Yesu Onnapaka Miteko Mitokweene O Kafarnau

Yesu aahaawopa amuhuserya asese—Petro, Antreya, Yakopo, ni Yohani—wi yaatotheke achu. Vano, nihiku Nawoorowa, awo annaya musinakooka o Kafarnau. Yesu onnahusiha musinakooka, nave wanawiili achu annatikhiniheya ni mukhalelo awe wa ohusiha. Owo oneerano hiiha ntoko muchu orino otokweene nave ohiya ntoko alipa oorepa.

Mu nihiku nenla Nawoorowa mulopwana orino munepa woonanara ori vaava. Mu sinakooka mwemmo, mulopwana onnapacerya onyakula: “We Yesu o Nazaré! Hiyo nòkhalano etxhu ni weyano? Weyo warwela onimwarya? Mi kìhosuwela: we wa awela a Muluku.” Alamulelaka munepa yoowo onamuhoosa mulopwana, Yesu onnaloca: “Màlá, ni khumá mwa mutxhu ola!”—Marko 1:24, 25.

Mu elukuluku yeeyo, nsololo ninnamurihela mulopwana vathi nave onnanyakula vatokovene. Nyenya nsololo ‘ninnakhuma mwa yowo nihimvorihaleru.’ (Luka 4:35, Nlakano Nahihano) Achu ari moorukurerya musinakooka annakhala ootikhiniheya! “Ti seni ela?” awo annakoha. “Òkhalano ikuru ophiyerya olamulela minepa sonanara, nave iho sinnamwiwelela.” (Marko 1:27) Mwawooneya, michaka vooloca sa yeela sinnamwaramwaseya ophiyerya Kalileya oothene.

Ekhumaka musinakooka, Yesu ni amuhuserya awe annaya veechokoni ya Simoni, naari Petro. Weiwo apwiyamwana a Petro yaaniiceliwa vatokovene mwiili woothene. Awo yaamveka Yesu wi aakhaviherye. Mwawiihiiha Yesu aahuuramela wa yaawo, apharela ntata naya, nave aaviiha. Ehilekenle yaapenuwa nave annapacerya omuleela Yesu ni amuhuserya yaari ni yoowo wi eweherye, akhweya erehereryaka yoolya wa yaawo.

Nsuwa nimorelakamo, achu ancipale annarwa veechokoni ya Petro ni areca aya. Moohilekela enakhala wi achu oothene a epooma ethukumanne vamukhorani. Ntakhara heeni? Awo anachuna openusiwa. Mweeparipari, ‘Othene yarino alipa awitxeliwa a iretxa sa miloko miloko, annamuruhela Yesu, nave owo amukuheryaka mata mutxhu ti mutxhu awitxeliwa, onnapenuwa.’ (Luka 4:40) Chiryene, moohipwacha mukhalelo wa ereca, Yesu onnaakhaviherya, hiiha ntoko yaaloheryiwaaya. (Isaiya 53:4) Ophiyeryatho yaawo arino minepa soonanara onnawoopola. Vaavaa minepa soonanara inakhumaaya, iho sinnakhuwela: “Weyano wa Mwana a Muluku!” (Luka 4:41) Nyenya Yesu onnoopopiha nave haneemererya wi iloceke echu. Iho soosuwela wi owo ti Kristu, nave owo hanachuna wi ikhale ntoko sinnamurumeela Muluku eeparipari.