Mukhalelo Muloko Orehereryiwaaya ni Ohooleliwa Waya

MU EKAARATA awe yoopacerya wa Akorinto, murummwa Paulo aahiloca eparipari yoochuneya vooloca sa Muluku. Paulo oorepa: “Ti wi Muluku, tahi Muluku awaakanyerya, nto a murecele.” Voocharela, alocaka sa mithukumano sa muloko, owo oriye: “Nto soothene seereyeke moophwanelela ni mwa weereranyeya.”— 1 Kor. 14:33, 40.

² Omapacereryo wa ekaarata awe, Paulo aahilopola sa ohiiwanana waarivo mmuloko wo Korinto. Owo aahaaceenyerya anna awo wi ‘yeemereryaneke mu sooloca saya’ wi ‘yiiwananeke, ekhaleno muupuwelo mamoha ni yoochuna emohamoha.’ (1 Kor. 1:10, 11) Voocharela owo aahaalopola vooloca sa miyaha seiyo saananariha wiiwanana mmulokoni. Alikanyihaka ni mwiili wa muchu, owo aahooniherya ochuneya wa wiiwanana ni olapa vamoha. Owo aahaaceenyerya oothene mmulokoni okhapelelana mukina ni mukhwaawe moosivela, moohipwacha murici wa muchu. (1 Kor. 12:12-26) Wiiwanana yoola variyari va yaale a mmulokoni yawooniherya wi waahaala okhala wooreheryeya.

³ Nto muloko Weekristu waahaala oreheryeya hai? Taani aahaala orehererya? Waahaala okhalano mathipelo taani? Taani yaahaala okhalano mirici wi erumeele? Wakhala wi nompharihela Piipiliya ntoko yoohoolela, nnamukhalano maakhulo ookwakwaleya vooloca sa makoho yaala.—1 Kor. 4:6.

OREHEREYA MMUKHALELO WOOMULUKU

⁴ Muloko weekristu waatikitheriwe nihiku na Pentekoste a 33 E.K. Tiheeni nnasuwelaahu sa muloko wa nsana noopacerya? Owo waari wooreheryeya nave waahooleliwa mmukhalelo woomuluku, eyo tiwi, moorweela wa olamulelo (kraʹtos) wa Muluku (the·osʹ). Masu yaala meeli a Ekiriki anaphwanyeya mu 1 Pedro 5:10, 11, ataphuleliwe “owerya” ni “Muluku.” Echu yeeyo yeeren’ye o Yerusalemu iyaakha 2.000 ivirale, ennooniherya wi muloko wa Akristu oothanliwa waatikitheryiwe ni Muluku. (Saw. 2:1-47) Owo waari empa awe, emusi awe. (1 Kor. 3:9; Éfe. 2:19) Muloko Weekristu olelo onachariha malakiheryo mamohamoha a marehereryo yaatikitheryiwe mu nsana noopacerya.

⁵ Muloko wa nsana noopacerya waapacenrye ni oohuserya awaakhwana 120. Yaakhwanelaka yooloherya ya Yoweli 2:28, 29, voopacerya munepa waweela waahiicheliwa wa yaawo. (Saw. 2:16-18) Mu nihiku nenle, achu oopwaha amiile araru yaahipatisiwa nave epacerya opaka makupa a muloko waathanliwe ni munepa waweela. Awo yaaheemererya masu vooloca sa Kristu nave “yaatitelela mmahusiheryo a arummwa.” Voocharela, “nihiku nnihiku Apwiya yaanawaacererya yaawo yii evulushiwe.”—Saw. 2:41, 42, 47.

⁶ Wunnuwa wa muloko o Yerusalemu waanaaceereryeya ophiyerya wi mulipa amukucho mutokotoko a Ayuta aahiloca wi arummwa yaahisareiha muceche ni mahusiheryo aya. Variyari va oohuserya asyaani o Yerusalemu yaahikhalavo anamukucho a Ayuta, yaawo yaapacenrye opaka makupa a muloko.—Saw. 5:27, 28; 6:7.

