Mapuro Ahu a Malapelo

ALAPELI eeparipari a Yehova aavahiwa nlamulo na othukumanaka vamoha wi yaakhele malakiheryo vamoha ni olipihana mukina ni mukhwaawe. (Ahe. 10:23-25) Nipuro noopacerya na malapelo wa achu oothanliwa a Muluku, Aisarayeli, yiichaniwa “empa yookumanamo ni Muluku.” (Muk. 39:32, 40) Ohoolo waya, Solomoni mwaana a Tavite aateka empa ya Muluku, yeeyo yaari yoocicimiheya. (1 Mam. 9:3) Emanle omwaryiwa empa ela mu 607 E.E.K., Ayuta yaapaka marehereryo wi ethukumaneke mu ipa siichaniwa sinakooka wi emulapelekemo Muluku. Moovira wa elukuluku, empa ya Muluku yaatekiwa wanaawiili, nave tho yaaphariheliwa ntoko nipuro navameekhaaya wi alapeliwekemo Muluku. Yesu aanaahusiha achu mu asinakooka naari mu empa ya Muluku. (Luka 4:16; Yoh. 18:20) Ophiyerya tho wi Yesu aapaka muthukumano omwaako.—Mat. 5:1–7:29.

² Amanle Yesu okhwa, Akristu yaanathukumana mmapuro oosuweliwa ni mmavaate mwa anna wi ehuserye Soorempwa ni opuha onthamwene ni anna aya. (Saw. 19:8, 9; Aro. 16:3, 5; Kol. 4:15; Filé. 2) Ilukuluku ikina waanakhala woochuneya wa Akristu, othukumana mmapuro oovitheya woona wi yaaniikariwa. Chiryene, alapeli oororomeleya a Muluku akhalai yaakhalano nchuno ntokweene na othukumana vamoha mmapuro a malapelo wi ekhale “oohuserya a Apwiya.”—Isa. 54:13.

³ Mmahiku ahu yaala tho, annaphariheliwa mapuro oosuweliwa ni mmavaate mwa anna ntakhara mithukumano Seekristu. Mmavaate mwa anna, wiiliwiili annaphariheliwa ntoko mapuro a mithukumano ntakhara muteko woolaleerya. Yaawo aneemererya ovaha nipuro ntakhara mithukumano seiha, ahoona wi ekari etokweene. Ancipale annoona wi ti wamphurelo ovahererya nipuro vaate vaya ntakhara mithukumano seiha.

EMPA YA OMWENE

⁴ Nipuro na mithukumano na Anamoona a Yehova, nniichaniwa Empa ya Omwene. Wiiliwiili, ninnathummwa nipuro nave etekiwa Empa ya Omwene naari orehereryiwa empa yeeyo eri yookhaleene. Wi nipharihele phaama ikhorowa vamoha ni ipa sahu sa malapelo, akhweya miloko mincipale sinnapharihela Empa ya Omwene emohamoha wakhala wooweryeya. Mmapuro makina, onnakhala woochuneya opoleya empa ni olivelaka. Wa Ipa sa Omwene ivyaani ni seihe inachuneya oreheryiwa vatokovene, ti waweemereryeya okhalavo muthukumano wa oveleela empa eyo. Nyenya, wakhala wi oreheryiwa iwo ti wavakhaani, tahi woochuneya opaka muthukumano wa oveleeliwa.

⁵ Otekiwa wa Empa ya Omwene honaphwanela waavya mukhalelo wa oteka yoowo onahaala waatikhinihaka achu. Naamwi mukhalelo wa otepa ipa iho ohiyanaka nipuro nnipuro, echu yoochuneya eri yoolakelela ya empa eyo. (Saw. 17:24) Mwawiiwanana ni mukhalelo wa vanipuroni, nnaphwanela othanliwa nipuro noophwanelela ni naphaama ntakhara mithukumano Seekristu.

⁶ Miloko soothene sa Anamoona a Yehova sinnakhaviherya opharihela phaama, orehererya vamoha ni ovela mu Empa ya Omwene yeeyo anathukumanaayamo. Honavekiwawo ikhorowa. Sookhalawo ikaaxa sa sooveleela, wi wakhala woochuneya yaale anathukumana evaheke sooveleela saya wi iphariheliwe mu soothowa sa muloko. Awo anaveleela aneene meekhaaya nave ni murima aya woothene.—2 Kor. 9:7.

⁷ Oothene mmulokoni anoona okhala ekari etokweene okhaviherya Empa ya Omwene ni ikhorowa saya nave anniivaha ovelamo ni orehererya. Mutokweene mmoha naari murummwa oorumeela onnathanliwa wi apakeke marehereryo a ovela mu Empa ya Omwene. Ikwaha sincipale, ovela iwo oneeriwa ni makhuuru a muteko woolaleerya, ehooleliwaka ni oohoolela a nikhuuru naari mukhaviheryi a munna yoowo onahoolela nikhuuru nlo. Vaate ni mpuwa mwa Empa ya Omwene enaphwanela omucicimihaka Yehova ni marehereryo awe.

