Amuhuserya Asese Anahaala Waatothaka Achu

Achu o Nasareti emanle weererya omwiipha Yesu, owo onnathaamela epooma yo Kafarnau, waacamela Eniya yo Kalileya, eniichaniwaatho “ephareya yo Genezaré.” (Luka 5:1) Eyo ennakhwaaniherya yooloherya ya liivuru a Isaiya wi achu o Kalileya amanke o eniya yaahaala woona omwaleela otokotoko.—Isaiya 9:1, 2.

Chiryene, o Kalileya, Yesu onnatitelela olokoha wi “omwene wa Muluku ori vakhiviru.” (Mateu 4:17) Yesu onnaaphwanya amuhuserya awe asese. Awo yaapanke mukwaha ni Yesu woosiiselo, nyenya emanle okooka o Yuteya, awo annachikela muteko aya wa ototha ihopa. (Yohani 1:35-42) Vano, ela elukuluku ya okhala ni Yesu moohihiyererya wi awerye waavyakiha wi ehaleno muteko owo amanle ovinyavo.

Vaavaa Yesu oneeceiye oseresere wa eniya, onnamoona Simoni Petro, ni munnawe iichaniwa Antreya, ni asinthamwene aya akina esonaka milapa saya. Yesu onnaacamela, nave onnawela mmwaaceya mwa Petro, nave onnamveka wi amusoviherye mmaahini. Vaavaa awo anasovaaya vakhaani, Yesu onnakiraathi nave onnapacerya ohusiha iparipari vooloca sa Omwene muloko yoowo othukumanne oseresere wa eniya.

Voocharela, Yesu onnaloca wa Petro: “Hawé veriyari va ephareya nave reyá milapa sà.” Petro onnaakhula: “Muhusiha, hiyo nrimuseliwa ntothaka ihopa, nto hani phanre etxhu. Nto, wona wi onnakiruma, kinamureya milapa.”—Luka 5:4, 5.

Awo annareya milapa nave annaphara ihopa sincipale ophiyerya milapa inaahuwa! Mwawaakuveya, alopwana awo annawiichana asinthamwene aya ari mu mwaaceya awaacamela wi yaakhaviherye. Mwawaakuveya amwaaceya oopiili annasareya ni ihopa sincipale enahaawela opwina. Oonaka yeela, Petro onnakokhora vamiithoni va Yesu nave onnaloca: “M’vinye va miyo, Apwiya, ntakhara ká mutchu ótcheka” Yesu onnaakhula: “Ohóve, opacherya hihano onarwa-okhala mulipa-ototha atchu.”—Luka 5:8, 10, Nlakano Nahihano.

Yesu onnaloca wa Petro ni Antreya: “Mukitxhare, kiwereni alipa awatotha atxhu.” (Mateu 4:19) Owo onnaawopatho anamatotha ihopa akina eeli, Yakopo ni Yohani, anamwane a Sepetewu. Awotho anneemererya ehoovelenle. Mwawiihiiha osese yaala annahiya muteko aya wa ototha ihopa nave annakhala amuhuserya oopacerya a Yesu.