Onnaahu wa Wiiwanana

VARIYARI va iyaakha 1.500, Yehova Muluku aavilela ni nloko na Aisarayeli ntoko achu a nsina nawe. Voocharela Yehova ‘aahiithanlela mwa amalapo muloko wa mu nsina nawe.’ (Saw. 15:​14) Achu a nsina na Yehova yaahaala okhala anamoona awe, awiiwanana mmuupuwelo ni saweera, moohipwacha weiwo anakhalaayawo. Wiiwanana yoola wa a achu a nsina na Muluku waahaala okhala yookhumelela ya nlamulo nenlo Yesu aavanheiye oomuchara awe ariki: “Haweni wa achu a maloko oothene, mwaapakeke oohuserya aka, munaapatisa mu nsina na Atiithi, na Mwaana ni na Munepa Waweela, nave munaahusiha ochariha soothene koorummaakaani.”—Mat. 28:​19, 20.

² Moorweela wa wiiveleela wa Yehova ni opatisiwa, nyuwo mookhala oohuserya a Yesu. Nyuwaano munnapaka makupa a wiiwanana, a onnaahu wa veelaponi yoothene, yoowo ohineemererya wi ohiyana wa maloko, mahimo naari sookhalano saakawanye yaawo. (Sal. 133:⁠1) Ntoko yookhumelela, nyuwaano munnaasivela ni waacicimiha anninyu a mmulokoni. Akina a yaawo akhweya ta ekoore, elapo ni masuwelelo oohiyana, achu yaawo woopaceryani wi ohikhale wooweryeya ochekulano nthowa na ohiyana weiwo. Nyuwaano mookhalano wiiwanana woosivela wa onnaahu yoowo ori woolipa ohiyana ni waataana okina, wa sookhalano, wa malapelo naari weemusi.​—⁠Mar 10:​29, 30; Kol. 3:​14; 1 Ped. 1:⁠22.

OTOROKA MUKHALELO WA WUUPUWELA

³ Waakhanle wi akina onnaavila ovootha nthalu na ohiyana wa ikoore, ipoliitika, wa sookhalano naari sikina, awo ananwerya wuupuwela sa Akristu oopacerya yaawo yaari Ayuta, yaawo yaaphwanela okhala ootaphuwa wa nthalu na malapelo a Ayuta ntakhara achu a maloko makina. Vaavaa Petro aaleeliweiye oya vaate va Korneliyu mutokweene a anakhoco o Roma, Yehova moosivela aamurehererya ntakhara murici yoola.​—⁠Saweriwa T’arummwa, ekap. 10.

⁴ Mu yaawoona, Petro aahileeliwa wi iiphe nave akhuure inama seiho saari soothanyeya wa Ayuta. Vaavaa Petro aakhonceiye weerano yeeyo, nsu nookhumela wirimu naahi: “Oheere yoothanyeya yeeyo Muluku oreerinheiye.” (Saw. 10:​15) Yaweereya yeela yaari yoochuneya wi Petro atoroke muupuwelo awe ntakhara murici yoowo aahaaleiye waakhela, eyo tiwi, omusekurya mulopwana a nloko nikina. Iiwelelaka ohoolela wa Muluku, Petro ahi wa achu yaale yaathukumanne: “Moosuwela phaama sene, wi honeemereriwa wi muYuuta iiphitaanye nari omweeceecela mmalapo, nto Muluku ookooniha wi kihimweere muchu pure okhala oothanyeya. Mwawihiihaa, kiichaniwaaka, kihoorwa kihikhoonceru.” (Saw. 10:​28, 29) Voocharela, Petro aahoona wi Yehova aamweemererya Korneliyu ni emusi awe.

⁵ Saulo o Tarsi, nfarisi oohusihiwa phaama, aaphwanela wiiyeviha ni okhala vamoha ni achu yaawo woopaceryani hiwii okhale wooweryeya ochekulano. Ophiyerya wi owo aaphwanela ochariha ohoolela waya. (Saw. 4:​13; Gal. 1:​13-​20; Fil. 3:​4-​11) Nnawerya waanyiherya matorokelo achu akina yaapankaaya mmukhalelo aya wa wuupuwela ntoko Serixiyu Paulo, Tiyonisiyu, Tamarisi, Filemoni, Onesimu, vaavaa yaakhulenlaaya michaka saphaama nave ekhala oohuserya a Yesu Kristu.​—⁠Saw. 13:​6-​12; 17:​22, 33, 34; Filé. 8-​20.

