Onnahusiha Ayaaka o Yerusalemu

Mu elukuluku, Yesu otikithenrye muteko awe pahiru o Kalileya, weiwo achu anaakhulelaayawo phaama opwaha o Yuteya. Opwaha yeeyo, vaavaa aareiye o Yerusalemu nave aampenusa mulopwana nihiku nawoorowa, “Ayuda yàkhwela omwipha.”—Yohani 5:18; 7:1.

Ela elukuluku ya elimwi, eyaakha ya 32 E.K., nave Efesta ya misakala yohaacamela. Efesta ela enamaliha mahiku mathanu nameeli, voocharela onneereya muthukumano mutokweene mu nihiku naneethanu nararu. Efesta ela enooniherya wi ohaca woomala, nave ela elukuluku ya ohakalala ni othamalela.

Asinna oomaayi a Yesu, Yakopo, Simoni, Yosefe, ni Yutasi annamulopola eriki: “Ovinyevo vava ni oye o Yudeya.” Yerusalemu nipuro ntokweene na malapelo a elapo. Onnatepa waaciwawo variyari va ifesta raru ineeriwa vayaakhani. Nave asinna a Yesu annaloca: “Havo onalapa wiphini, akhwelaka osuweliwa t’atxhu. Wona wi onnera itxhu seiha wisoneihe wa elapo.”—Yohani 7:3, 4.

Mu elukuluku yeeyo, asinnawe yaala axexe “hiyamwemererya” ntoko Mesiya. Naamwi hiiha awo anachuna wi achu yaale athukumanne emoone Yesu eerakano sootikhiniha. Asuwelaka yawoopiha yeeyo, onnaaleela: “Elapo henawerya owitxani nto ennakitxa miyo, wona wi kinahelela onamona wi miteko saya iri sonanara. Haweni nyuwo efesta, miyo nkinayawo, ntakhara elukuluku aka nivano hiyakhwanne.”—Yohani 7:5-8.

Mmahiku vakhaani asinna a Yesu ni alipa aweeca akina emanle okhuma mu epooma yeele, Yesu ni amuhuserya awe annacimula moovitheya wi ehooniwe ti ancipale. Awo anachara mphiro onookola khuluwi oyaka o Samariya, ohiya ochara ephiro ancipale anaviraayawo, waacamela Muhice Yortano. Yesu vamoha ni amuhuserya awe anamuchuna nipuro na ohaya, o Samariya, mwawiihiiha Yesu onnaaruma anamichaka wi yaavye nipuro. Achu a muceche mmoha annakhooca owaakhela nthowa nawi Yesu onaya o Yerusalemu ntakhara efesta ya Ayuta. Yakopo ni Yohani enyeenyen’ye annakoha: “Pwiya, onnakhwela wi niveke ekoi ya moro oweyele?” (Luka 9:54) Yesu onnaasamela nthowa na yeeyo, nave awo annakookela mukwaha aya.

Erikimweeca, mulipa oorepa mmoha aahi wa Yesu: “Muhusiha, miyo kini kinamotxhara weiwo onerawe oyekewo.” Yesu onnamwaakhula: “Ananthala àkhalano makhuku ni ipalame sosulu sokhalano ipuru saya, nto Mwana a mutxhu hano nipuro wokuhavo muru awe.” (Mateu 8:19, 20) Owo onachuna omuleela mulipa orepa wi onahaala okumanano makacamiho wakhala wi oheemererya okhala oomuchara awe. Nave enakhala wi, mulipa oorepa ole tawiirumiha wi eemererye mukhalelo ola wa okumi. Mmoha ti mmoha a hiyo, onamweera phaama wiikoha: ‘Apwanne kohiiveleela ni murima woothene omuchara Yesu?’

Wa mulopwana mukina, Yesu onnaloca: “Okitxhareke!” Mulopwana ole aahi: “Pwiya, kihiye kipatxerye wavitha atithi.” Asuwelaka mukhalelo wa mulopwana ole, Yesu onnamwaakhula: “Wahiye alipa òkhwa evithaneke; nto weyano hawé walaleryeke Omwene wa Muluku.” (Luka 9:59, 60) Mwawooneya, atiithi a mulopwana ole hiyaakhwile. Waakhanle wi aakhwa, mwaana ole hakakhanle vaavale elukuluku yeele alocaka ni Yesu. Owo haari ooreheryeya wi akuhe Omwene wa Muluku mu nipuro noopacerya mu okumi awe.

Nlelo erikimweeca eyaaka o Yerusalemu, mulopwana mukina onnaloca ni Yesu ariki: “Apwiya kinotcharani Nyuwo; nyenya mupacherye okemyererya kalanyaneno a o’mpa waka.” Yesu onnamwaakhula: “Havovo mutchu aphanre ehipa etokwene, anaweha’tho sochuli, anaphwanela Omwene wa Muluku.”—Luka 9:61, 62, Nlakano Nahihano.

Yaale anachuna okhala oomuchara eeparipari a Yesu, anaphwanela otikitherya miitho aya mu Omwene. Wakhala wi mulipa olima hanaweha ohoolo, hani eerevo echu. Wakhala wi oopacerya olima nave anaweha oculi, onahaala olimaka ayaaka ochu okina nave ophiyerya wiikakacha. Moolikana, muchu ti muchu onaweha oculi mu elapo ela yootakhala, onahaala opheruwa mu ephiro enakeriha wookumini woohimala.