“Sotxheka sà Soleveleliwa”

Achu a mapuro oorakamela anniiwa vooloca sa Yesu. Ancipale annapaka mikwaha ovinyerya mapuro oovila ophiyawo wi yanwiriyane ahusihaka nave yoone miteko sawe sootikhiniha. Nyenya, emanle mahiku vakhaani owo onnakookela o Kafarnau, nipuro nawe na muteko. Michaka vooloca sa okooka wawe sinnamwaramwaseya mwawaakuveya ophiyerya epooma enakhala museresere wa Eniya yo Kalileya. Ntoko yookhumelela, ancipale annarwa veechokoni oreiyevo. Akina Afarisi ni ahusiha a Nlamulo anarwa mapuro oothene o Kalileya ni Yuteya, ophitaanyerya o Yerusalemu.

‘Annathukumana atxhu antxipale ophiyerya osareya ni mpithela mwene. Owo onnàlèla masu a Muluku.’ (Marko 2:2) Nipuro nri nooreheryeya ntakhara echu yookhweleyaxa. Ela yaweereya enanikhaviherya omuthamalela Yesu ookhalano ikuru sa omalihavo yeeyo enatannya makacamiho aachu ni orehererya okumi wa yaawo onaathanleiye.

Vaavaa Yesu onahusiheiye muloko mpa, alopwana asese annamuruuha mulopwana orino nanceeche va nipha. Awo anachuna wi Yesu ampenuse nthamwene aya. Nyenya nthowa na muloko, awo hanawerya “ophiya wa Yesu.” (Marko 2:4) Nkaanyiheryani mukhalelo eyo enaakhulumulaaya! Awo annawela vampani nave annamwarya ipatho. Annavoliiha mpa nipha orivo mulopwana a nanceeche.

Apwanne Yesu onnanyeenyeya nthowa na okwateleliwa? Hooye! Owo ootepa otikhiniheya ni nroromelo naya nave onnaloca wa mulopwana a nanceeche: “Sotxheka sà soleveleliwa.” (Mateu 9:2) Apwanne Yesu onnawerya olevelela soocheka elukuluku yeela? Alipa oorepa ni Afarisi annavaanyihana yaawoyaawo vooloca sa mwaha yoowo: “Onalotxelani hiha? Onamuruwana! Tani onawerya olevelela sotxheka ahikhanle Muluku pahi?”—Marko 2:7.

Asuwelaka miyuupuwelo saya, Yesu onnaloca wa yaawo: “Munupuwelani hiha mmurimani mwanyu? Enakhweyasa t’evi, omulèla mulipa a nantxetxhe wi soleveleliwa sotxheka sà, nari wi ovinye, okuse nipha nà ni wetxeke?” (Marko 2:8, 9) Aai, mmathipelo a mukucho yoowo Yesu aahaaleiye ovaha, owo aanwerya olevelela soocheka sa mulopwana.

Voocharela, Yesu onnooniherya muloko wa achu, ophitaanyerya yaale anamwaakaaha, wi owo ookhalano owerya wa olevelela soocheka veelaponi. Owo onnarukunuwela wa mulipa a nanceeche nave onnamulamulela: “Kinnoruma we, vinyà, kusá nipha nà, onarowa owannyà!” Nave mulopwana mwawaakuveya onneerano yeeyo, onneeca apharenle nipha nawe vamiithoni va oothene emoonaka. Achu ari ootikhiniheya! Awo annamucicimiha Muluku nave annaloca: “Hantonko wona etxhu si yela!”—Marko 2:11, 12.

Enakhala yawooneya wi Yesu olonce soocheka mwawiiwanana ni ereca nave oleveleliwa wa soocheka onanwerya olikanyihiwa ni openuwa oomwiilini. Piipiliya onnanihusiha wi tiithi ahu oopacerya, Atamu, aacheka nave oothene ahu noorava sookhumelela sa yoocheka, yeeyo eri, ireca ni okhwa. Nyenya mu olamulela wa Omwene wa Muluku, Yesu onahaala olevelela soocheka sa oothene yaale anamusivela ni omurumeela Muluku. Voocharela ireca inahaala omalihiwavo okhala wookhala.—Aroma 5:12, 18, 19.