Yesu Onnamurehererya Parataiso Nave Onnakuchula Murici Awe

Elukuluku vakhaani Yesu amanle opatisiwa, owo aaheehiwa ni mwiicani yoowo aarino yoolakelela ya omuchekiha naamwi ahaakumve opacerya muteko awe woolaleerya. Chiryene, Musaserya aaheererya omweeha Yesu mwawuuluulela. Ohoolo waya, Yesu aahiloca sa mwiicani owo ariki: “Mutokwene a elapo onnarwa; yowo hanawerya etxhu ni miyo.”—Yohani 14:30.

Murummwa Yohani oohoona mu eneneeryo echu enahaala weereya ni “enama yeyo etokwene, enowa yele yakhalai, enitxhaniwa Musaserya nari Satana.” Mwiicani owo a achu, aahaala ovonyiwa wirimu, arino “owali mutokwene vosuwela wi elukuluku awe ehanle vakhani.” (Wupulula 12:9, 12) Akristu aakhalano mathowa aphaama a weemererya wi anakhala variyari va elukuluku “vakhani” nave wi moohilekela “enama yeyo etokwene, enowa yele yakhalai,” enahaala oriheliwa mu nlici nawiisa mu miyakha ncikhwi nimoha, vaavaa Yesu oneereiye alamuleleke mu Omwene wa Muluku.—Wupulula 20:1, 2.

Variyari va elukuluku yeeyo, tiheeni eni yeereye mu elapo ahu yeela yavathi? Taani oni akhale veelaponi, nave ni mikhalelo taani? Yesu mwaneene oovahererya maakhulo. Mu niphwanaphwaniho nawe vooloca sa ipucepuche ni ipuri, owo aahooniherya omwaahiyu taani anaweheryaaya achu awookololowa analikana ni ipucepuche, yaawo aniiwanana ni yoowo nave anapaka ichu saphaama ntakhara anna a Yesu. Owotho aahiloca mookwakwaleya echu yaahaala weereya ni yaale anapaka moohiyana, yaawo analikana ni ipuri. Yesu aaloca: “Nave yala [ipuri] anarwa eya wa ekoi yohimala, ni atxhu aphama [ipucepuche] wa ekumi yohimala.”—Mateu 25:46.

Ela ennanikhaviherya wiiwexexa masu a Yesu wa mpava yoowo aari makupa awe vamwirini woohoosa. Yesu hamvanhe mulopwana ole ewehereryo emohamoha yeele aalaihenryeiye arummwa awe oororomeleya ya opaka makupa mu Omwene wa wirimu. Moohiyana, Yesu aamulaihenrye mpava ole aarukununse murima ariki: “Eparipareene kinnooleela olelo, onarwa okhala ni miyo Mparataiso.” (Luka 23:43, Tradução do Novo Mundo) Mwawiihiiha mulopwana ole aahaakhela ewehereryo ya okhala Mparataiso—mpuro wooreera naari emaca ya kapinka. Muhoolo, vaavaa Yesu oneereiye aathorihe achu, yaale eni yooniwe ntoko ipucepuche ni yaale anavolowa mu “ekumi yohimala” anahaalatho okhala mu Parataiso yoowo.

Eyo enniiwanana ni masu yaawo murummwa Yohani aalonceiye sa makhalelo yaawo eni ekhale veelaponi yavathi. Owo aaloca: “Onani empa ya Muluku veri va atxhu: yowo onamukhala ni yawo nave awo anamukhala nloko nawe. Owo oni akhale Muluku ni yawo. Muluku onanvuta mithori aya, nave horwa okhalavotho okhwa nari winla, nari ikutxho, nari witxela, wona wi sakhalai sòvira.”—Wupulula 21:3, 4.

Wi mpava ole apuhe ekumi Mparataiso, owo onaphwanela oviihiwa mookhwani. Nave hani akhale meekheiye oni akhalano yaweereya yeeyo. Yesu aahooniherya mookwakwaleya vaavaa aalonceiye: “Enamurwa elukuluku atxhu othene ari mmahiyeni aneraya yiwe nsu nawe, nave anamukhumamo yale yenre saphama, wi evinye mokhwani eyaka mwekumini; ni yale yenre sonanara, wi evinyerye othoriheliwa ekoi.”—Yohani 5:28, 29.

Nyenya hanka vooloca sa arummwa oororomeleya ni akina awaalakhanyeya eni ekhale vamoha ni Yesu wirimu? Piipiliya onnaloca: “Anamukhala alipa a mukutxho a Muluku ni a Kristu, nave anamulamula ni yowo miyakha ntxikhwi nimoha.” (Wupulula 20:6) Yaawo eni elamulele vamoha ni Kristu anahaala okhala alopwana ni athiyana a veelaponi yavathi. Mwawiihiiha awo chiryene anahaala okhala alamuleli a wirimu oomoriwa ikharari wa oothene yaale anakhala veelaponi yavathi.—Wupulula 5:10.

Yesu onahaala opharihela muteko mukucho awe wa woopola ntakhara achu veelaponi yavathi nave onahaala oviihavo yoocheka. Owo vamoha ni alamuleli akhweiye anahaala oweeriha achu oororomeleya okhala oophaameya. Mweeparipari, achu anahaala opuha ekumi yeeyo Muluku aalakelenleiye woopaceryani wa yaawo vaavaa aamulenleiye Atamu ni Eva wi yaaceereryane ni esareye veelaponi. Ophiyeryatho okhwa yoowo ori yookhumelela ya yoocheka ya Atamu horwa okhalavo!

Mwawiihiiha, Yesu onahaala okhwaaniherya soothene Yehova aamvenkeiye wi apake. Omakuchuwelo wa Olamulelo awe wa Masanaru Khumi, Yesu onahaala operekha Omwene vamoha ni emusi yoophaameya ya achu wa Tiithi awe. Vooloca sa yaweereya yeela yootikhiniha ya wiiyeviha wa Yesu, murummwa Paulo aahirepa: “Nave Muluku akuhà itxhu sothene vathi va ikuru sa Mwana, yolatho onamukhala vathi va ikuru sa Atihti avan’he sothene. Nave hiha, Muluku onamukhala sothene mwa othene.”—1 Korinto 15:28.

Enakhala yawooneya wi Yesu ookhalano murici wookhweleya mu okhwaaniheryeya sookhwela sasisapo sa Muluku. Nave vaavaa sookhwela iho ineeraaya ititelele okhwaaniheryeya okhala wookhala, owo onahaala okhala mwawiiwanana ni masu aalonceiye wa yoowo mukhateiye: “Miyo, ephiro, eparipari, ekumi.”—Yohani 14:6.