⁸ Mapuro yaawo, miloko miili naari sawaaca inathukumanaaya mu empa emohamoha, atokweene a miloko seiho annapaka Nikhuuru Noorehererya Empa ya Omwene, wi ethokororyeke miyaha vooloca sa empa eyo vamoha ni nipuro nlo. Nikhuuru na atokweene ninnamuthanla munna mmoha wi arumeeleke ntoko muhooleli a nikhuuru na orehererya. Elapaka mwawiiwanana ni nikhuuru na atokweene, nikhuuru noorehererya empa ninnapaka marehereryo a ovela ni orehererya mu Empa ya Omwene vamoha ni okhalano ichu soochuneya ntakhara miteko seiha. Wi ela yeereye mwaphaama ti woochuneya wi okhalevo wiiwanana wa miloko seiho inathukumana mummo.

⁹ Wakhala wi miloko soohiyana sinnapharihela Empa ya Omwene emohamoha, akhweya yaahaala okhala yaphaama ohiyaniha elukuluku ni mahiku a mithukumano. Atokweene a miloko iho anaphwanela ovaanela mwawiiwanana ni moosivela vooloca sa mwaha yoola. (Fil. 2:2-4; 1 Ped. 3:8) Hiwaavo muloko onaphwanela opaka yoolakelela mu nipuro na miloko mikina. Vaavaa ooweherya a ekulucu onaxekuryeiye muloko mmoha apharihelaka Empa ya Omwene emohamoha, miloko mikina inaphwanela otoroka elukuluku ya mithukumano aya mu esumana yeeyo wakhala woochuneya.

¹⁰ Ti wooweryeya tho opharihela Empa ya Omwene ntakhara mwaha wa othela ni makhwelo, wakhala wi yoheemereryiwa ni Nikhuuru na Muteko wa Muloko. Atokweene ala annathokororya mweephoole ovekiwa wuuwu nave yoolakelela aya enathipeleya mu ohoolela anavahiwaaya ni efiliyale.

¹¹ Yaale aneemereryiwa opharihela Empa ya Omwene mmukhalelo yoola, anaweheriwa wi soothene eneeraaya epake, yooniherye wi Akristu eeparipari. Hiyaavo echu enaphwanela opakiwa mu Empa ya Omwene yeeyo enahaala waakwaculiha anna akina naari onyemuliha nsina na Yehova ni nsina naphaama na muloko. (Fil. 2:14, 15) Ehooleliwaka ni efiliyale, Empa ya Omwene enanwerya tho ophariheliwa ntakhara mithukumano mikina, ntoko Exikola ya Orummwa wa Omwene ni Exikola ya Muteko Woopiyoneero.

¹² Ilukuluku soothene, anna anaphwanela ocicimihaka nipuro na mithukumano. Soowara ni mukhalelo wa owara vamoha ni oreerihiwa wa Empa ya Omwene onaphwanela wooniheryaka ncicimiho ntoko alapeli a Yehova. (Ekle. 5:1; 1 Tim. 2:9, 10) Moorweela wa opharihela malakiheryo mmwaha yoola, ninnooniherya ocicimiha mithukumano sahu Seekristu.

¹³ Ti woochuneya wi mithukumano ineereya moomaaleleya. Enaweheryiwa wi anamwane ekiraathiki ni asitiithi aya. Asitiithi arino anamwane annaceenyeryiwa okiraathi va nipuro nenlo eneeraaya ehiwaakanyereke achu akina wakhala wi onnakhala woochuneya okhuma wi yaalake anamwane naari waathokororya mu ichu ikina.

¹⁴ Anna anaphwanelela annathanliwa wi ekhale athoonyeryi mmithukumano. Awo anaphwanela okhala oovareryela, oonthamwene ni oophimelela. Muteko aya onavolowela waaxeliha avyaani ni owaakhela phaama, waakhaviherya ophwanya nipuro nookiraathi yaale anaphiya mithukumano ipacenrye, owaalakhanya oothene, ni weera soothene sinahaala waakhaliha phaama anna. Wakhala woochuneya, muthoonyeryi onahaala owuupuxerya asitiithi ochuneya waya waakhapelela anamwane wi ehichimakeke ihaakumve naari imanle mithukumano naari othata ohoolo. Wakhala wi asitiithi aakhalano mwaana awuukhula, mmukhalelo waphaama ni woocicimiheya, muthoonyeryi onanwerya waaleela wi emukumiherye vaate. Muteko wa athoonyeryi onnakhaviherya vancipale wi achu oothene epuhe mithukumano. Enaweheryiwa wi atokweene ni arummwa oorumeela ekhale teni erumeeleke ntoko athoonyeryi.

