Nlakano na Yefite

Aisarayeli yaahiya omulapela Yehova nave enaalapa amuluku awootha. Vaavaa Aisarayeli yaahooxiwaaya ni Amonita, amuluku atheru hiyaakhavihenrye. Saavira iyaakha sincipale Aisarayeli ehooxiwaka. Ohoolo waya awo yaahi wa Yehova: ‘Noocheka, nto munoopole hiihaano vaava.’ Aisarayeli yahaanyaanya amuluku aya nave yuluula omulapa Yehova. Yehova haachuna owoona awo ehooxiwaka.

Nakhoco mmoha nsina nawe Yefite aathanliwa wi akhale muhooleli a achu yaawana ekhoco ni Amonita. Owo aaloca ni Yehova: ‘Mwaaveleela amwiicani mmatani mwaka, yoole oopacerya okhuma mpa ni oni akithikirerye kaavonthe yaawo, onamukhala awinyu.’ Yehova aahiiwa nivekele na Yefite nave aamukhaviherya okhumelela phaama weekhoconi.

Vaavaa Yefite aakookenleiye owaani, muchu oopacerya omuthikirerya aari mwanawe mmoharu a mwaamuthiyana. Owo amwiipa ni wiina. Tiheeni Yefite eenreiye? Owo ahuupuwela nlakano aapankeiye nave aaloca: ‘Hii mwanaka, kootakhaliwa! Woonanariha murima aka. Koolipela wa Apwiya nkinawerya okookela oculi.’ Nyenya mwanawe ahi: ‘Tiithi, mwaalipenle wa Apwiya, mukeerele ntoko mulipenlaanyu nto kinaveka wi mukivahe elukuluku wi kikhale ni asinammaaka miyeeri miili.’ Mwaana a Yefite aanakhaviherya mu tapernaakulu ni nroromelo mu ekumi awe yoothene. Iyaakha soothene asinamma awe yaanaya o Silo wi emweecelele.