Yesapeli Onnalakiwa

Ari osulu wa empa awe o Yesirayele, Mwene Akape aahoona emaca ya mulopwana awiichaniwa Napoti. Akape yaamusivela emaca, anachuna othuma ni Napoti. Nyenya Napoti aakhooca otumiha emaca ntakhara nlamulo na Yehova hineemererya otumiha emaca yoohiyeryiwa. Apwanne Akape aamucicimiha Napoti nthowa na wiiwelela nlamulo? Hooye. Owo aamwiica. Akape aanyeenyeya ahinachuna ovinya va niphaani ni ookhooca olya.

Mwaara a Akape Yesapeli aaloca: ‘Weyaano wa mwene Aisarayeli onamukhalano echu yoothene onachunaawe. Kinamonnya emaca.’ Aahaarepela asitokweene a epooma wi emootherye Napoti, eloce wi owo oomuruwana Muluku nave avonyiwe maluku wi akhwe. Voocharela asitokweene yaaheerano yeeyo Yesapeli aarummeiye. Yesapeli aamuleela Akape: ‘Wakuxe emaca ya Napoti. Owo ookhwa!’

Yaakhalavo achu ancipale Yesapeli aawiiphaleiye yahaarino nthowa ophitaanyerya Napoti. Yesapeli annawiipha achu yaamulapa Yehova. Owo annaalapela amuluku atheru ni weera ichu soonanara. Yehova aahoona ichu soonanara Yesapeli eereiye. Vano Yehova aamoona hai?

Amanle okhwa Akape, mwanawe Yorami aakhala mwene. Yehova aamuruma mulopwana awiichaniwa Yehu wi amulake Yesapeli ni emusi awe.

Yehu aawela ekaaro awe aya weiwo Yesapeli aakhaleiyewo. Yorami aamuthikirerya awenle ekaaro awe amukoha: ‘Ichu sinneeca phaama?’ Yehu aamwaakhula: ‘Inii seece hai eniiha amama aa yeeraka ichu soonanara?’ Yorami aakocoopiha ekaaro awe apacerya ochawa. Nyenya Yehu aamuhoma ni munra Yorami nave aakhwa.

Yehu aaya wa Yesapeli. Vaavaa Yesapeli iiwaleiye wi Yehu onnarwa, owo aahiicikichela sawunkhela, arehererya miihi awe ananwehererya vaxanelani. Vaavaa Yehu aaphin’yeiye, owo aamwaakhela. Yehu aahaaleela akhaviheryi awe yaari vakhiviru ariki: ‘Mmukakhele vathi!’ Awo yaamukakha vaxanelani amorela vathi nave akhwa.

Voocharela, Yehu aalamulela owiipha anamwane a Akape 70 nave aamwarya mapuro oothene aalapeliwamo Pala. Onnawerya woona mukhalelo Yehova osuwenleiye ichu soothene ni waalaka wawe yaale aneera ichu soonanara?