⁷ Yesu aariye: “[Nyuwaano] munamukeerela onamoona, opacerya muYerusalemu, oYuteya ni oSamariya woothewene, ophiyerya weiwo elapo ekontaayawo.” (Saw. 1:8) Nave saaheereya hiiha. Amanle okhwa Estevau, wiikariwa waahipacerya o Yerusalemu, nave arummwa yaawo yaakhala wiiwo yaahimwalamwalela o Yuteya ni o Samariya woothewene. Nto, wiiwo yaayaayawo, yaanatitelela olaleerya michaka yaphaama ni waapaka oohuserya, ophitaanyerya yaawo yaari a Samariya. (Saw. 8:1-13) Voocharela vaya, michaka saphaama saahipacerya olaleeryiwa wa yaale yahaaxileiwe, naari wi, achu a maloko yaahaari Ayuta. (Saw. 10:1-48) Muteko yoola woolaleerya waahikhaviherya opakeya wa oohuserya ancipale nave miloko mivyaani saahitikitheryiwa mu ilapo ikina.—Saw. 11:19-21; 14:21-23.

⁸ Marehereryo taani yaapakiwe wi miloko soothene seiya mivyaani ikhale sooreheryeya ni ohooleliwa mwawiiwanana ni yookhwela ya Muluku, naari wi, mmukhalelo woomuluku? Moorweela mwa ohooleliwa ni munepa wa Muluku, yaahithanliwa akhaviheryi a mukukhula wi ekhapeleleke muhuwo. Paulo ni Parnapa yaahaathanla asitokweene mmiloko seiyo yeecelelaaya mmukwaha aya woopacerya wa omisiyonaariyo. (Saw. 14:23) Namarepa a Piipiliya Luka, onnaloca sa muthukumano wa murummwa Paulo ni asitokweene a mmulokoni wo Efeso. Paulo aahi wa yaawo: “Phoole, mwiiweherye aneene meekhiinyu ni muloko yoowo Munepa Waweela owunnyerenryaayani wi mukhale ahooleli, wi mukukhule muloko wa Muluku, yoowo othummeiye nnikhami na yoowo mwaneene.” (Saw. 20:17, 28) Awo yaanaphwanela okhala atokweene ntakhara wi yaanakhwaaniherya soovekeya sa Mpiipiliyani. (1 Tim. 3:1-7) Tito, mukhaviheryi a Paulo, aaheemereryiwa waathanla asitokweene mmiloko so Krete.—Tito 1:5.

⁹ Elukuluku saatikitheryiwaaya miloko, arummwa ni asitokweene o Yerusalemu yaanatitelela orumeela ntoko ahooleli a muloko Weekristu mu nsana noopacerya, yoowo waacereryeya mu ilapo ikina. Awo yaarumeela ntoko nikhuuru noolamulela.

¹⁰ Arepelaka muloko wo Efeso, murummwa Paulo aahithariha wi moorweela wa olapa mwawiiwanana ni munepa wa Muluku, muloko Weekristu waanwerya otitelela okhala wawiiwanana moorweela wa wiiwelela ohoolela wa Yesu Kristu. Paulo aahaaceenyerya Akristu a weiwo wi yunnuwihe wiiyeviha nave wi etitelele okhala mu “omoha onarweela wa munepa” ekhalaka mmureceleni ni oothene mmulokoni. (Éfe. 4:1-6) Voocharela aahimuromola Salumu 68:18 nave aahipharihela eyo wa marehereryo a Yehova ntakhara alopwana awiichwelavo omunepani wi erumeele mmulokoni ntoko arummwa, alipa a miririmu, alipa oolaleerya, akukhula ni ahusiha. Alopwana yaala, ntoko samahala sinarweela wa Yehova, yaahaala okhaviherya muloko woothene mmakupa oomunepani mmukhalelo waahaala omuhakalalihaka Muluku.—Éfe. 4:7-16.

