya, nyenya ohoolo waya awo yaahikhala asinthamwene awe, oopiili erumeelaka ntoko arummwa a Yesu.

Yosefe onnalapa mwakuru wi avakulele emusi yeela enaaceereryeya. Owo karpintero. Yosefe onamphuwa Yesu ntoko mwanawe, mwawiihiiha Yesu oniichaniwa “mwana a karpintero.” (Mateu 13:55) Yosefe onnamuhusihatho Yesu okhala karpintero, nave owo onnahuserya phaama. Mweeparipari, ohoolo waya, achu annaloca sa Yesu: “Tahi yola karpintero?”—Marko 6:3.

Okumi wa emusi ya Yosefe enathipeleya mmalapelo a Yehova. Echarihaka Nlamulo na Muluku, Yosefe ni Mariya annaahusiha anaaya mahusiheryo oomunepani ‘ekiranthe vaate vaya ni yeecaka muramphani ni ekonaka ni evinyaka.’ (Malamulo 6:6-9, Tradução do Novo Mundo) Yookhalawo esinakooka o Nasareti. Nsina naaphariheliwa ni Ayuta wi eloce sa nipuro na omulapelamo Muluku. Ninnaroromela wi wiiliwiili Yosefe onnakusa emusi awe wi yalapele weiwo. Yoolociwa wi ohoolo waya “ntoko akhovelenleiye wera, nihiku naworowa”, Yesu aahivolowa mu sinakooka. (Luka 4:16) Emusitho ennaphwanya nihakalaliho ntokotoko mu opaka mikwaha eyaaka o empa ya Muluku o Yerusalemu.