MWAHA 1
Ooreheryeya wi Yeereno Yookhwela ya Yehova
ORUKURERYA elapo, aakhalavo marehereryo mancipale a malapelo, ipoliitika, maroca ni mikhalelo soohiyanahiyana sa okhala, soolakelela, miyoonelo ni masuwelelo. Nyenya aakhalavo marehereryo mamoha ari oohiyana ni oothene yaawo. Masu a Muluku annasuwanyeiha mookwakwaleya marehereryo yaawo ntoko Anamoona a Yehova.
2 Nnanwerya oloca wi muri oohakalala okhala vamoha ni marehereryo a Yehova. Mmanle osuwela mukhatiinyu tiivi eri yookhwela ya Muluku, vano munneerano yookhwela yeeyo. (Sal. 143:10; Aro. 12:2) Nyuwo mwa namuteko oowetha munarumeela vamoha ni onnaahu woosivela wa veelaponi yoothene. (2 Kor. 6:4; 1 Ped. 2:17; 5:9) Ntoko Masu a Muluku alaihenryaaya, eyo ennaruuha mareeliho ni ohakalala wawaaca. (Masi. 10:22; Mar. 10:30) Moorweela wa opaka yookhwela ya Yehova olelo moororomeleya, nyuwaano muniirehererya ntakhara omwaahiyu waphaama ni woohimala.—1 Tim. 6:18, 19; 1 Yoh. 2:17.
3 Mpatuxa Ahu Mutokotoko ookhalano marehereryo avameekhaaya veelaponi yoothene, analamuleliwa mmukhalelo woomuluku. Ela enataphulela wi marehereryo yaawo analamuleliwa ni Yehova, ori Muhooleli a ichu soothene. Ninnamuroromela moomalela. Owo Muhooleli, Mulamuleli, ni Mwene ahu. (Isa. 33:22) Woona wi Muluku tooreheryeya, owo oopaka marehereryo ananeeriha ‘olapa vamoha ni yoowo’ mwawiiwanana ni yookhwela awe.—2 Kor. 6:1, 2.
4 Vaavaa makuchuwelo a elapo anaacamelaaya, hiyo ninnaya vahoolo nihooleliwaka ni Mwene ahu oothanliwa, Kristu Yesu. (Isa. 55:4; Wup. 6:2; 11:15) Yesu aaloca wi oomuchara awe yaahaala opaka miteko mitokotoko opwaha seiyo aapankeiye variyari va orummwa awe veelaponi ya vathi. (Yoh. 14:12) Eyo yaahaala weereya nthowa nawi oomuchara a Yesu yaahaala waaceereryeya ophiyerya okhwaaniherya ekulucu. Nave yaahaala oviravo elukuluku. Awo yaahaala olaleerya michaka yaphaama ya Omwene ophiyerya weiwo elapo ekontaayawo.—Mat. 24:14; 28:19, 20; Saw. 1:8.
5 Ela yoomala wooniwa wi eparipari. Nyenya, ntoko Yesu olonceiye, olaleerya michaka yaphaama onarwa omala mu elukuluku yeeyo Yehova olakelenleiye. Sawooniherya soothene sa Masu ooloherya a Muluku sinooniherya wi nihiku ntokotoko ni nawoopiha na Yehova nohaacamela.—Yow. 2:31; Sof. 1:14-18; 2:2, 3; 1 Ped. 4:7.
Nnaphwanela wiilipiserya wi neereno yoochuna ya Muluku. Onachuneya osuwela phaama mukhalelo marehereryo a Yehova aneecaaya.
6 Vaavaa nniiwexexaahu tiivi eri yookhwela ya Yehova mweelukuluku yeela yawaakuveya, nnaphwanela wiilipiserya wi neereno yoochuna ya Muluku. Wi neereno yeeyo, nnaphwanela osuwela phaama mukhalelo marehereryo a Yehova aneecaaya ni ochariha moomalela. Marehereryo a Muluku analapa mwawiiwanana ni malakiheryo a Mpiipiliyani, malamulo, mathoriheryo, ikano, ni mahusiheryo anaphwanyeya Mmasu ooveereliwa a Muluku.—Sal. 19:7-9.
