Miselo wa Alipa a Muthukumano

MUTHUKUMANO WA VAMEEKHAAYA

MUTEKO WA OPETELI Alaleeryi oopatisiwa a iyaakha 35 oya vathi yaawo anachuna orumeela Opeteli, anaphwanela wiirehererya wi ekhale va muthukumano wa sookhweleya sa Opeteli, Naneethanu othana. Nipuro ni elukuluku ya muthukumano yoola nnahaala olokohiwa.

EXIKOLA YA ALALEERYI A OMWENE Mapiyoneero arino iyaakha variyari 23 ni 65 anachuna waaceererya muteko aya woolaleerya, annawompwa wi eye omuthukumano wa sookhweleya sa Exikola ya Alaleeryi a Omwene, Namurunku othana. Nipuro ni elukuluku ya muthukumano yoola nnahaala olokohiwa.

MISELO WA ALIPA A MUTHUKUMANO

ATHOONYERYI Aakhalavo athoonyeryi wi yookhaviheryeeni. Ninnoovekaani wi munawiiwelela phaama, mucharihaka ohoolela waya vooloca sa nipuro na soowela, wookiraathivo ni miyaha mikina.

OPATISO Mipaco sa ale anaya opatisiwa sinahaala okuhiwa ohoolo. Ale anaya opatisiwa anaphwanela okiraathi mmipaco seiha ohaakumve mwaha wa opatiso, Nawoorowa wooxixelo. Muchu ti muchu onaphwanela oruuha etuwalya awe ni yoowara yoophwanelela.

SOOVELEELA Sooyeehiwa ikhorowa sincipale wi sikhalevo mipaco, sooruma, ni ichu ikina sinakhaviherya wi muthukumano ola okhale wa mphurelo, nave wi nimwaacamele Yehova. Sooveleela sanyu soochuna sinnakhaviherya omaliha soothowa seiha ni okhaviherya muteko wa elapo yoothene. Va nipuro nenla sookhalavo ikaaxa sa sooveleela. Sooveleela sanyu sinnathamaleliwa vancipale. Nikhuuru Noolamulela ninnathamalela mahala anyu a okhaviherya soothowa sa Omwene.

NIKHAVIHERYO NOOPACERYA Suwelani wi nipuro nla nnakhaviherya SOOPHACUWA SOOHIWEHERERYEYA PAHIRU.

SOORIMEELA NI SOOCOCIWA Ichu soothene inacociwa inaphwanela okerihiwa o nipuro na Soorimeela ni Soocociwa.Wakhala wi ehoorimeelani echu muye onipuro nenla wi mwaavye echu anyu. Anamwane arimeeliwe asitiithi aya anaphwanela okerihiwa onipuro nenla. Muhuupuwele wi nla nipuro na waakhapelelawo anamwane. Ninnoovekaani wi muhaahiyeke anamwane anyu ocai.

MIPACO Ninnoovekaani wi mwaathokororyeke akina. Mwaavye nipuro pahiru wa yaale murulaanyuno vamoha, munakhalaanyuno vamoha, naari ale munaahusihaanyu Piipiliya. Ninnoovekaani wi muhiheleke ichu va mipaco muhinahaalaanyu okiraathela.

MUTEKO WAWIIVELEELA Wakhala wi munachuna okhaviherya muteko va muthukumano yoola, ninnoovekaani wi mwaloce o nipuro na Muteko Wawiiveleela.