OKHAPELELA WIIWANANA WAHU WA VEELAPONI YOOTHENE

⁶ Moohikhwa minikwa, osivela wa anna ni arokora mmulokoni wohookhaviheryaani omwaacamela Yehova ni marehereryo awe. Nyuwo mohoona eneneeryo yoohaanyiheryeya ya osivela yeeyo enaasuwanyeiha oohuserya eeparipari a Yesu Kristu, ntoko olonceiye: “Kinnoovahaani nlamulo nahihano nla: mukhwelaneke mukina ni mukhwaawe; ntoko miyo kookhwenlaakaani, hiihaa tho nyuwo mukhwelaneke mukina ni mukhwaawe. Mwakhalano osivela mukina ni mukhwaawe, achu oothene anarwa esuwela wi muri oohuserya aka chiri.” (Yoh. 13:​34, 35) Nave nyuwo mwaapacerya omuthamalela Yehova ni marehereryo awe vaavaa mwiiwexenxaanyu wi osivela ori mmulokoni pahiru yawooniherya ya osivela orivovo wa onnaahu wa veelaponi yoothene. Nyuwo munnoona waakhwanela wa yooloherya ya Piipiliya vooloca sa othukumanyiwa wa achu mmahiku ookuchula wi emulapele Yehova mmureceleni ni mwa wiiwanana.​—⁠Mik. 4:​1-⁠5.

⁷ Nthowa na mikhalelo sincipale inaakawanya achu olelo, taani ahaala wuupuwela wi waahaala oweryeya waathukumanya “achu a ilapo soothene, a maloko oothene, a mahimo oothene, ni a ilocelo soothene”? (Wup. 7:⁠9) Thokororyani ohiyana orivovo variyari va makhuuru aachu oohusiheya ni achu yaawo ahinahiya sookhovelela sakhalai sa mahimo. Muupuwele sa owanawana wa malapelo variyari va achu a ekoore ni elapo emohamoha. Ni waaceereryeya wa okawanyeya wa elapo, wiiliwiili achu ananvira ekhalaka ookawanyeya mu ipoliitika opwaha khalai. Nave, nuupuwelelaka ohiyana orivovo variyari va ichu sookhalano ni mathowa makina oohaalakhanyeya anakawanya achu, wiiwanana wa achu a maloko oothene, ilocelo, makhuuru ni mahimo mu nimakelo noohikawanyeya na osivela ni murecele, echu yootikhiniha yeeyo pahiru Muluku Aikuru soothesene aahaaleiye owerya opaka.​—⁠Zak. 4:⁠6.

⁸ Nyenya wiiwanana yoola ti weeparipari, nave vaavaa mwaakhanlaanyu Namoona a Yehova awiiveleela ni oopatisiwa, nyuwo mwaapaka makupa mu wiiwanana yoola. Woona wi munnaphura wiiwanana yoola, mookhalano murici wa okhaviherya wi otitelele. Munanwerya weerano yeela moorweela wa ochariha masu a Paulo mu Galasya 6:​10: “Vano, elukuluku yeela nryaahuno, niweereleke saphaama achu oothene, shashasha akhwiihu a mweemusini ya nroromelo.” Navetho ninnachariha ekano ela: “Muheere echu muchunaka wiiphwanyerya nari wiisoona, nto mwiiyeviheke; mmoha ni mmoha amweereke mukhwaawe wi toompwaha. Mmoha ni mmoha ahithokororyeke sawaweru, nto saakhweiye tho.” (Fil. 2:​3, 4) Vaavaa nniivyakihaahu wi niwooneke anna ni arokora ahu ntoko Yehova onawooneiye nave ohiya mukhalelo aya wa vaate, nnahaala otitelela opuha murecele ni ohakalala ni yaawo.​—⁠Éfe. 4:​23, 24.

WAATHOKORORYA AKINA

⁹ Ntoko murummwa Paulo oonihenryeiye wa hiyo, ­muloko hori wookawanyeya, nyenya achu aya annathokororyana mukina ni mukhwaawe. (1 Kor. 12:​14-​26) Nnamukhala oorakamelana vancipale ni akina a onnaahu wa elapo yoothene, nyenya hinnahiya othokororya okhala waya phaama. Wakhala wi annihu akina anniikariwa, oothene ninnuukhuwa vancipale. Wakhala wi akina annahoolela othoiwa naari ipahu naari ikhoco, oohalela mwawaakuveya annaavyaavya mikhalelo sa ovaha nikhaviheryo noomunepani ni noomwiilini.​—⁠2 Kor. 1:​8-​11.

¹⁰ Oothene ahu nnaphwanela ovekelaka nihiku ti nihiku ntakhara annihu. Akina annahoolela yaweeha wi epake echu yoonanara. Akina annahoolela nikacamiho nenlo nni nsuweliwe naachu. Nave akina annahoolela wiiciwa ni asinthamwene aya o mutekoni ni mu ichoko sookawanyeya, nave achu vakhaani tanasuwela sa yeeyo. (Mat. 10:​35, 36; 1 Tes. 2:​14) Eyo ennanithananiha nthowa nawi na onnaahu wa elapo yoothene. (1 Ped. 5:⁠9) Aakhalavo akina mwa hiyo analapa moowetha mmuteko wa Yehova, ehoolelaka muteko woolaleerya ni mmilokoni. Navetho aakhalavo akina arino murici wa ohoolela muteko wa veelaponi yoothene. Oothene yaala annachuna mavekelo ahu, nave moorweela wa yaawo ninnooniherya osivela wahu ni waapwacha weeparipari, naamwi ehirivo echu vyakala nnahaalaahu weera mukhatiihu wi naakhaviherye.​—⁠Éfe. 1:​16; 1 Tes. 1:​2, 3; 5:⁠25.