7 Vaavaa achu a Yehova anacharihaaya malakiheryo yaala a Mpiipiliyani, awo anakhala nave analapa vamoha mwawiiwanana ni mmureceleni. (Sal. 133:1; Isa. 60:17; Aro. 14:19) Tiheeni enalipiha wiiwanana variyari va annihu a makupa oothene? Osivela. Nnaceenyeryiwa nave nnahooleliwa moosivela. (Yoh. 13:34, 35; Kol. 3:14) Nthowa na wiiwanana yoola Muluku onanivaheiye, ninnatitelela weeca vamoha ni makupa a wirimu a marehereryo a Yehova.
MAKUPA A WIRIMU A MAREHERERYO A YEHOVA
8 Alipa a miririmu Isaiya, Taniyeli ni Esekiyeli yaahikhalano sawoona sa makupa a wirimu a marehereryo a Yehova. (Isa., ekap. 6; Ezek., ekap. 1; Dan. 7:9, 10) Murummwa Yohani aakhalanotho yawoona ya wirimu nave mu liivuru a Wuupulula, onnooniherya mukhalelo akhanlaaya marehereryo yaawo. Owo aahimoona Yehova va munyukhu woocicimiheya vamoha ni ankeelo yaawo yaaloca eriki: “Aweela, aweela, aweela ti Apwiya Muluku, mwaneene a ikuru soothene, yoowo aari, yoowo ori ni yoowo anii arwe.” (Wup. 4:8) Yohani aahoonatho “veeri va munyukhu . . . epucepuche,” ya Muluku, Yesu Kristu.—Wup. 5:6, 13, 14; Yoh 1:29.
9 Wa nthowa nawi yawoona yaahimooniherya Yehova akiranthe va munyukhuni, eyo enooniherya wi owo Muhooleli a marehereryo yaala. Vooloca sa yoowo ni otokweene awe, 1 Matharihelo 29:11, 12 oni: “Nyuwo muri mutokotoko, mwa ikuru, a ncicimiho, awarya ni olamula! Soothene sa wirimu ni sa vathi ti sawinyu, nyuwo Apwiya moovuwa, munalamula vasulu va soothene. Mu ntata nanyu tonarwamo muhakhu ni ikuru. Ti nyuwo munalamula soothene, munaavaha achu owerya ni otokweene.”
10 Ntoko namuteko mukhwaawe a Yehova, Yesu Kristu, ookhalano makupa a vasuluxa wirimu nave ohaakhela owerya otokweene. Chiryene “Muluku aamutikitherela soothene wi alamuleleke, amuveleela yoowo wa muloko, yoowo ori muru wa ichu soothesene.” (Éfe. 1:22) Murummwa Paulo aaloca sa Yesu: “Muluku tho aamwinnuwihasha amvaha nsina noopwaha masina oothene, wi mu nsina na Yeesu, makutha oothene emukokhorele, a yaawo ari wirimu, veelaponi ni vathi veelapo, nave malumi oothene elaleye wi Yeesu Kristu ti Apwiya, Muluku acicimihiwe.” (Fil. 2:9-11) Hiiha, nnanwerya ororomela moomalela ohoolela weekhaikhai wa Yesu Kristu.
11 Mu yawoona emoha, mulipa miririmu Taniyeli aamoona Mutokweene a Mahiku va Munyukhu vawe wirimu, nave aahiwoona tho “yaawo yaamulapa amiile amiile ene [a ankeelo]; akina amiileru yaanaweherya orummwa.” (Dan. 7:10) Piipiliya onnathariha nikhuuru nenla na ankeelo ntoko “minepa soorummwa walapa ni wakhaviherya achu enii yaakhele ovulushiwa.” (Ahe. 1:14) Soopatuxiwa soothene seiya soomunepani iri sooreheryeya mu ‘omwene, olamula, otokweene ni owerya.’—Kol. 1:16.
