Yehova Onnamwaakiha Yosafati

Yosafati mwene o Yuteya aamwarya miconco sa Pala ni mapuro yaawo yaarimo amuluku atheru. Aanachuna waasuweliha achu malamulo a Yehova. Aahaaruma asitokweene ni Aleevi oothene o Yuteya waahusiha achu malamulo a Yehova.

Maloko aawaacamela yaanoova owana ni achu o Yuteya ntakhara yaanasuwela wi Yehova aari ni yaawo. Awo yaahuupuwela omvaha yamahala mwene Yosafati. Nyenya achu o Mowape, Amonita ni yaale yaakhala o elapo ya Seir yaaya owana ni Ayuta. Yosafati aanachuna nikhaviheryo na Yehova. Yaakhalavo achu ancipale, alopwana, athiyana ni anamwane yaawo yaathukumanne o Yerusalemu. Vamiithoni wa achu oothene owo aavekela: ‘Nyuwo Muluku ahu hinsuwenle echu yaweera nnororomelaani nyuwaano.’

Yehova aahaakhula nivekelo: ‘Muhoove. Mweemele weiwo nave mpheremane kinamoovuluxaani.’ Yehova eenre eheeni wi aavuluxe?

Mmeeloni mwaya, Yosafati aahaarehererya alipa awiipa ni aaleela wi yeeceke ohoolo wa akhoco. Awo yaaneeca ovinyerya o Yerusalemu eyaaka mpuro wa owana wiichaniwa Tekowa.

Alipa awiipa yaanamwiipela Yehova moohakalala ni masu oovuwa. Yehova aawaakiha achu awe. Owo aaheeriha wi Amonita ni a Mowape ekhale ohaleeliheya enawana yaawoyaawo nave haavo aahanle. Yehova aahaakhapelela achu o Yuteya, akhoco naari anamukucho. Achu oothene awaacamela yaahiiwa echu Yehova enreiye, nave michaka saasareya wi Yehova ohaakhaviherya achu awe. Yehova onaavuluxa hai achu awe? Mmikhalelo soohiyanahiyana. Honachuneya wi owo apharihele ikapuchi wi awanihe.