NIKUPA 5
Kookelani wa “Mukukhula ni Mulipa-Oweherya Okumi Anyu”
Nyuwaano munnupuwela nikacamiho nimoha naari mancipale wa oothene athokororyiwe mu eproxura ela? Wakhala wi munnuupuwela, enooniherya wi munnachariha phaama. Akapuro ancipale a Muluku—oothene a mahiku a khalai ni a mmahiku ahu yaala—annahoolela makacamiho oolikana. Hiiha ntoko yaakhenlaaya nikhaviheryo na Yehova wi evoothe makacamiho aya, nyuwaano tho munahaala waakhela.
Yehova onahaala okhala ni nyuwaano wakhala wi moomukookela
MUSUWELE chiri wi Yehova onahaala okhala ni nyuwaano wakhala wi moomukookela. Owo onahaala wookhaviheryaani ovootha soochunachuna, ophoreya mmuupuweloni, ni okhalano murecele wawaakhwanela onarweela wa okhalano yawuupuxerya ya murima yaphaama. Yeereya yeeyo, munahaala okuxeya murima wi mmurumeele Yehova ni Akiristu akina. Mukhalelo anyu onahaala okhala ntoko wa Akiristu akina mu nsana noopacerya, yaawo murummwa Paulo aarepenleiye: “Ntakhara mwámuhuwela si ipuchepuche; nyenya vano mokókela wa Mukukhula ni Mulipa-oweherya okumi anyu.”—1 Petro 2:25.
Okookela wa Yehova moohikhwa minikwa echu yaphaama munaphwanelaanyu weera. Ntakhara heeni? Ntakhara munahaala ohakalaliha murima wa Yehova. (Masiposipo 27:11) Ntoko musuwenlaanyu, Yehova onnanivarerya, mwa yeeyo saweera sahu sinnamvolowela. Mweeparipari, Yehova hananikhinyererya omusivela naari omurumeela yoowo. (Malamulo 30:19, 20) Mulopwana mmoha aamuhuserya Piipiliya aaloca ela mmukhalelo ola: “Haavo onahaala ohula murima anyu. Nyuwaano munaphwanela weera eyo mukhatiinyu.” Moorweela wa omurumeela Yehova moosivela ni murima woothene, ninnathanla ohula nsele nenlo. Neerano hiiha, nnamvaha yamahala yasisapo—wookololowa wahu—nave ninnahakalaliha vancipale murima awe. Chiryene, ohakalala onarweela mu omurumeela Yehova honalikanyihiwa ni echu ekina.—Saweriwa Tarummwa 20:35; Yawupulula 4:11.
Mwa yeeyo, wakhala wi moohiya malapelo Eekiristu, soothowa sanyu soomunepani sinahaala opwata. (Mateyu 5:3) Mmukhalelo taani? Achu orukurerya elapo annakoha, ‘Ntakhara heeni nikhanlaahu?’ Awo annahaawela ophwanya maakhulo a makoho vooloca sa yookhwela ya okumi. Achu aakhalano nchanana nenlo ntakhara Yehova aapatunxe ni yoochuna yeeyo. Owo onipanke wi nihakalaleke mu omurumeela yoowo. Haniwerya ophwanya ohakalala otokweene opwaha yoowo onarweela mu omurumeela Yehova moosivela.—Salmo 63:1-5.
Suwelani wi Yehova onachuna wi mmukookele. Nnasuwela hai yeeyo? Thokororyani: Eproxura ela erehereryiwe mwawiichaaleleya ni mavekelo. Akhweya nyuwaano mvahiwe ni mutokweene naari munna mukina. Nave mwaakuxeya murima waalakhanya ni ochariha malakiheryo anaphwanyeya muumu. Soothene seiha sawooniherya wi Yehova hocuwanleni. Moohiyana, onnoowopani wi mmukookele.—Yohane 6:44.
Ninnahakalala osuwela wi Yehova harwa aacuwala akapuro awe arimeenle. Ti yeeyo murokora awiichaniwa Donna onathamaleleiye. Owo aaloca: “Wiiliwiili kaanathitimanela ohiya eparipari, nyenya vaavaa kaalikhenlaaka masu anaphwanyeya mu Salmo 139:23, 24, yaawo anii: ‘Mukalikhele, Muluku, nave musuwele murima aka; Mukeryerye nave musuwele sawanyiherya saka. Nave mone khwino karinono mechelo ónanara, nave mukihole va’phironi yohivelaru.’ Kaanasuwela wi nkinapaka makupa a elapo ela—nave nkirwa kipaka makupa—kaanasuwela tho wi mmarehereryo a Yehova, ti mummo kinaphwanelaaka okhalamo. Kaapacerya woona wi Yehova harwa akihiya; pahiru kaachuna ophwanya mukhalelo wa omukookela yoowo. Kootepa ohakalala kiwenryaaka weera yeeyo!”
“Kaapacerya woona wi Yehova harwa akihiya; pahiru kaachuna ophwanya mukhalelo wa omukookela yoowo”
Ninnavekela wi nyuwaano tho mukookele opuha “ohakalala onarwa w’Apwiya [Yehova].” (Nehemiya 8:10) Nyuwaano hamukhalano ekeerelani mwakookela wa Yehova.