12 Vaavaa nnuupuwelelaahu ichu seiya sa makupa a wirimu a marehereryo a Yehova, ninnawerya wiiwexexa moonelo wa Isaiya vaavaa aamonneiye “Pwiya akilanthe omunyukhuni woomwene awe woosulu ni woocicimiheya” nave “osulu waya yaakhalawo ankeelo oovarela.” Isaiya aahi: “Khoo, vano koorimeela! Ka muchu oonanara eyano, kinakhala tho veeri va achu oonanara iyano, vano, miitho aka amoona mwene, Apwiya mwaneene a ikuru soothene.” Moohikhwa minikwa, Isaiya aahikhala ootikhiniheya nave aaniisoona ohikhala echweenevo vaavaa iiwexenxeiye wunnuwa wa marehereryo a Yehova. Yaweereya yeela yaamvolowela vancipale ophiyerya wi vaavaa waakhummaaya nwopelo wirimu wa oolaleerya othoriha wa Yehova, moonelo wa Isaiya waari: “Miyo kiriva! Mukirume.”—Isa. 6:1-5, 8.
13 Osuwela ni othamalela marehereryo a Yehova onnaaceenyerya achu Awe mmukhalelo mmohamoha. Vaavaa mareheryo anayaaya vahoolo, ninnaavya ochariha mukhalelo aneecaaya. Ninniilipiserya wooniherya wi ninnaroromela marehereryo a Yehova mmahiku ahu.
MAREHERERYO A YEHOVA ANNAYA VAHOOLO
14 Mu ekapitulu 1 ya yooloherya ya Esekiyeli enamuloca Yehova eecihaka ekaaro etokotoko ya wirimu. Ekaaro eyo yootikhiniha enooniherya makupa oohooneya a marehereryo a Yehova. Owo oneeciha moosivela mwawiiwanana ni yoochuna awe.—Sal. 103:20.
15 Mpuwa mwa nseko ti nseko na ekaaro yeeyo nookhalamo nikina nrino mannuwelo mamohamoha. Ti nthowa nene enalociwaaya wi “maseko yaale yaaneeca makupa oothene oomasheshe.” (Ezek. 1:17) Maseko awo ananwerya okocoopa mwawaakuveya. Nyenya ekaaro eyo tahi wi eneeca pure ehirino muhooleli. Yehova haneemererya wi marehereryo awe echareke makupa ari oothene weiwo enachunaaya oyawo. Yoorepa ya Ezekiyeli 1:20 eni: ‘Ikumi seiye seeca siyaaka weiwo munepa waahoolelaayawo.’ Mwawiihiiha, ti Yehova oneeriha wi marehereryo awe eye makupa ari oothene weiwo munepa onahoolelaayawo. Nnaphwanela wiikoha: ‘Apwanne kinnachariha weeca wa marehereryo yaala?’
16 Ochariha marehereryo a Yehova onnaphitaanyerya sincipale ohiya pahiru oya o mithukumano ni muteko woolaleerya. Woopaceryani, eyo eneereya nthowa na oya vahoolo ni wunnuwa omunepani. Hiyaano, ‘ninnasuwela othalela eri yaphama’ nave ninnakhalano miselo mivyaani sa marehereryo a yoolya yoomunepani. (Fil. 1:10, BNM; 4:8, 9; Yoh. 17:3) Ohiya yeeyoru, nnaphwanela wuupuwela wi orivo marehereryo, wookhalavo wiiwanana waphaama ni okhaviheryana. Hiiha nnaphwanela osuwela wi ti woochuneya opharihela mikhalelo ni mavyakelo oomunepani ni sookhalano seiyo Yehova onivanheiye wi niphare muteko awe. Vaavaa nnacharaahu ekaaro ya wirimu ya Yehova, ninnakhala mwawiiwanana ni muchaka nnalaleeryaahu.
17 Nnikhaviheryo na marehereryo a Yehova, oothene ninnaya vahoolo, nipakaka moohihiyererya yookhwela ya Muluku. Muupuwele wi mulipa a weeciha ekaaro ya wirimu ti Yehova. Mwawiihiiha, ochara ekaaro eyo enooniherya wi ninnamucicimiha Yehova nave ninnaroromela Mwaako ahu. (Sal. 18:31) Piipiliya onnalaiherya: “Apwiya annavaha ikuru achu aya, Apwiya annaareeliha achu aya ni murecele.” (Sal. 29:11) Woona wi nri mmarehereryo a Yehova olelo, ninnaakhela ikuru onanivaheiye nave ninnapuha murecele yoowo onaareeliheiyeno achu awe ooreheryeya. Moohikhwa minikwa, nnamukhalano mareeliho vaavaa nnapakaahu yookhwela ya Yehova hiihaano ni okhala wookhala.