Sawoona sa Yohani

Vaavaa murummwa Yohani aareiye mukalaposo o evilivili ya Patmos, Yesu aamooniherya saweereya 16 sa yeeyo yaahaala weereya omwaahiyu. Sawoona iho saathoonyerya weelihiwa wa nsina na Yehova, orwa wa Omwene awe ni weereya wa yookhwela ya Muluku wirimu ni veelaponi.

Mu yawoona emoha, Yohani aamoona Yehova ari va munyukhu awe wa ncicimiho wirimu arukureryiwe ni asitokweene 24 ewanre saweela ni korowa a ewooro. Aahoona waarya ni oruma wa etari orweela va munyukhu. Asitokweene awo 24 yaahuuramela vathi ni omulapela Yehova. Mu yawooniherya ekina, Yohani aahoona muloko mutokweene wa achu a maloko ni ilocelo soothene yaawo anamulapela Yehova. Aamoona Mwaana a Epucepuche yoowo ori Yesu aahoolelaka ni waakeriha ariwo maahi a okumi. Ohoolo waya mu yawoona ekina, aamoona Yesu alamulelaka wirimu ntoko Mwene vamoha ni asitokweene 24. Mu yawoona enacharela, Yohani aahoona enowa etokweene yoowo ori Satana vamoha ni masololo awe. Yesu aawiikara wirimu aavonyerya veelaponi.

Yohani aamoona Mwaana a Epucepuche ni achu 144.000 yeemenle o Mwaako Siyoni. Aamoona tho munkeelo avavaka waacamela elapo yavathi aaleelaka achu wi emooveke Muluku ni omucicimiha.

Voocharela, aahoona ekhoco ya Armaketo. Mu ekhoco yeeyo, Yesu ni anakhoco awe annamvootha Satana ni elapo awe. Mu yawoona yookuchula Yohani aahoona murecele wirimu ni veelaponi yavathi. Onamutoloxiwa Satana ni evyo awe. Soopatuxiwa soothene wirimu ni veelaponi sinnacicimiha nsina na Yehova ni omulapela yooworu.