MWAHA 12
Okhaviherya Muteko wa Omwene Vanipuroni ni Elapo Yoothene
YAAKHWANIHERYAKA yooloherya ya Yesu vooloca sa mahiku ookuchula, Anamoona a Yehova annalaleerya michaka yaphaama “ophiyerya weiwo elapo ekontaayawo.” (Saw. 1:8; Mat. 24:14) Wi ewerye weerano yeeyo, awo anniivaha elukuluku ni ikuru saya wi eloce ichu soomunepani ni akina. Eroromelaka wi Yehova onahaala waakhaviherya akapuro awe, awo annatitelela okuha soothowa sa Omwene mu nipuro noopacerya mu okumi aya. (Mat. 6:25-34; 1 Kor. 3:5-9) Sookhumelela sene, yawooniherya ya mareeliho ni weemererya wa Yehova.
OKHAVIHERYA SOOTHOWA SA OMWENE ELAPO YOOTHENE
2 Vaavaa achu anoonaaya meerelo ahu a olaleerya ni waakawa wahu aliivuru vamoha ni Apiipiliya nihivekaka ikhorowa wa achu, akina annakoha: “Anawerya weerano hai soothene iha?” Eparipari wi waapaka Apiipiliya ni soolaleeryiwa onachuneya ikhorowa. Oteka ni okhapelela ipa sa Opeteli ntakhara anna yaawo analapa ni maakina a waapaka aliivuru, anna yaawo anahoolela muteko woolaleerya, vamoha ni yaawo anarumeela mmikhalelo mikina, onachuneya tho ikhorowa. Mwawaaceererya, ooweherya a ekulucu, mamisiyonariyu, mapiyoneero avameekhaaya, ni akina ari mmuteko wa elukuluku yoothene annavahiwa ikhorowa savakhaani wi etitelele orumeela. Chiryene, muteko wa olaleerya michaka yaphaama mmahiku ahu yaala, wa vanipuroni naari elapo yoothene onachuneya ikhorowa sincipale. Nyenya ikhorowa sene inarwa woowi?
3 Ancipale yaawo anathamalela muteko wa mahusiheryo a Piipiliya wa Anamoona a Yehova, annapaka sooveleela wi ekhaviherye muteko wa elapo yoothene. Nyenya, muteko ahu onakhaviheryiwa xaxaxa ni Anamoona a Yehova, akina a yaawo annapaka sooveleela saya ekerihaka o efiliyale ya elapo aya. Awo annooniherya munepa mmohamoha wooniheryiwe ni alapeli a Yehova akhalai, yaawo yaapanke sooveleela saya wi nipakiwe nipuro na malapelo. (Muk. 35:20-29; 1 Math. 29:9) Akina annarepa wi sookhalano saya siphariheliweke ni marehereryo a Yehova emanle okhwa, orweela wa sooveleela sa muchu ti muchu, sooveleela sa muloko ni sa ekulucu, wiiliwiili sinakhala savakhaani. Sapwexeheryiwa, ikhorowa iha sinnakhaviherya oya vahoolo wa muteko ahu.
Anamoona a Yehova, anoona okhala ekari etokweene opharihela ikhorowa saya ni sookhalano saya ikina wi ekhaviherye muteko wa olaleerya
4 Anamoona a Yehova, anoona okhala ekari etokweene opharihela ikhorowa saya ni sookhalano saya ikina wi ekhaviherye muteko wa olaleerya. Yesu ni oohuserya awe yaakhalano murupa wa ikhorowa, seiho saakhaviherya okhwaaniherya soothowa saya. (Yoh. 13:29) Piipiliya onnaaloca athiyana yaawo yaamurumeela Yesu vamoha ni oohuserya awe. (Mar. 15:40, 41; Luka 8:3) Murummwa Paulo aanaakhela ni othamalela nikhaviheryo noomwiilini na yaale yaachuna okhaviherya muteko wa olaleerya michaka yaphaama ni oveleela ntakhara muteko awe. (Fil. 4:14-16; 1 Tes. 2:9) Anamoona a Yehova annatitelela ochariha meerelo yaala a mahala ni mvai. Mmukhalelo yoola, ti wooweryeya waavaha mahaleene “maahi ookumi” achu mmapuro oothene.—Wup. 22:17.
OKHAVIHERYA SOOTHOWA SA MULOKO
5 Soothowa sa muloko tho sinaliveliwa moorweela wa sooveleela. Honavekiwawo ikhorowa; naari hiyaavo epereesu etikitheryiwe ya sooveleela. Sookhalavo ikaaxa mmapuro a mithukumano wi yoole onachuna okhaviherya apake makupa mu ovaha “ntoko onuupuweleleiye mmurimani mwawe.”—2 Kor. 9:7.
