Anakhoco a Yehova Wirimu

Mwene a Asiriya awiichaniwa Pen-Hatate aatitelela owana ni Aisarayeli. Nyenya Eliseu aanamulopola mwene a Isarayeli, mwawiihiiha owo aakophola. Nto Pen-Hatate aalakelela omphara Eliseu. Pen-Hatate aahiiwa wi Eliseu aari o epooma ya Totani, nave aahaaruma anakhoco awe wi yamphare weiwo.

Anakhoco awo yaaphiya ohiyu o Totani. Oxaakavo, mulapeli a Eliseu aavinya aya vaate nave aawoona anakhoco ancipale erukurenrye epooma. Aapacerya woova ni aakhuwela wa Eliseu: ‘Pwiya neere seeni?’ Eliseu aamwaakhula: ‘Amwaakiha ahu ahaaca waapwaha akhoco awo ananirukurerya.’ Mweelukuluku yeele Yehova aheeriha wi mulapeli a Eliseu awoone akavalo ni ikaaro sa ekhoco mmiyaako seiyo saarukurenrye epooma.

Anakhoco a Asiriya echunaka omphara Eliseu, owo aavekela: ‘Pwiya mweere wi achu ala ehooneke.’ Anakhoco awo yaanawerya woona, nyenya mwawaakuveya yaacuwala nipuro yaaraayavo. Vanonto Eliseu aahaaleela: ‘Murimuhuwela. Ephiro mweeraanyu mukuse tahi yeela. Vano mukichare, kinamoohoolaani wa mulopwana yoowo munamwaavyaanyu.’ Awo yaamuchara eyaaka o Samariya weiwo aakhaleiyewo mwene Aisarayeli.

Ohoolo waya Asiriya yaapacerya osuwela nipuro yaaryaayavo. Mwene a Isarayeli aamukoha Eliseu: ‘Achu ala kerenwiipha?’ Apwanne Eliseu aapharihela ekari yeela wi unle ikuhu ni anakhoco yaawo? Ha-o, Eliseu aahi: ‘Ohiwiiphe. Olamule wi evahiwe soolya ni soowurya; yaalya ni yaawurya eroweke.’ Mwene aahaavaha yoolya yawaaca nave aahaarowiha.