MILOKO SA MUTANO SINACHARIHA MEERELO A ARUMMWA

¹¹ Olelo, meerelo mamohamoha a marehereryo annacharihiwa mmilokoni soothene sa Anamoona a Yehova. Vamoha, ninnakhala awiiwanana mmilokoni orukurerya elapo, nihooleliwaka ni oothanliwa ni munepa waweela. (Zak. 8:23) Yesu Kristu onneeriha okhala wooweryeya. Aakhwaniheryaka yoolaiherya awe, moororomeleya onnakhala ni amuhuserya awe oothanliwa, “mahiku oothene ophiyerya makuchuwelo a ilukuluku.” Achu ananvira yaaceereryeyaka mmulokoni, ehuseryaka michaka yaphaama ya Muluku, eveleelaka ikumi saya moomalela wa Yehova, nave epatisiwaka ntoko amuhuserya a Yesu. (Mat. 28:19, 20; Mar 1:14; Saw. 2:41) Awo annamusuwela “mukukhula aphaama” Yesu Kristu, ntoko Muru wa nikhola noothene, nenno nnaphitaanyerya Akristu oothanliwa hiiha ntoko “ipucepuche ikina.” (Yoh. 10:14, 16; Éfe. 1:22, 23) “Muhuwo mmoha” yoowo, onnakhapelela wiiwanana waya moorweela wa osuwela ohoolela wa Kristu mu wiiwelela ephiro ya marehereryo a “namuteko oororomeleya ni amiruku,” yoowo Kristu omuthanlileiye. Nnaphwanela otitelela ororomela ephiro yeeyo enaphariheliwa mmahiku ahu.—Mat. 24:45.

YOOLAKELELA YA MAPURO ANAPHARIHELIWA NI ANAMOONA A YEHOVA

¹² Wi evahereryiwe yoolya mu elukuluku yoophwanelela ni waakhwaniherya muteko woolaleerya michaka yaphaama ehakumve ophiya makuchuwelo, aatikitheriwa mapuro makina ni yoolakelela yeeyo. Mapuro yaawo aweemereryiwa aasuweliwa moorweela wa malamulo a ilapo soohiyana hiyana, nave awo anniiwanana ni makina. Awo annakhweiha olaleeryiwa wa michaka yaphaama elapo yoothene.

MAREHERERYO A IFILIYALE

¹³ Vaavaa enatikitheriwaaya efiliyale, atokweene araru naari opwaha annathanliwa okhala Nikhuuru na Efiliyale wi evareryeleke weeca wa muteko mu elapo yeeyo naari ilapo orimo efiliyale evyaani. Munna mmoha a nikhuuru onarumeela ntoko muhooleli a Nikhuuru na Efiliyale.

¹⁴ Miloko inavareryeliwa ni efiliyale, inarehereryiwa mu ikulucu. Iho sinnahiyana mannuwelo, mwawiiwanana ni mapuro ni ilocelo, ni waaca wa miloko mpuwa mwa ekulucu ethanleliwe efiliyale. Ekulucu ti ekulucu onnathanliwa ooweherya a ekulucu wi arumeeleke miloko. Efiliyale ennamvahererya ooweherya ekulucu ohoolela mmukhalelo wa okhwaaniherya murici sawe.

¹⁵ Miloko sinnasuwela weeceeca wa marehereryo, atikitheryiwe wi saakhaviherye achu oothene. Awo annaweemererya asitokweene yaawo athanliwe, wi ehooleleke muteko mu ifiliyale, ikulucu ni mmilokoni. Awo anaweherya yoolya yoomunepani ya namuteko oororomeleya ni amiruku wi aavahererye mu elukuluku yoophwanelela. Nave namuteko oororomeleya, onachara ohoolela wa Kristu, echarihaka vakhiviru khiviru malakiheryo a Mpiipiliyani nave anneemererya ohooleela wa munepa waweela. Vaavaa oothene nnalapaahu mwawiiwanana, ninnakhalano mphurelo woolikana ni yoowo Akristu a nsana noopacerya yaaraayano: “Muloko . . . nihiku nnihiku, waanaaceerereya.”—Saw. 16:5.