OTEKA IPA SA OMWENE

¹⁵ Mu nsana noopacerya, Akristu akina yaari ooreela waapwaha akina, mwawiihiiha murummwa Paulo aarepa: “Elukuluku yeela oreela wanyu okhaviherye othowiwa wa akhwiinyu, wi oreela waya, nihiku nlo, okhaviherye othowiwa wanyu; hiihaa onamukhalavo olikana.” (2 Kor. 8:14) Olelo, “olikana” yoola onneereya. Ikhorowa sinaveleeliwa mmiloko soothene orukurerya elapo, sinnaphariheliwa wi itekiweno naari oreheryiwa Ipa sa Omwene. Marehereryo a Yehova vamoha ni miloko seiho sinakhaviheryeya ni sooveleela seiha, sinnathamalela vancipale mahala anooniheryiwa ni onnaahu wa elapo yoothene.

¹⁶ Efiliyale epacenrye ovarerya soothowa ni makhalelo a vanipuroni, eyo ennalakelela miloko taani sinahaala opharihelaka Empa ya Omwene emoha yeeyo. Efiliyale tho ennalakelela nipuro ni elukuluku enahaalaaya otekiwa naari orehereryiwa Empa ya Omwene, mpuwa mwa ekulucu ya efiliyale. Vaavaa inaphacuwaaya ipahu, annapakiwa marehereryo wi ireheryiwe Ipa sa Omwene seiho simwaryen’ye, nave tho wakhala woochuneya, orehererya ipa sa anna.

¹⁷ Efiliyale ennaapharihela anna awiiveleela wi ekhaviherye mmiteko ntoko othuma nipuro, oteka Empa ya Omwene, itukumento sa oteka vamoha ni orehererya Ipa sa Omwene. Nthowa na ochuneya otokweene wa Ipa sa Omwene orukurerya elapo, annachuneya alipa awiiveleela ancipale. Alaleeryi oothene oopatisiwa yaawo anaphwanelela, annaceenyeryiwa orepela epetisau ni oveleela wa Nikhuuru na Muteko wa Muloko. Ophiyeryatho alaleeryi oohipatisiwa ananwerya okhaviherya mmuteko wa oteka naari orehererya Empa aya ya Omwene.

IPA SA MITHUKUMANO MITOKOTOKO

¹⁸ Akristu a nsana noopacerya yaanathukumana mmakhuuru makhaani. Nyenya vakina vaya, “achu ancipale” yaanathukumana. (Saw. 11:26) Moolikana, achu a Yehova olelo annathukumana mmithukumano mitokotoko ntoko sa ekulucu naari sa miceche. Ipa sa vanipuroni sinnapoleiwa wi siphariheliwe, nyenya wakhala wi hisaavo ipa soophwanelela, ennapakiwa Empa ya Mithukumano Mitokotoko.

¹⁹ Ikwaha ikina, Ipa sa Mithukumano Mitokotoko, inamuthummwa nave irehereryiwa. Wiiliwiili, nnathummwa nipuro nave epakiwavo empa esyaani. Ipa sa Mithukumano Mitokotoko ti soohiyana winnuwa waya, mwawiiwanana ni soothowa sa vanipuroni. Efiliyale ennalakelela othuma naari oteka empa pahiru emanle othokororya mwawiixeela ni osuwela waaca wa achu anahaala opharihelaka.

²⁰ Efiliyale ennaathanla anna wi ekhapeleleke ni orehererya Empa ya Mithukumano Mitokotoko. Annapakiwa marehereryo wi anna a ekulucu ekhaviheryeke mu orehererya wiiliwiili Empa ya Mithukumano Mitokweene, nave orehererya iwo oneeriwano ekwaha emoha vayaakhani, naari orehererya naamwi ehirivo echu enananre. Anna annaphura vancipale vaavaa aniiveleelaaya wi ekhaviherye. Nyenya, miloko sinnaceenyeriwa okhaviherya marehereryo yaala ni murima woothene.—Sal. 110:3; Malak. 1:10.

²¹ Ikwaha ikina, Ipa sa Mithukumano Mitokotoko sinnaphariheliwa ntakhara miteko mikina Seekristu, ntoko ixikola sa omuhuserya Piipiliya vamoha ni mithukumano sa va meekhaya ineeriwa ni ooweherya a ekulucu. Hiiha ntoko Empa ya Omwene, Ipa sa Mithukumano Mitokotoko sinnaveleeliwa ntoko nipuro na malapelo. Vaavaa nnathukumanaahu mu Empa ya Muthukumano Mutokotoko, soowara ni mukhalelo wa owara vamoha ni oreerihiwa empa ahu onaphwanela okhala wa ncicimiho, hiiha ntoko vaavaa nnayaahu mmithukumano mu Empa ya Omwene.

²² Achu ancipale anamvira erwaaka wi epake makupa a marehereryo a Muluku mmahiku yaala ookuchula. Ela yawooniherya wi Yehova onnanreeliha. (Isa. 60:8, 10, 11, 22) Mwawiihiiha, nnachuna okhaviherya marehereryo yaala a waavya, orehererya ni okhapelela mapuro ahu a malapelo. Neerano hiiha, nnooniherya wi ninnathamalela yoolakelela ya ipa seiha, ori onikhaviherya wi nnawerya olipihana mukina ni mukhwaawe, xaxaxa vaavaa nnoonaahu wi nihiku na Yehova nri vakhiviru.