Elisapeti Onnamuyara Mwaana

Saavinraaya iyaakha 400 ixiri sa Yerusalemu imanle otekiwa, aakhalavo namukucho yoowo aakhala waacamela epooma, nsina nawe naari Sakariya ni mwaariye Elisapeti. Yaamaliha iyaakha sincipale ethelanne, nto hiyaarino anamwane. Nihiku nimoha, Sakariya avahaka yooveleela mu empa ya Muluku, aarwa munkeelo Kapriyele. Sakariya aatuthuwa, nto munkeelo owo aahi: ‘Ohoove Sakariya. Mwaara aa Elisapeti onammuyara mwaana yoowo oneeraawe omuchuwe nsina na Yohani. Onamukhala mutokweene vamiithoni va Apwiya.’ Sakariya aamukoha: ‘Osuwela yeeyo kini keere hai? Woona wi miyo ni mwaaraka nohuuluvala.’ Kapriyele aahaakhula: ‘Miyo kirummwe wi koolele muchaka yoola waphaama. Vano weyaano onamuhiya oloca ophiyerya nihiku ela eneeraaya yeereye.’

Sakariya aalekela okhumela vaate. Vaavaa aakhummeiye achu yaanachuna osuwela yeeyo yamphacuwenle. Sakariya haawerya oloca, owo pahiru awerya opaka ineneeryo. Achu yaasuwela wi Sakariya aahaakhela michaka sa Muluku.

Mweelukuluku awe, Elisapeti aarupala nave aamuyara mwaana a mwaamulopwana hiiha ntoko munkeelo aalonceiye. Asinthamwene ni amusi awe yaarwa omoona mwaana. Yaatepa ohakalala. Elisapeti aahi: ‘Owo oni aniichaniwa Yohani.’ Achu yaamwaakhula: ‘Mwa ahima aa, haavo orino nsina nenlo. Omuchuwe nsina na Atiithi awe.’ Nto Sakariya aarepa masu ariki: “Nsina nawe ti Yohani.” Ovinyerya elukuluku yeele Sakariya aapacerya oloca! Michaka vooloca sa mwaana owo saamwaramwaxeya o Yuteya oothene, nave achu yaaniikoha: ‘Mwaana ola onaya okhala awiihai?’

Sakariya aasareya munepa waweela, nave aaloherya ariki: ‘Ethamaliwe Apwiya. Ni olipela waya ni nikholo nahu Aparahamu, aanivaha wi noopoliwe mwa amwiicani ahu. Yohani onamukhala mulipa a miririmu. Onaya oreherya mphiro wa Mesiya.’

Yaaheereya tho echu yootikhiniha ni Mariya yoowo aari mmusi a Elisapeti. Nnahaala osuwela sa yeeyo mmwaha onacharela.