Ochuneya Waya Olevelela

Petro ohiiwa miruku sa Yesu vooloca sa mukhalelo wa omaliha ohiiwanana variyari va anna eeli, moorweela wa weererya omaliha mwaha apiili aya. Vano enooneya wi, Petro onachuna osuwela ikwaha kavi muchu onaphwaneleiye weerano yeela.

Petro onnamukoha Yesu ariki: “Mukhwaka akitxhekelà, kimulevelele vahai? Wakhweya kimulevelele itila thanu na pili?” Asitokweene akina amulapelo anahusiha wi muchu onaphwanela olevelela ikwaha raru pahi. Mmukhalelo yoola, Petro onoona wi aahaala okhala amahalaxa, wakhala wi oomulevelela mukhwaawe “itila thanu napili.”—Mateu 18:21.

Nyenya, moonelo yoola wa weerenka ikwaha kavi muchu ochekeliweiye, honiiwanana nnihusiheryo na Yesu. Mwawiihiiha Yesu onnamookolola Petro ariki: “Nkinolèla wi omulevelele itila thanu napili, nto kinnolèla wi omulevelele itila makhumi mathanu nameli wulùla vathanu napili.” (Mateu 18:22) Mmasu makina, ela enataphulela oheerenka. Hiwaavo mphimo naari ikwaha kavi Petro aaphwaneleiye omulevelela mukhwaawe.

Voocharela Yesu onnaloca niphwanaphwaniho wa Petro ni akina, wi aaleele ochuneya waya olevelela. Nno nri vooloca sa kapuro yoowo ohitakihenrye oreera murima wa pwiya awe. Mwene onachuna orehererya miyaha ni akapuro awe. Kapuro mmoha orino evaale etokotoko ya italento 10.000 [itenariyu 60.000.000] onnakerihiwa wa mwene. Owo haanono mukhalelo wa oliva evaale eyo. Mwawiihiiha mwene onnalamulela wi atumihiwe kapuro ole, mwaariye, vamoha ni anamwane awe wi oweryeye oliviwa evaale. Mu elukuluku yeele, kapuro ole onnakokhora vamiithoni va pwiya awe, nave onnanveka ariki: “Kivahe mahiku vakhani. Yavirà yawo, kinamuliva sothene.”—Mateu 18:26.

Mwene ni oreera murima vamoha ni ikharari onnalevelela evaale ya kapuro ole. Amanle mwene weerano yeela, kapuro ole arowaka onnakumana ni kapuro mukhwaawe yoowo omusiyanre ikhorowa savakhaani sa itenaariyu 100. Owo onnamphara esiko nave onnamuhirikinya, ariki: “Okokihe ikhorowa saka.” Kapuro ole, onnakokhora vamiithoni vawe nave amveka ariki: “Kivahe mahiku tonto ni kinamoliva sothene.” (Mateu 18:28, 29) Nyenya, kapuro yoole oleveleliwe evaale awe ni mwene, hamutakihenrye pwiya awe. Owo onnamukuxa kapuro mukhwaawe, orino evaale yavakhaani, anwalela mukariposo ophiyerya omuliva yeeyo osiyanreiye.

Voocharela Yesu onnaloca wi akapuro akina anamoona kapuro ole ahimmorelaka ikharari mukhwaawe, annaya omuleela pwiyaya, nave moonyeenyeya mwene onnamwiichaniha kapuro ole. Nave owo onnaloca: “Mutxhu ònanara murima, miyo kìholevelela mankau othene, wona wi wàrimukiveka. Weyanotho hiwawerya ommorela ikharari mukhwa à, ntoko miyo komorenlaka ikharari?” Ni esara, mwene onnalamula wi awaleliwe kapuro ole oohimoriwa ikharari, ophiyerya oliva evaale yoothene. Yesu onnakuchula niphwanaphwaniho ariki: “Hihatho anan’werelano Atithi aka a wirimu, mwahinalevelelana ni murima wothene.”—Mateu 18:32-35.

Nihusiho naphaama nnahuseryaahu vooloca sa olevelela! Muluku onnanilevelela evaale etokotoko ya soocheka sahu. Yoocheka eri yoothene munna naari murokora onanipakeleiye tahi echu etokotoko moolikana ni soocheka nnamweerelaahu Yehova. Nave Yehova onnanilevelela ohiya ekwaha emoha, nyenya ikwaha soohaalakhanyeya. Apwanne hinnaphwanela waalevelela akina ikwaha sincipale, naamwi nrino mathowa oophwanelela? Hiiha ntoko Yesu ohusinheiye va Mwaha wa Vamwaakoni, Muluku onahaala ‘onlevelela sotxheka sahu, ntoko hiyotho nnalevelelahu antxhekenle.’—Mateu 6:12.