6 Ikhorowa sinaveleeliwa, sinaphariheliwa woopaceryani wi ikhaviherye orehererya ni olapa wa Empa ya Omwene. Nikhuuru na atokweene ninnalakelela wi ikhorowa ikina iveleeliweke o filiyale wi sikhaviherye muteko wa elapo yoothene. Muloko onnapaka yoolakelela vooloca sa ikhorowa anahaalaaya oveleelaka. Mmukhalelo yoola, miloko sinnawerya operekha mweeri ti mweeri sooveleela saya wi sikhaviherye muteko wa elapo yoothene. Wakhala wi oothene annasuwela soothowa seiho sinakhumelela ilukuluku ni ilukuluku, hokhala woochuneya oceenyerya vooloca sa opaka sooveleela.
MUKHALELO WA OPHARIHELIWA SOOVELEELA
7 Wookuchulani wa muthukumano ori woothene, anna apiili annahula ikaaxa wi yaalakhanyerye ni orepela ikhorowa seiho siveleeliwe. (2 Mam. 12:9, 10; 2 Kor. 8:20) Nikhuuru na atokweene ninnapaka marehereryo wi ikhorowa iho ikhapeleleye ophiyerya elukuluku anahaalaaya oveleela o filiyale naari opharihela mmulokoni. Munna yoowo onathokororya ikhorowa sa muloko, onnarehererya yoolokoha mweeri ti mweeri wi elokohiwe mmulokoni, nave savira miyeeri miraru, oohoolela a nikhuuru na atokweene onnapaka marehereryo wi ivareryiwe mukhalelo iphariheliwaaya ikhorowa.
SOOTHOWA SA EKULUCU
8 Soothowa sa mithukumano sa ekulucu ni soothowa sikina sa ekulucu sinakhwaaniheryeya moorweela wa sooveleela sa Anamoona a Yehova yaawo anapaka makupa a ekulucu yeeyo. Va muthukumano wa ekulucu sinnakhalavo ikaaxa sa sooveleela wa yaale anachuna okhaviherya soothowa sa ekulucu. Mwawaaceererya, wi saakhwaniheryiwe soothowa, ikwaha ikina miloko sinanwerya ovahererya sooveleela.
9 Enaweheryiwa wi ikulucu iweryeke olivela soothowa saya ni ikhorowa sinaveleeliwa ntakhara muteko wa elapo yoothene. Wakhala wi hisaavo ikhorowa sawaakhwanela mu ekulucu wi iwerye oliveliwano soothowa sa muthukumano ovinre naari soothowa sa muthukumano onacharela, naari wi iliveliweno nipuro na muthukumano, ooweherya a ekulucu onanwerya olakelela wi epakiwe yoolokoha mmilokoni vooloca sa ekari ya opaka sooveleela. Nikhuuru ti nikhuuru na atokweene nnahaala othokororya mwaha yoowo wi nlakelele yooveleela muloko onaphwanelaaya opaka wi okhaviherye soothowa sa ekulucu. Nave voocharela anahaala olokoha yoolakelela epakiwe.
10 Wakhala wi sookhumelela miyaha inavolowela ikhorowa, onachuneya wi atokweene a ekulucu ekhaviherye, muthukumano wa atokweene a ekulucu onahaala weeriwa mu nihiku nenlo na muthukumano wa ekulucu. Soolakelela soothene sihinapaka makupa a soothowa sa ekulucu, sinaphwanela opakiwa moorweela wa olakelela wa nikhuuru na atokweene. Soolakelela seiho sinaphwanela orepeliwa mwawaakhwanela ni operekhiwa wi seemereryiwe ikwaha soothene sinaphariheliwaaya ikhorowa sa ekulucu.
11 Annapakiwa marehereryo wi ivareryiwe mukhalelo iphariheliwaaya ikhorowa sa ekulucu.
WAAKHAVIHERYA OOHAAWA
12 Emoha ya yoolakelela ya ekaaxa ya ikhorowa yaari ni oohuserya a Yesu waari waakhaviherya oohaawa. (Mar. 14:3-5; Yoh. 13:29) Murici yoola wa Akristu onnatitelela ophiyerya mmahiku ahu yaala, woona wi Yesu aaloca: “Achu oohaawa enii enamukhala ni nyuwo mahiku oothene.” (Mar. 14:7) Anamoona a Yehova anaakhwaniherya hai murici yoola mmahiku ahu yaala?