¹¹ Ni waakanyeryeya orivovo veelaponi yoothene mmahiku yaala ookuchula, achu a Yehova anaphwanela okhala ooreheryeya wi ekhaviheryane mukina ni mukhwaawe. Ikwaha ikina, ipahu ntoko mwaacikinye ni osareya wa maahi sinneeriha wi onachuneya mukipici wa waakhaviherya yaale aphacuweliwe epahu wi nivahereryiwe nikhaviheryo noomwiilini mmukhalelo wawaaca. Akristu a nsana noopacerya aavaha yootakiherya yaphaama vooloca sa mwaha yoola. Yuupuwelaka ekano ya Yesu, oohuserya o Antiyokeya yaarumiha ichu moohakalala wi yaakhaviherye anna o Yuteya. (Saw. 11:​27-​30; 20:​35) Ohoolo waya, murummwa Paulo aahaaceenyerya Akorinto opaka makupa mmuteko wa okhaviherya, yoowo weeriweno mmukhalelo wooreheryeya. (2 Kor. 9:​1-​15) Mmahiku ahu yaala, vaavaa annihu anahoolelaaya makacamiho oovila nave enachuna nikhaviheryo noomwiilini, marehereryo ni anna annakhaviherya nave annavahererya yeeyo enachuneya.

OOVALAANYEYA WI YEERRENO YOOKHWELA YA YEHOVA

¹² Onnaahu wawiiwanana wa veelaponi yoothene ori wooreheryeya wi weereno yookhwela ya Yehova. Mu elukuluku yeela, yookhwela ya Yehova ori wi michaka saphaama sa Omwene ilaleeryiwe veelaponi yoothene ya vathi, mu onamoona wa maloko oothene. (Mat. 24:​14) Vaavaa nnapakaahu muteko yoola, Yehova onachuna wi nikhaleke mwawiiwanana ni malakiheryo awe avasulu. (1 Ped. 1:​14-​16) Nnaphwanela okhala orehereryeya wiiwelelana mukina ni mukhwaawe ni olapa wi nivuwihe michaka saphaama. (Éfe. 5:​21) Opwaha soothene, ela tahi elukuluku ya waavya soochuna sahu, nyenya waavya woopaceryani omwene wa Muluku mu okumi ahu. (Mat. 6:​33) Wuupuwela yeela vaavaa nnalapaahu vamoha ntakhara michaka saphaama, ennaruuhela ohakalala otokweene hiihaano nave enahaala onihoolela wa mareeliho oohimala.

¹³ Ntoko Anamoona a Yehova, naachu a vameekhaaya, avalaanyiwe variyari wa achu ntoko achu aweela, amvai mmuteko wa Muluku. (Tito 2:​14) Omulapela wahu Yehova onnanihiyaniha. Ohiya pahiru olapa ni murima mmoha ni annihu mu elapo yoothene, nyenya nnaloca elocelo emoha ya eparipari nave nnapaka ichu mwawiiwanana ni eparipari nnalocaahu. Eyo yaahilaiheryiwa vaavaa Yehova aalokonheiye orweela wa mulipa a miririmu Sofoniya: “Kinahaala otoroka elocelo ya achu wa elocelo yaweela, mwawiihiiha wi oothene yiichaneke nsina na Yehova, wi emulapeleke ni murima mmoha.”​—⁠Sof. 3:⁠9, TNM.

¹⁴ Voocharela, Yehova aahimveerela Sofoniya orepa sa onnaahu wa veelaponi yoothene yoowo onakhala weeparipari olelo: “AIsarayeli yaawo enii yoopowe, hekeerakano soonanara nari oloca sawootha, nari owoka mano. Ntoko ipuchepuche anarwa yiichaala, ehoovaka echu.” (Sof. 3:​13) Moorweela wa okhalano nsuweliho na Masu eeparipari a Yehova ni orehererya muupuwelo ahu ni wiiwananiha mukhalelo ahu wa okumi ni malakiheryo a Yehova, ninnawerya olapa mwawiiwanana. Ninnapaka yeeyo enakhala ntoko yoohiweryeya wa yaale anoona ichu mmoonelo woomuchu. Mweeparipari, naachu oohilikanyiheya, achu a Muluku, anamucicimiha yene veelaponi yoothene.​—⁠Mik. 2:⁠12.