13 Ilukuluku ikina, anna oororomeleya mmulokoni annachuna nikhaviheryo noomwiilini nthowa na wuuluvala, ereca, naari echu ekina ahinaweryaaya ovootha. Amusi, asuweli, naari akina yaawo anasuwela nikacamiho nlo ananwerya okhaviherya. Eyo enniiwanana ni masu a murummwa Yohani: “Muchu akhalano muhakhu awe weelapo ya vathi, amoona munnawe athowiwe, uumiha murima, onii owerye hayi okhala mwa yoowo osivela wa Muluku? Anaaka, nihikhwelaneke mwa masuru, nari eyanoru, nto mmiteko ni mweeparipari.” (1 Yoh. 3:17, 18; 2 Tes. 3:6-12) Malapelo eeparipari annavolowela waakhaviherya omwiilini annihu oororomeleya.—Tiy. 1:27; 2:14-17.
14 Mu ekaarata awe yoopacerya wa Timoteo, murummwa Paulo aaloca mukhalelo wa ovaha nikhaviheryo noomwiilini wa yaale anaphwanela. Nyuwaano munanwerya waalakhanya ekano awe mu 1 Timóteo 5:3-21. Mukristu ti mukristu torino murici wa waakhaviherya achu a veemusini vawe. Awuuluvala ni awiiceliwa, anaphwanela okhaviheryiwaka ni anamwane aya, asisulwaaya, naari ahima akina. Vakina vaya, ti wooweryeya ovahiwa nikhaviheryo orweela wa alamuleli ntoko nikhuuru nnaakhaviherya alipa oohaawa; mwawiihiiha, ahima naari asuweli akina ananwerya okhaviherya orepela itukumento sinachuneya. Vakina vaya, sinnakhumelela saweereya ikina sinahaala weeriha okhala woochuneya muloko woothene othokororya mukhalelo wa omukhaviherya munna naari murokora yoowo orumeenle moororomeleya moovira wa elukuluku. Wakhala wi haavo mmoha a veemusini naari muhima mukina onawerya okhaviherya naari hanawerya waakhela nikhaviheryo na alamuleli, nikhuuru na atokweene nnaphwanela weeravo echu wi nivahe nikhaviheryo. Wa Akristu, ekari etokweene wuuka sookhalano saya ni yaale ari oothoiwa.
15 Anna ni arokora ancipale annakhala oothoiwa nthowa na wiikariwa, ikhoco, mwaacikinye, osareya wa maahi, etala naari ipahu ikina sineereya mmahiku ahu yaala oovila okhala. (Mat. 24:7-9) Muloko wa vanipuroni akhweya honawerya okhaviherya, va nthowa na yeela, Nikhuuru Noolamulela ninnahoolela wiilipixerya wa anna a makupa makina wi evahe nikhaviheryo nnachuneya. Ela enalikana ni yeeyo Akristu o Asiya Mukhaani yeenraaya, evahaka yoolya wa annaya o Yuteya variyari va elukuluku ya etala. (1 Kor. 16:1-4; 2 Kor. 9:1-5) Moorweela wa ochariha yootakiherya aya, ninnooniherya osivela wahu wa anna nave tho ninnooniherya wi na oomuchara eeparipari a Yesu Kristu.—Yoh. 13:35.
OKAIWA WA SOOLALEERYIWA
16 Apiipiliya vamoha ni soolaleeryiwa sinathipeleya Mpiipiliyani sinnakhaviherya omwaramwaxa michaka ya Omwene. Wiiliwiili nikhuuru na atokweene ninnamuthanla murummwa oorumeela wi athokororyeke soolaleeryiwa sa muloko. Anna yaawo anathanliwa wi ethokororyeke makupa yaala, annalapa moowetha. Awo annarepela mwawaakhwanela, wi sikhalekevo soolaleeryiwa sinachuneya mmulokoni.
17 Ntoko Akristu awiivelela, ninnasuwela wi elukuluku ahu, muupuwelo ahu ni mavyakelo, masuwelelo ni sookhalano, naari ekumi ahu soovaha sinarweela wa Muluku, nave tho hiyaano ninniiwexexa wi nnaphwanela opharihela mmuteko awe. (Luka 17:10; 1 Kor. 4:7) Moorweela wa opharihela sookhalano sahu soothene, ninnooniherya osivela wahu wawiiseela wa Yehova. Yoolakelela ahu ori omucicimiha Yehova ni ichu nryaahuno, nsuwelaka wi owo onnahakalala ni yoovaha eri yoothene enooniherya omurumeela ni murima ahu woothene. (Masi. 3:9; Mar. 14:3-9; Luka 21:1-4; Kol. 3:23, 24) Yesu aaloca: “Mwaakhenle mahaleene, mvaheke tho mahaleene.” (Mat. 10:8) Vaava nniivahaahu ni opharihela sookhalano sahu mmuteko wa Yehova, ninnakhala oohakalala vancipale.—Saw. 20:35.